ജീവിതത്തിലും നിങ്ങള്‍ തന്നെ നായകന്‍! ചാലഞ്ച് ഏറ്റെടുത്ത ടൊവിനോ തോമസിന് കൈയ്യടി! ഇതും വിജയിക്കും!

മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന നല്‍കുന്നതുമായി ബന്ധപ്പെട്ട പുതിയ ചാലഞ്ച് ഏറ്റെടുത്ത് രംഗത്തെത്തിയിരിക്കുകയാണ് ടൊവിനോ തോമസ്. സംവിധായകനായ ആഷിഖ് അബുവായിരുന്നു താരത്തെ വെല്ലുവിളിച്ചത്. താന്‍ ഈ ചാലഞ്ച് സ്വീകരിച്ചുവെന്നും ഉണ്ണി മുകുന്ദന്‍, നീരജ് മാധവ്, ബേസില്‍ ജോസഫ്, രമേഷ് പിഷാരടി, സംയുക്ത മേനോന്‍, കൈലാസ് മേനോന്‍ തുടങ്ങിയവരെ വെല്ലുവിളിക്കുന്നുവെന്നുമായിരുന്നു താരം കുറിച്ചത്. ദുരിതാശ്വാസ നിധിയിലേക്ക് സംഭാവന നല്‍കരുതെന്ന തരത്തിലുള്ള കുപ്രചാരണങ്ങള്‍ അരങ്ങേറുന്നതിനിടയിലാണ് സോഷ്യല്‍ മീഡിയയില്‍ പുതിയ ചാലഞ്ച് തുടങ്ങിയത്.

കഴിഞ്ഞ വര്‍ഷം പ്രളയകാലത്ത് ലഭിച്ച തുക ദുരുപയോഗം ചെയ്തിരുന്നുവെന്ന തരത്തിലുള്ള പ്രചാരണങ്ങളായിരുന്നു സോഷ്യല്‍ മീഡിയയില്‍ അരങ്ങേറിയത്. ദുരിതാശ്വാസനിധിയിലെ തുക മറ്റൊരു കാര്യത്തിനും വിനിയോഗിച്ചിട്ടില്ലെന്നും വിവരാകാശപ്രകാരം ആര്‍ക്കും ഇതേക്കുറിച്ച് മനസ്സിലാക്കാവുന്നതേയുള്ളൂവെന്നുമായിരുന്നു ബന്ധപ്പെട്ടവര്‍ ഇതേക്കുറിച്ച് പ്രതികരിച്ചത്. ഈ സമയത്താണ് സഹായം ആവശ്യമെന്നും കുപ്രചാരണങ്ങളെ വിശ്വസിക്കരുതെന്നും വ്യക്തമാക്കി കൂടുതല്‍ പേരെത്തിയിരുന്നു. ഇതിനിടയിലാണ് സിനിമാലോകവും ഈ ചാലഞ്ച് ഏറ്റെടുത്തത്. ടൊവിനോയുടെ നല്ല മനസ്സിന് നന്ദിയെന്നാണ് ആരാധകര്‍ കുറിച്ചിട്ടുള്ളത്.

സിനിമയില്‍ മാത്രമല്ല ജീവിതത്തിലും താരമാണ് താനെന്ന് ടൊവിനോ തോമസ് തെളിയിച്ചുകൊണ്ടിരിക്കുകയാണെന്നാണ് ആരാധകര്‍ പറയുന്നത്. സോഷ്യല്‍ മീഡിയയിലൂടെ ശക്തമായ പിന്തുണയാണ് താരത്തിന് ലഭിച്ചുകൊണ്ടിരിക്കുന്നത്. തിരശ്ശീലയ്ക്ക് പുറമേ ജീവിതത്തിലും നായകനായി മാറിയിരിക്കുകയാണ് തങ്ങളുടെ പ്രിയതാരമെന്നാണ് ആരാധകരുടെ അവകാശവാദം. മറ്റുള്ളവര്‍ക്ക് മാതൃകയേകുന്ന തരത്തിലുള്ള പ്രവര്‍ത്തനമാണ് ഇതെന്നും ഇനി ഈ ചാലഞ്ച് വന്‍വിജയകരമായി മാറിയേക്കുമെന്നുള്ള പ്രത്യാശയും അവര്‍ പങ്കുവെച്ചിരുന്നു.

ഇച്ചായനോടുള്ള വീണ്ടും കൂടുകയാണെന്നുള്ള കമന്റുകളും പോസ്റ്റിന് കീഴിലുണ്ട്. പ്രളയബാധിതരെ സഹായിക്കുന്നതിനായി നേരിട്ട് ക്യാംപുകളിലേക്ക് താരം എത്തിയിരുന്നു. കഴിഞ്ഞ തവണത്തെപ്പോലെ ഇത്തവണയും താരം രക്ഷാപ്രവര്‍ത്തനങ്ങളില്‍ സജീവമായിരുന്നു. കഴിഞ്ഞ തവണ കടുത്ത വിമര്‍ശനം നേരിടേണ്ടി വന്നതിനാല്‍ ഇത്തവണ പോസ്റ്റിടാന്‍ ഭയമായിരുന്നുവെന്ന് താരം കുറിച്ചിരുന്നു. സിനിമയുടെ പ്രമോഷന് വേണ്ടിയാണ് താരം ദുരിതാശ്വാസ പ്രവര്‍ത്തനങ്ങളുമായി എത്തിയതെന്നായിരുന്നു കഴിഞ്ഞ തവണത്തെ വിമര്‍ശനം.

സാമൂഹ്യ പ്രതിബദ്ധത ചോദ്യചിഹ്നമായി മാറുന്ന കാലമാണിത്. എന്നാല്‍ പല താരങ്ങളും ങ്ങളും അത് പ്രാവര്‍ത്തികമായിക്കൊണ്ടിരിക്കുകയാണ് ഇപ്പോള്‍. മികച്ച യുവതാരം എന്നതിനും അപ്പുറത്ത് നല്ലൊരു മനുഷ്യസ്‌നേഹിയും കൂടിയാണ് താനെന്ന് തെളിയിച്ചുകൊണ്ടിരിക്കുകയാണ് ടൊവിനോയെന്ന് ആരാധകര്‍ പറയുന്നു. മലയാള സിനിമയില്‍ ഇത് പോലെ വേറൊരു സെലിബ്രിറ്റിയെ കാണിച്ച് തരാന്‍ പറ്റുമോയെന്ന തരത്തിലുള്ള ചോദ്യങ്ങളും ഇതിനിടയില്‍ ഉയര്‍ന്നുവന്നിട്ടുണ്ട്.

സോഷ്യല്‍ മീഡിയയിലൂടെ വിളിച്ച് പറയുന്നതിനൊപ്പം മുന്നില്‍ നിന്ന് അത് ചെയ്തുകാണിക്കാനുള്ള മനസ്സ് കൂടിയാണ് ടൊവിനോയ്ക്കുള്ളത്. ഇത്തരത്തില്‍ നിങ്ങള്‍ നല്‍കുന്ന മോട്ടിവേഷന്‍ സാധാരണക്കാര്‍ കൃത്യമായി ഉള്‍ക്കൊള്ളുമെന്നും മുന്നില്‍ നിന്നും ചെയ്ത് കാണിക്കാനുള്ള മനസ്സ് എന്നും നിലനിര്‍ത്തണമെന്നും ആരാധകര്‍ കുറിച്ചിട്ടുണ്ട്.