സ്വന്തം അച്ഛനെ പോലെയായിരുന്നു സുരേഷ് ​ഗോപിക്ക്; തിലകൻ-സുരേഷ് ​ഗോപി ബന്ധത്തെക്കുറിച്ച് മകൻ

സുരേഷ് ​ഗോപിയുടെ വൻതിരിച്ചു വരവിനായി പ്രേക്ഷകർ കാത്തിരുന്നു. ഇപ്പോൾ സിനിമകളിൽ വീണ്ടും സജീവമാവുകയാണ് സുരേഷ് ​ഗോപി. കാവൽ, പാപ്പൻ, മേം ഹൂ മൂസ തുടങ്ങിയവ ആണ് അടുത്തിടെ പുറത്തിറങ്ങിയ സുരേഷ് ​ഗോപി സിനിമകൾ. സിനിമാ ലോകത്തെ മിക്കവരും സുരേഷ് ​ഗോപിയെക്കുറിച്ച് വാചാലരാവാറുണ്ട്.

ഇപ്പോഴിതാ അന്തരിച്ച തിലകന്റെ മകൻ നടൻ ഷോബി തിലകൻ സുരേഷ് ​ഗോപിയെക്കുറിച്ച് പറഞ്ഞ വാക്കുകളാണ് ശ്രദ്ധ നേടുന്നത്. സ്വന്തം അച്ഛനെ പോലെയാണ് സുരേഷ് ​ഗോപി തിലകനെ കണ്ടിരുന്നതെന്ന് ഷോബി തിലകൻ പറയുന്നു. സീ മലയാളവുമായുള്ള അഭിമുഖത്തിൽ സംസാരിക്കുകയായിരുന്നു അദ്ദേഹം.

'സുരേഷ് ​ഗോപി എന്ന വ്യക്തിക്ക് അച്ഛൻ പുള്ളിയുടെ അച്ഛനെ പോലെ ആയിരുന്നു. അവർ തമ്മിലുള്ള ബന്ധം ഭയങ്കര ബന്ധം ആണ്. എനിക്ക് പണ്ട് തൊട്ടേ അറിയാം. വർഷങ്ങൾക്ക് മുമ്പ് അച്ഛൻ കാർ ആക്സിഡന്റ് പറ്റി എറണാകുളം സിറ്റി ഹോസ്പിറ്റലിൽ കിടക്കുമ്പോൾ ആണ് ഞാൻ ആദ്യമായി സുരേഷ് ​ഗോപിയെ കാണുന്നത്. ഭയങ്കര സ്നേഹത്തോടെ ആണ് പെരുമാറിയത്'

'ഈ അടുത്ത് ഞാനഭിനയിച്ച ഒരു പടത്തിന്റെ ഫസ്റ്റ് ലുക്ക് പോസ്റ്റർ റിലീസ് ചെയ്യാൻ വേണ്ടി അദ്ദേഹത്തെ വിളിച്ചു. അപ്പോൾ പുള്ളിയുടെ പടത്തിന്റെ പ്രൊമോഷൻ നടന്ന് കൊണ്ടിരിക്കുകയാണ്. എങ്കിലും തിലകൻ ചേട്ടന്റെ മോൻ പറഞ്ഞാൽ എനിക്ക് ചെയ്യാതിരിക്കാൻ പറ്റില്ലെന്ന് പറഞ്ഞ് അദ്ദേഹം ചെയ്ത് തന്നു, ഷോബി തിലകൻ പറഞ്ഞു'

സിനിമാ രം​ഗത്തെ മിക്കവരുമായും തർക്കത്തിലായിരുന്നു തിലകൻ. ഏറെ നാൾ സിനിമാ രം​ഗത്ത് ഇദ്ദേഹത്തിന് വിലക്കും നേരിടേണ്ടി വന്നിരുന്നു. സിനിമാ സംഘടനകൾ‌ ഒന്നടങ്കം തിലകനെതിരെ തിരിഞ്ഞ സമയവും ഉണ്ടായിരുന്നു.

നേരത്തെ തിലകന്റെ മകൻ ഷമ്മി തിലകനും സുരേഷ് ​ഗോപിയെക്കുറിച്ച് സംസാരിച്ചിരുന്നു. ചെറിയ കാര്യങ്ങൾക്ക് പോലും വാക്കിന് വില നൽകുന്ന നടനാണ് സുരേഷ് ​ഗോപിയെന്ന് ഷമ്മി തിലകൻ നേരത്തെ വ്യക്തമാക്കിയിരുന്നു.അതാണ് അദ്ദേഹത്തെ സൂപ്പർ സ്റ്റാർ ആക്കുന്നതെന്നും ഷമ്മി തിലകൻ പറഞ്ഞു.

സിനിമാ രം​ഗത്തുള്ള നിരവധി പേർ സുരേഷ് ​ഗോപിയുടെ നന്മയെ പറ്റി നേരത്തെയും സംസാരിച്ചിട്ടുണ്ട്. നിരവധി ചാരിറ്റി പ്രവർത്തനങ്ങളും സുരേഷ് ​ഗോപി ചെയ്യാറുണ്ട്. സിനിമകളിൽ വീണ്ടും സജീവമാവുന്ന സുരേഷ് ​ഗോപിയെ പഴയ മാസ് ഹീറോയായി ഇനിയും കാണാനുള്ള കാത്തിരിപ്പിലാണ് ആരാധകർ. നടന്റെ ഒരുപിടി സിനിമകൾ അണിയറയിൽ നടന്ന് കൊണ്ടിരിക്കുകയാണ്.