'40 വർഷം മുമ്പ് മോഹൻലാൽ ചെയ്തത് പ്രണവിലൂടെ ആവർത്തിക്കപ്പെട്ടു'; ഹൃദയം കണ്ട് ത്രില്ലടിച്ചുവെന്ന് ബാലചന്ദ്രമേനോൻ

ജ്വലിച്ച് നിന്ന കാലഘട്ടത്തിൽ കുടുംബ പ്രേക്ഷകരെ തീയേറ്ററിന് മുന്നിൽ കിലോമീറ്റർ ദൂരം ക്യൂ നിർത്താൻ കഴിവുള്ള ആളായിരുന്നു ബാലചന്ദ്രമേനോൻ. അവസാനം ബാലചന്ദ്രമേനോൻ അഭിനയിച്ചത് വൺ എന്ന സിനിമയിലാണ്. ഇപ്പോൾ പ്രണവ് മോഹൻലാൽ നായകനായ ഹൃദയം സിനിമ കണ്ടശേഷം അഭിനന്ദനങ്ങൾ പങ്കുവെച്ച് എത്തിയിരിക്കുകയാണ് ബാലചന്ദ്രമേനോൻ. ഒപ്പം പ്രണവിനൊപ്പമുള്ള പഴയകാല ചിത്രങ്ങളും ബാലചന്ദ്രമേനോൻ പങ്കുവെച്ചിട്ടുണ്ട്. ഹൃദയം കണ്ടപ്പോൾ നാൽപ്പത് വർഷം മുമ്പ് തന്റെ സിനിമയായ കേൾക്കാത്ത ശബ്ദത്തിൽ അഭിനയിച്ച മോഹൻലാലിനെയാണ് ഓർമ വന്നത് എന്നാണ് ബാലചന്ദ്രമേനോൻ സോഷ്യൽമീഡിയയിൽ പങ്കുവെച്ച വീഡിയോയിൽ പറയുന്നത്. 1982ൽ താൻ സംവിധാനം ചെയ്ത് മോഹൻലാൽ പ്രതിനായകനായി അഭിനയിച്ച കേൾക്കാത്ത ശബ്ദം എന്ന ചിത്രത്തിലെ ചില രംഗങ്ങൾ ഹൃദയം കണ്ടപ്പോൾ തന്റെ ഓർമ്മയിൽ എത്തിയതായും അതുകണ്ട് ത്രില്ലടിച്ച് പോയെന്നും ബാലചന്ദ്ര മേനോൻ പറഞ്ഞു.

ചിത്രത്തിൽ നായികമാരെ ആകർഷിക്കുന്നതിനായി മോഹൻലാലിന്റെ കഥാപാത്രത്തെ കൊണ്ട് താൻ ചെയ്യിച്ച ചില ടെക്നിക്കുകൾ ഹൃദയത്തിൽ കാണാൻ സാധിച്ചുവെന്ന് അദ്ദേഹം പറഞ്ഞു. 40 വർഷത്തിന് ശേഷവും തന്റെ ചിന്തകൾക്ക് പ്രസക്തിയുള്ളതായി കണ്ടതിൽ സന്തോഷം തോന്നിയതായും ബാലചന്ദ്ര മേനോൻ കൂട്ടിച്ചേർത്തു. ഹൃദയം സിനിമ വളരെ നല്ല അനുഭവമായിരുന്നുവെന്നും പ്രണവ് വളർന്ന് വരുന്ന നടനാണെന്നും ബാലചന്ദ്ര മേനോൻ കൂട്ടിച്ചേർത്തു. ബോക്സ് ഓഫീസിൽ വിജയം നേടിയ ഹൃദയം ഒടിടി റിലീസിന് ശേഷവും തിയേറ്ററുകളിൽ തുടരുന്നുണ്ട്. ആഗോള ബോക്സ് ഓഫീസിൽ 50 കോടി ക്ലബ്ബിൽ ഇടംപിടിച്ചിരുന്ന ചിത്രത്തിൻറെ ഒടിടി റിലീസ് ഫെബ്രുവരി 18ന് ഡിസ്നി പ്ലസ് ഹോട്ട്സ്റ്റാറിലൂടെ ആയിരുന്നു. ജനുവരി 21നായിരുന്നു ചിത്രത്തിൻറെ തിയേറ്റർ റിലീസ്.

Recommended Video

ഒരു ഗുണ്ട ആയ കഥ | Saiju Kurup Exclusive Interview | FilmiBeat Malayalam

ജേക്കബിൻറെ സ്വർഗ്ഗരാജ്യം പുറത്തിറങ്ങി ആറ് വർഷത്തിനിപ്പുറമാണ് വിനീത് ശ്രീനിവാസൻറെ സംവിധാനത്തിൽ മറ്റൊരു ചിത്രം പുറത്തെത്തുന്നത്. പ്രണവ് നായകനാവുന്ന മൂന്നാമത്തെ ചിത്രവുമാണിത്. കൊവിഡ് മൂന്നാം തരംഗത്തിൻറെ പശ്ചാത്തലത്തിൽ പല പ്രധാന റിലീസുകളും മാറ്റിയപ്പോൾ പ്രഖ്യാപിച്ച റിലീസ് തീയതിയിൽ തന്നെ ചിത്രം തിയേറ്ററുകളിൽ എത്തിക്കാനായിരുന്നു നിർമ്മാതാവ് വിശാഖ് സുബ്രഹ്‍മണ്യത്തിൻറെ തീരുമാനം. പ്രണവിൻറെ ആദ്യ 50 കോടി ചിത്രവുമാണിത്. ഫെബ്രുവരി ആദ്യവാരം തന്നെ ഹൃദയം പ്രണവിൻറെ കരിയറിൽ ഏറ്റവുമധികം കളക്ട് ചെയ്യപ്പെട്ട ചിത്രമായി മാറിയിരുന്നു. പ്രണവ് കൈയടി നേടിയ ചിത്രത്തിൽ രണ്ട് നായികമാരാണ് ഉള്ളത്. ദർശന രാജേന്ദ്രനും കല്യാണി പ്രിയദർശനും. അരുൺ നീലകണ്ഠൻ എന്നാണ് പ്രണവ് അവതരിപ്പിച്ചിരിക്കുന്ന നായക കഥാപാത്രത്തിൻറെ പേര്.