'നിരാശപ്പെടുത്തി... വിവാഹമോചനത്തെ കുറിച്ച് ഇത്രയധികം സംസാരിക്കേണ്ടിയിരുന്നില്ല'; ആരാധകന് വിജയിയുടെ മറുപടി!

​ഗാന​ഗന്ധർവൻ യേശു​​ദാസിന്റെ മകൻ എന്നതിനാൽ തന്നെ പാടി തുടങ്ങിയ കാലം മുതൽ പ്രേക്ഷകർക്ക് ഏറെ പ്രതീക്ഷയുള്ള പ്രതിഭയാണ് വിജയ് യേശുദാസ്. സം​ഗീതം രക്തത്തിൽ അലഞ്ഞിട്ടുള്ളതിനാൽ ഒരിക്കലും വിജയ് നിരാശപ്പെടുത്തിയിട്ടില്ല. മലയാളത്തിലും തമിഴിലും തെലുങ്കിലുമെല്ലാമായി നിരവധി ​ഗാനങ്ങൾ ആലപിച്ചിട്ടുള്ള ​ഗായകൻ തന്റെ സ്വകാര്യ ജീവിതത്തെ കുറിച്ച് അടക്കം പലപ്പോഴായി തുറന്ന് സംസാരിച്ചിട്ടുണ്ട്. അടുത്തിടെയാണ് ഭാര്യ ദർശനയുമായി വേർപിരിഞ്ഞ കാര്യം ഒരു അഭിമുഖത്തിൽ വിജയ് വെളിപ്പെടുത്തിയത്.

2007 ജനുവരി 21നായിരുന്നു വിജയ്‍യുടേയും ദർശനയുടേയും വിവാഹം. ഇരുവർക്കും രണ്ട് മക്കളാണുള്ളത്. വേർപിരിഞ്ഞുവെങ്കിലും മക്കളുടെ ആവശ്യങ്ങൾക്ക് വേണ്ടി ഇരുവരും മാതാപിതാക്കളായി ഒന്നിച്ച് നിൽക്കാറുണ്ട്. ഒരു മാസം മുമ്പ് ഐ ആം വിത്ത് ധന്യ വർമ എന്ന ഷോയിൽ അതിഥിയായി എത്തിയപ്പോഴും സ്വകാര്യ ജീവിതത്തെ കുറിച്ച് മനസ് തുറന്നിരുന്നു.

എന്നാൽ അഭിമുഖത്തിലെ ചില ഭാ​ഗങ്ങൾ വൈറലായപ്പോൾ അഭിമുഖം ഹോസ്റ്റ് ചെയ്ത ധന്യ വർമയെ ചില പ്രേക്ഷകർ വിമർശിച്ചു. ഇത്രത്തോളം കഴിവുള്ള ഒരു പ്രതിഭയെ കയ്യിൽ കിട്ടിയിട്ട് കൂടുതലായും അദ്ദേഹത്തിന്റെ സ്വകാര്യ ജീവിതത്തെ കുറിച്ചും വിവാഹമോചനത്തെ കുറിച്ചും ചോദിച്ചതിനാണ് ധന്യയെ പ്രേക്ഷകരിൽ ചിലർ വിമർശിച്ചത്. അത്തരത്തിൽ ധന്യയെ വിമർശിച്ചവർക്ക് മറുപടി വിജയ് നൽകിയ മറുപടിയാണ് ശ്രദ്ധിക്കപ്പെടുന്നത്.

നിരാശപ്പെടുത്തിയ അഭിമുഖമായിരുന്നു... നിങ്ങൾ അദ്ദേഹത്തിന്റെ വിവാഹ മോചനത്തെക്കുറിച്ച് കൂടുതൽ ചോദിക്കേണ്ടിയിരുന്നില്ല. അദ്ദേഹം അതിനും എത്രയോ മുകളിലാണ് എന്നായിരുന്നു വിമർശിച്ച് വന്ന കമന്റ്. അതിന് വിജയ് നൽകിയ മറുപടി ഇങ്ങനെയായിരുന്നു... എന്റെ കരിയറിനെക്കുറിച്ച് മാത്രം സംസാരിക്കുന്ന ഒരു സാധാരണ അഭിമുഖമായിരുന്നില്ല ഇത്. ജീവിതത്തെക്കുറിച്ചാണ്.

ജീവിതത്തെക്കുറിച്ച് സംസാരിക്കുന്നതിൽ തെറ്റൊന്നുമില്ല. നമ്മളെല്ലാം കഷ്ടതകളിലൂടെ കടന്നുപോകാറുണ്ട്. സംഗീതത്തെയും എന്നെയും സ്‌നേഹിക്കുകയും പിന്തുണക്കുകയും ചെയ്യുന്ന ഒരു ലോകത്തോട് തുറന്ന് സംസാരിക്കുന്നതിൽ തെറ്റില്ല എന്നാണ് വിജയ് മറുപടിയായി കുറിച്ചത്. വിജയ് തന്നെ പ്രേക്ഷകന്റെ അഭിപ്രായത്തിന് മറുപടി നൽകിയത് ധന്യ തന്നെയാണ് സോഷ്യൽമീഡിയയിൽ പങ്കുവെച്ചത്. വിശദീകരണം നൽകിയതിന് ​ഗായകന് ധന്യ നന്ദി അറിയിക്കുകയും ചെയ്തു.

ആ കമൻ്റിന് മറുപടി നൽകിയതിന് നന്ദി വിജയ് യേശുദാസ്. ഞങ്ങളുടെ ചാനലും പ്രത്യേകിച്ച് ഷോയും അതിഥികളായി എത്തുന്നവരുടെ ഇതുവരെയുള്ള വ്യക്തിപരവും പ്രൊഫഷണലും യാത്രയെക്കുറിച്ച് ചോദിച്ചുള്ളതാണ്. ഒരു അതിഥി തൻ്റെ സ്വകാര്യ ജീവിതത്തിലെ കാര്യങ്ങൾ പങ്കുവെക്കാൻ തയ്യാറാണെങ്കിൽ മാത്രമാണ് അതേ കുറിച്ച് ചോദിക്കുന്നതും സംസാരിക്കുന്നതും.

വിജയ് നിങ്ങളുമായുള്ള സംഭാഷണത്തിൽ നിന്ന് ഞാൻ ഒരുപാട് കാര്യങ്ങൾ പഠിച്ചു. ഒരിക്കൽ കൂടി നന്ദി വിജയ് എന്നാണ് ധന്യ വിജയിയുടെ കമന്റിന്റെ സ്ക്രീൻ ഷോട്ട് പങ്കിട്ട് കുറിച്ചത്. വിവാഹ​മോചനത്തെ കുറിച്ച് ധന്യയോട് സംസാരിക്കവെ വിജയ് പറഞ്ഞത് ഇങ്ങനെയാണ്... എല്ലാ തീരുമാനത്തിലും മക്കൾ എന്നേയും മുൻ ഭാര്യ ദർശനയേയും പിന്തുണയ്ക്കുന്നുണ്ട്. എന്റെയും ദർശനയുടെയും ഭാ​ഗത്ത് നിന്നും നോക്കുമ്പോൾ കാര്യങ്ങൾ മികച്ച സാഹചര്യത്തിലൂടെയാണ് പോകുന്നത്.

മാതാപിതാക്കൾ ഇക്കാര്യം മനസിലാക്കുമെന്നും അംഗീകരിക്കുമെന്നും ഒരിക്കലും പ്രതീക്ഷിക്കാനാകില്ല. അതിനൊക്കെ കുറച്ചുകൂടി സമയം ആവശ്യമാണ്. അവർക്കെല്ലാം ഇത് കുറച്ച് വേദനാജനകമായ സാഹചര്യമാണ്. ലൈം ലൈറ്റിൽ നിൽക്കുമ്പോൾ ഇത്തരം കാര്യങ്ങൾ മൂടിവയ്ക്കാൻ ഒരു പരിധിവരെ കഴിയുകയില്ല. ഇനിയും മാതാപിതാക്കളെ വേദനിപ്പിക്കരുത് എന്നാണ് തീരുമാനം. ഞങ്ങളുടെ സാഹചര്യം മക്കൾക്ക് മനസിലാക്കാനുള്ള പ്രായമായിട്ടുണ്ട്.

മകൾ എല്ലാ കാര്യങ്ങളും പക്വതയോടെ മനസിലാക്കുകയും ദർശനയെ പിന്തുണയ്ക്കുകയും ചെയ്യുന്നുണ്ട്. ‌മകൾക്ക് 15 വയസ് ആയിട്ടുണ്ട്. മകന് 9 വയസാണ്. അവൻ ചില കാര്യങ്ങൾ ചോദിക്കുന്നുണ്ട്. അവൻ സാഹചര്യം മനസിലാക്കി വരുന്നതെയുള്ളൂവെന്നുമാണ് വിജയ് പറഞ്ഞത്. വിവാഹമോചനം പ്രഖ്യാപിച്ചശേഷം മലയാളത്തിലെ യുവ നടിമാരുടെ പേരുകളുമായി ​ഗായകന്റെ പേര് ചേർത്ത് നിരന്തരം ​ഗോസിപ്പുകൾ പ്രചരിക്കുന്നുണ്ട്.