എന്നെ പ്രണയത്തിലാഴ്ത്തിയ സിനിമ! ശാലിനിയും മാധവനും അഭിനയിച്ച ചിത്രത്തെക്കുറിച്ച് സുപ്രിയ മേനോന്‍

പ്രണയത്തിലാഴ്ത്തിയ സിനിമ

സോഷ്യല്‍ മീഡിയയില്‍ സജീവമാണ് സുപ്രിയ മേനോന്‍. സിനിമകളെക്കുറിച്ച് മാത്രമല്ല വ്യക്തി ജീവിതത്തിലെ കാര്യങ്ങളെക്കുറിച്ചുമൊക്കെ സുപ്രിയ പറയാറുണ്ട്. ഇന്‍സ്റ്റഗ്രാമിലൂടെയാണ് താരപത്‌നി വിശേഷങ്ങള്‍ പങ്കുവെക്കാറുള്ളത്. ഇപ്പോഴിതാ അലൈപായുതെ സിനിമയെക്കുറിച്ച് വാചാലയായി എത്തിയിരിക്കുകയാണ് സുപ്രിയ. അലൈപായുതേയിലെ ഗാനരംഗം പങ്കുവെച്ചായിരുന്നു ഇതേക്കുറിച്ച് വ്യക്തമാക്കിയത്. ഞങ്ങള്‍ക്കും പ്രിയപ്പെട്ടതാണ് ഈ സിനിമയെന്ന് വ്യക്തമാക്കി എത്തിയിരിക്കുകയാണ് ആരാധകര്‍.

20 വര്‍ഷം

മണിരത്‌നം സംവിധാനം ചെയ്ത അലൈപായുതെ ഇറങ്ങിയിട്ട് 20 വര്‍ഷം പിന്നിട്ടിരിക്കുകയാണ്. മികച്ച പ്രണയ ചിത്രങ്ങള്‍ എടുക്കുമ്പോള്‍ ആ ലിസ്റ്റില്‍ നിര്‍ബന്ധമായും ഇടം നേടുന്ന സിനിമ കൂടിയാണിത്. എന്നെ പ്രണയത്തിലാഴ്ത്തിയ ചിത്രമെന്നായിരുന്നു സുപ്രിയ അലൈപായുതേയെക്കുറിച്ച് കുറിച്ചത്. ഈ ഇതിഹാസ പ്രണയകഥ എത്തിയിട്ട് 20 വര്‍ഷമായെന്ന് ഇപ്പോഴും വിശ്വസിക്കാനാവുന്നില്ല. ആ മാസ്റ്റര്‍പീസ് ചിത്രം കണ്ടതിന് ശേഷം പ്രണയമെന്ന ആശയവുമായി തികച്ചും പ്രണയത്തിലായ ഒരാളാണ് താനെന്നായിരുന്നു സുപ്രിയ പറഞ്ഞത്.

മാധവന്‍ പറഞ്ഞത്

അലൈപായുതേ അനുഭവങ്ങളെക്കുറിച്ച് തുറന്നുപറഞ്ഞ് അടുത്തിടെ മാധവനും എത്തിയിരുന്നു. ട്വിറ്ററിലൂടെയായിരുന്നു അദ്ദേഹം ഇതേക്കുറിച്ച് വ്യക്തമാക്കിയത്. കാതല്‍ സടുഗുടു എന്ന ഗാനത്തില്‍ അഭിനയിക്കുന്നതിനിടയിലെ പ്രയാസങ്ങളെക്കുറിച്ചാണ് താരം പറഞ്ഞത്. ആ ഗാനത്തിനിടയില്‍ ചില സീനുകള്‍ റിവേഴ്‌സായാണ് കാണിച്ചത്. അതിനായി ചില വരികള്‍ പാടിക്കൊണ്ടാണ് അഭിനയിക്കേണ്ടി വന്നത്. ഇതേക്കുറിച്ച് ഓര്‍ക്കുമ്പോള്‍ ഇന്നും ഒരുതരം പിരിമുറുക്കം അനുഭവപ്പെടാറുണ്ടെന്നും മാധവന്‍ പറഞ്ഞിരുന്നു. മാധവന്റെ ആദ്യ സിനിമ കൂടിയായിരുന്നു ഇത്.

പൃഥ്വിരാജിനെ കാത്തിരിക്കുന്നു

ആടുജീവിതത്തിന്റെ ചിത്രീകരണത്തിനായി ജോര്‍ദാനിലേക്ക് പോയിരിക്കുകയാണ് പൃഥ്വിരാജ്. ബ്ലസി സംവിധാനം ചെയ്യുന്ന സിനിമയുടെ 9 ദിവസത്തെ ചിത്രീകരണമാണ് അവിടെ വെച്ച് നടന്നത്. അതിനിടയിലായിരുന്നു ലോക് ഡൗണ്‍ പ്രഖ്യാപിച്ചത്. ഇത്തവണത്തെ വിഷുവിനും പൃഥ്വിരാജ് ഒപ്പമുണ്ടായിരുന്നില്ല. പൃഥ്വി തിരിച്ചുവരുന്നതിനായി കാത്തിരിക്കുകയാണെന്നും എന്നിട്ട് ആഘോഷിക്കാമെന്നുമായിരുന്നു സുപ്രിയ പറഞ്ഞത്.