ദിലീപും ജയസൂര്യയും നിരസിച്ച സിനിമയിലൂടെ സുരാജിന് ദേശീയ അവാര്‍ഡ്!പൃഥ്വിയും ദുല്‍ഖറും നോ പറഞ്ഞ ചിത്രം

ദിലീപ് നോ പറഞ്ഞ സിനിമകള്‍

കുട്ടികളുടെയും കുടുംബ പ്രേക്ഷകരുടെയും പ്രിയതാരമാണ് ദിലീപ്. മിമിക്രി വേദിയില്‍ നിന്നും സിനിമയിലേക്കെത്തിയ താരത്തിന് തുടക്കം മുതലേ തന്നെ ഗംഭീര സ്വീകരണമാണ് ലഭിച്ചുകൊണ്ടിരിക്കുന്നത്. ഏത് തരത്തിലുള്ള കഥാപാത്രവും തന്നില്‍ സുരക്ഷിതമാണെന്ന് ഓരോ തവണയും താരം വ്യക്തമാക്കാറുണ്ട്. ജനപ്രിയ നായകനായി തുടരുന്ന ദിലീപും ചില സിനിമകളോട് നോ പറഞ്ഞിട്ടുണ്ട്. താരത്തിന്റെ നോയ്ക്ക് പിന്നിലെ കാരണം വ്യക്തമല്ല. അദ്ദേഹം വേണ്ടെന്ന് വെച്ച് പില്‍ക്കാലത്ത് ശ്രദ്ധേയമായ സിനിമകളില്‍ ജയസൂര്യയും സുരാജ് വെഞ്ഞാറമൂടുമാണ് നായകനായെത്തിയത്.

പേരറിയാത്തവര്‍, ചതിക്കാത്ത ചന്തു

മിമിക്രിയില്‍ നിന്നും സിനിമയിലേക്കെത്തി മികച്ച നടനുള്ള ദേശീയപുരസ്‌കാരം വരെ സ്വന്തമാക്കിയ സുരാജിന്‍രെ കരിയര്‍ തന്നെ മാറ്റി മറിച്ച ചിത്രമാണ് പേരറിയാത്തവര്‍. ഡോക്ടര്‍ ബിജു സംവിധാനം ചെയ്ത സിനിമ ദിലീപ് വേണ്ടെന്നുവെച്ചതാണത്രേ. അത്തരത്തിലുള്ള റിപ്പോര്‍ട്ടുകളാണ് സോഷ്യല്‍ മീഡിയയിലൂടെ പ്രചരിക്കുന്നത്. റാഫി മെക്കാര്‍ട്ടിന്‍ സംവിധാനം ചെയ്ത ചതിക്കാത്ത ചന്തുവില്‍ നായകനായെത്തിയത് ജയസൂര്യയാണ്. ഹാസ്യത്തിന്റെ മേമ്പൊടിയുമായെത്തിയ സിനിമയ്ക്ക് ബോക്‌സോഫീസില്‍ നിന്നും മികച്ച സ്വീകാര്യതയാണ് ലഭിച്ചത്.

ആസിഫ് അലി വേണ്ടെന്ന് വെച്ച സിനിമ

ഋതുവിലൂടെയാണ് ആസിഫ് അലി അരങ്ങേറിയത്. ശ്യാമപ്രസാദിന്റെ സിനിമയിലൂടെ തുടക്കം കുറിച്ച താരം ഇന്നിപ്പോള്‍ യുവതാരനിരയില്‍ പ്രധാനികളിലൊരാളാണ്. ടെലിവിഷന്‍ അവതാരകനായി ജോലി ചെയ്യുന്നതിനിടയിലാണ് ആസിഫ് സിനിമയിലേക്കെത്തിയത്. വ്യത്യസ്തമായ സിനിമകളിലൂടെ പ്രേക്ഷകരെ വിസ്മയിപ്പിച്ച അമല്‍ നീരദ് സംവിധാനം ചെയ്ത ഇയ്യോബിന്റെ പുസ്തകത്തിലേക്ക് ആദ്യം പരിഗണിച്ചിരുന്നത് ആസിഫ് അലിയെയായിരുന്നുവത്രേ. ഫഹദ് ഫാസില്‍, ജയസൂര്യ, പത്മപ്രിയ തുടങ്ങിയവരായിരുന്നു ചിത്രത്തിലെ പ്രധാന താരങ്ങള്‍.

ദുല്‍ഖര്‍ സല്‍മാന്റെ കാര്യമോ?

മമ്മൂട്ടിയുടെ പാത പിന്തുടര്‍ന്നാണ് ദുല്‍ഖര്‍ സല്‍മാന്‍ സിനിമയില്‍ തുടക്കം കുറിച്ചത്. പിതാവിന്റെ പേരിലല്ല സ്വന്തമായ ഇടംനേടിയെടുത്താണ് നിലനില്‍ക്കേണ്ടതെന്ന നിലപാടിലായിരുന്നു മമ്മൂട്ടി. അതേ വഴി തന്നെയാണ് ദുല്‍ഖര്‍ സ്വീകരിച്ചത്. ഋതുവിലേക്ക് താരത്തെ ക്ഷണിച്ചിരുന്നുവത്രേ. സാമ്രാജ്യം സണ്‍ ഓഫ് അലക്‌സാണ്ടര്‍ എന്ന സിനിമയിലും ദുല്‍ഖറിനെ കാസ്റ്റ് ചെയ്തിരുന്നുവത്രേ. താരപുത്രന്‍ ഈ സിനിമകള്‍ വേണ്ടെന്ന് വെച്ചതിന് പിന്നിലെ കാരണം അഞ്ജാതമാണ്.

ജയസൂര്യ വേണ്ടെന്ന് വെച്ച സിനിമ

സുരാജ് വെഞ്ഞാറമൂടിന്റെ സിനിമാജീവിതത്തിലെ സുപ്രധാന സിനിമയായ പേരറിയാത്തവര്‍ ജയസൂര്യ വേണ്ടെന്ന് വെച്ച സിനിമയായിരുന്നുവത്രേ. ഡോക്ടര്‍ ബിജു സംവിധാനം ചെയ്ത പേരറിയാത്തവരെക്കുറിച്ചാണ് പറഞ്ഞുവന്നത്. ഈ ചിത്രത്തിലൂടെയാണ് താരത്തിന് മികച്ച നടനുള്ള ദേശീയ പുരസ്‌കാരം ലഭിച്ചത്.

പൃഥ്വിയും നോ പറഞ്ഞു

സിനിമാകുടുംബത്തില്‍ നിന്നുമാണ് പൃഥ്വിരാജ് എത്തിയത്. ചേട്ടന് പിന്നാലെയെത്തിയ താരത്തിന് തുടക്കം മുതല്‍ത്തന്നെ ശക്തമായ പിന്തുണയായിരുന്നു ലഭിച്ചത്. ക്യാമറയ്ക്ക് മുന്നില്‍ നിന്ന് അഭിനയിക്കുമ്പോഴും സംവിധാനമെന്ന മോഹവും സ്വന്തമായി പ്രൊഡക്ഷന്‍ കമ്പനി എന്ന ലക്ഷ്യവുമൊക്കെ ഈ താരപുത്പനുണ്ടായിരുന്നു. വര്‍ഷങ്ങള്‍ക്ക് ശേഷം ഈ രണ്ട് ലക്ഷ്യവും പൂര്‍ത്തീകരിച്ചിരിക്കുകയാണ് അദ്ദേഹം. സംവിദാന സംരഭമായ ലൂസിഫര്‍ വിഷു റിലീസായെത്തുകയാണ്. സിനിമയിലായാലും ജീവിതത്തിലായാലും സ്വന്തം നിലപാടുമായി മുന്നേറുന്ന താരം ചില സിനിമകളോട് നോ പറഞ്ഞിരുന്നു.

തിരക്ക് വിനയായി മാറി?

സിനിമാജീവിതത്തിലെ തിരക്കാണ് പൃഥ്വിരാജിന് വിനയായി മാറിയതെന്നുള്ള കാരണമാണ് പലരും പറഞ്ഞത്. മല്ലുസിംഗില്‍ ഉണ്ണി മുകുന്ദന്‍ അവതരിപ്പിച്ച വേഷത്തിലേക്ക് ആദ്യം പരിഗണിച്ചിരുന്നത് പൃഥ്വിയെ ആയിരുന്നുവത്രേ. കമല്‍ സംവിധാനം ചെയ്ത ആമിയില്‍ കൃഷ്ണനായി പൃഥ്വി എത്തിയേക്കുമെന്നായിരുന്നു തുടക്കത്തിലെ റിപ്പോര്‍ട്ടുകള്‍. മറ്റൊരു സിനിമയുമായി ബന്ധപ്പെട്ട തിരക്കിലായതിനാല്‍ താരം ആമിയില്‍ നിന്നും പിന്‍മാറുകയായിരുന്നു ടൊവിനോയായിരുന്നു ആ വേഷം സ്വീകരിച്ചത്. ഡയമണ്ട് നെക്ലേസ് , ബോളിവുഡ് ചിത്രമായ ഹാപ്പി ന്യൂ ഇയര്‍ ഈ സിനിമകളോടും പൃഥ്വിരാജ് നോ പറഞ്ഞതാണത്രേ.

ഫഹദ് ഫാസില്‍ നിരസിച്ച ചിത്രങ്ങള്‍

കൈയ്യെത്തും ദൂരത്തിലൂടെ സിനിമയില്‍ തുടക്കം കുറിച്ചതാണ് ഫഹദ് ഫാസില്‍. ഫാസിലായിരുന്നു മകന്റെ അരങ്ങേറ്റ ചിത്രമൊരുക്കിയത്. വിചാരിച്ചത്ര വിജയിക്കാതെ പോയ സിനിമയെത്തുടര്‍ന്ന് താരപുത്രന് കടുത്ത വിമര്‍ശനങ്ങളും നേരിടേണ്ടി വന്നിരുന്നു. ചെറിയൊരു ഇടവേളയ്ക്ക് ശേഷമാണ് ഫഹദ് വീണ്ടുമെത്തിയത്. ആ വരവിലാവട്ടെ ഏത് കഥാപാത്രമായാലും അവതരിപ്പിക്കാന്‍ കെല്‍പ്പുള്ള അഭിനേതാവാണ് താനെന്ന് താരം തെളിയിക്കുകയും ചെയ്തു.

മൂന്ന് സിനിമകള്‍

സപ്തമശ്രീ തസ്‌കര, ഇവിടെ, ഡബിള്‍ ബാരല്‍ ഈ സിനിമകള്‍ ഫഹദ് ഫാസില്‍ വേണ്ടെന്ന് വെച്ചതാണത്രേ. എന്നാല്‍ അതിന് പിന്നിലെ കാരണത്തെക്കുറിച്ചുള്ള വിവരങ്ങള്‍ ലഭ്യമല്ല. തിരക്കുകളോ കഥയിലെ താല്‍പര്യമില്ലായ്മയോ ഒക്കെയാവാം താരത്തിന്റെ തീരുമാനത്തിന് പിന്നില്‍. ഇന്നിപ്പോള്‍ മലയാളത്തിലെ മുന്‍നിര താരങ്ങളിലൊരാള്‍ തന്നെയാണ് ഫഹദെന്ന് നിസംശയം പറയാം.

കുഞ്ചാക്കോ ബോബന്‍ വേണ്ടെന്ന് വെച്ച ചിത്രങ്ങള്‍

അനിയത്തിപ്രാവിലൂടെയാണ് ഉദയ കുടുംബത്തിലെ ഇളംതലമുറക്കാരന്‍ നായകനായി അരങ്ങേറിയത്. പ്രണയനായകനായി വിലസിയ താരത്തിന് മികച്ച സ്വീകാര്യതയും ശക്തമായ ആരാധകപിന്തുണയുമായിരുന്നു ലഭിച്ചത്. വില്ലന്‍ വേഷവും സ്വഭാവിക കഥാപാത്രങ്ങളേയും ഏറ്റെടുത്തതോട് കൂടിയാണ് താരത്തിന് ചോക്ലേറ്റ് ഹീറോ പരിവേഷത്തില്‍ നിന്നും മോചനം ലഭിച്ചത്. എല്ലാതരം വേഷങ്ങളും തന്നില്‍ സുരക്ഷിതമാണെന്ന് തെളിയിക്കുകയായിരുന്നു താരം.

നിരസിച്ച സിനിമകള്‍

ക്ലാസ്‌മേറ്റസ്, അയാളും ഞാനും തമ്മില്‍, കമ്മത്ത് ആന്റ് കമ്മത്ത് തുടങ്ങിയ സിനിമകള്‍ കുഞ്ചാക്കോ ബോബന്‍ വേണ്ടെന്ന് വെച്ചതാണത്രേ. ലാല്‍ ജോസ് സംവിധാനം ചെയ്ത എക്കാലത്തെയും മികച്ച കലാലയ സിനിമകളിലൊന്ന് കൂടിയാണിത്. അയാളും ഞാനും തമ്മില്‍ എന്ന ചിത്രത്തിന്റെ സംവിധായകനും ലാല്‍ ജോസാണ്.