ഐശ്വര്യ ലക്ഷ്മിക്ക് സൈമയുടെ പുരസ്കാരം; വേദിയിൽ വെച്ച് ടൊവിനോയുടെ ആശംസ

മലയാളത്തിൽ ഇന്ന് ഏറ്റവും താരമൂല്യമുള്ള നായികമാരിൽ ഒരാളാണ് ഐശ്വര്യ ലക്ഷ്മി. നിരവധി സിനിമകളിൽ അഭിനയ മികവ് തെളിയിച്ച ഐശ്വര്യ ഇന്ന് മലയാളത്തിനപ്പുറം തെന്നിന്ത്യ ആകെ അറിയപ്പെടുന്ന നടിയാണ്. നടിയുടെ ഏറ്റവും പുതിയ സിനിമയായ പൊന്നിയിൻ സെൽവത്തിലൂടെയാണ് ഈ ഖ്യാതി ലഭിച്ചിരിക്കുന്നത്. മണിരത്നം സിനിമയിലെ പ്രധാന കഥാപാത്രങ്ങളിലൊന്നായ പൂങ്കുഴലിയെ ആണ് ഐശ്വര്യ അവതരിപ്പിച്ചിരിക്കുന്നത്.

നോവലിലൂടെ തമിഴ്നാട്ടിൽ ഏറെ ആരാധകരുള്ള പൂങ്കുഴലിയെ ദൃശ്യാവഷ്കരിച്ചപ്പോൾ ഐശ്വര്യ മികച്ച രീതിയിൽ ആ കഥാപാത്രത്തെ അവതരിപ്പിച്ചു എന്നാണ് പ്രേക്ഷകർ പറയുന്നത്. കഥാപാത്രത്തിന് വേണ്ട വശ്യതയും പകത്വതയും നിഷ്കളങ്കതയും എല്ലാം ഐശ്വര്യക്ക് സ്ക്രീനിൽ എത്തിക്കാനായെന്നാണ് പ്രേക്ഷകർ അഭിപ്രായപ്പെടുന്നത്.

പൊന്നിയിൻ സെൽവന് പിന്നാലെ കുമാരി എന്ന സിനിമയാണ് നടിയുടെ പുറത്തിറങ്ങാനിരിക്കുന്ന മലയാള സിനിമ. പൃഥിരാജ് പ്രൊഡക്ഷൻസ് നിർമ്മിക്കുന്ന സിനിമയിൽ ടൈറ്റിൽ കഥാപാത്രത്തെയാണ് ഐശ്വര്യ അവതരിപ്പിക്കുന്നത്. അർബൻ കഥാപാത്രങ്ങളിൽ കൂടുതൽ കണ്ട ഐശ്വര്യ മലയാളത്തിൽ ഇതുവരെ ചെയ്തിട്ടില്ലാത്ത തരത്തിലുള്ള കഥാപാത്രമാണ് സിനിമയിലെന്നാണ് ടീസർ നൽകുന്ന സൂചന.

അടുത്തിടെയാണ് നടിക്ക് കാണെക്കാണെ എന്ന സിനിമയിലൂടെ മലയാളത്തിലെ മികച്ച നടിക്കുള്ള സൈമ പുരസ്കാരം ലഭിച്ചത്. ഐശ്വര്യ പുരസ്കാരം വാങ്ങിക്കുന്ന വീഡിയോ ആണ് സൈമ ഇപ്പോൾ പുറത്തു വിട്ടിരിക്കുന്നത്. തുടർച്ചയായി തന്നെ പിന്തുണയ്ക്കുന്ന സെെമയ്ക്ക് ഐശ്വര്യ നന്ദി പറഞ്ഞു.

ഇത് മൂന്നാം തവണയാണ് സൈമ എനിക്ക് പുരസ്കാരം നൽകുന്നത്. എന്റെ ഹൃദയത്തോട് ചേർത്തു നിർത്തുന്ന അം​ഗീകാരമാണിത്. കാണെക്കാണെയുടെ സംവിധായകൻ മനു അശോകനോടും കാണെക്കാണെയുടെ മുഴുവൻ ക്രൂവിനോടും നന്ദി പറയുന്നു. പ്രേക്ഷകരെന്ന നിലയിൽ എല്ലാവരും എനിക്ക് ഒരു ചെറിയ അപേക്ഷയുണ്ട്. ഞങ്ങളുടെ സിനിമകളെ പിന്തുണയ്ക്കുന്നത് തുടരുക. തിയറ്ററുകളിൽ പോയി സിനിമ കാണുക. ഞങ്ങളെ സ്നേഹിക്കുന്നത് തുടരുക, ഐശ്വര്യ പുരസ്കാരം വാങ്ങിയ ശേഷം പറഞ്ഞതിങ്ങനെ.

ഇതിനിടെ നടൻ ടൊവിനോ തോമസിനെയും അവതാരകർ വേദിയിലേക്ക് ക്ഷണിച്ചു. ഐശ്വര്യ ലക്ഷ്മിയുടെ മികച്ച ഓൺ സ്ക്രീൻ പെയർ ആയ ടൊവിനോ തോമസ് തന്നെയായിരുന്നു കാണെക്കാണെയിലും നായകൻ. പുരസ്കാരം ഏറ്റുവാങ്ങിയ ഐശ്വര്യയെ നടൻ അഭിനന്ദിച്ചു.

ഞങ്ങൾ ഒരുമിച്ച് അഭിനയിച്ച സിനിമയ്ക്കാണ് പുരസ്കാരം ലഭിച്ചിരിക്കുന്നതെന്ന് ഇരട്ടി മധുരം. ഇനിയും ഇതുപോലെ ഒരുപാട് അവാർഡുകൾ കിട്ടട്ടെ. തെന്നിന്ത്യൻ താര സുന്ദരിയായി വളർന്ന് വലുതായി പടർന്നു പന്തലിക്കട്ടെ, ടൊവിനോ പറഞ്ഞു. ഇതിനിടെ വേദിയിൽ വെച്ച് ഐശ്വര്യ ലക്ഷ്മിയെ ഡാൻസ് ചെയ്യിക്കണമെന്ന് ടൊവിനോയോട് അവതാരകരായ ആദിലും പേളി മാണിയും പറഞ്ഞു.

എന്നാൽ തനിക്ക് സ്റ്റേജിൽ ഡാൻസ് ചെയ്യാൻ മടിയാണെന്ന് പറഞ്ഞ് ടൊവിനോ ഇതിൽ നിന്നും ഒഴിഞ്ഞു മാറി. മായാനദി എന്ന സിനിമയിലാണ് ടൊവിനോയും ഐശ്വര്യ ലക്ഷ്മിയും ആദ്യമായി ഒരുമിച്ച് അഭിനയിക്കുന്നത്. ചിത്രത്തിലെ ഇരുവരുടെയും പ്രകടനം ഏറെ ശ്രദ്ധിക്കപ്പെട്ടിരുന്നു.