നിന്റെ സ്വഭാവം കൊണ്ട് അമ്മയെത്ര വിഷമിച്ച് കാണും; ഇതിലെങ്കിലും ഉറച്ച് നിൽക്കട്ടെ; മറുപടിയുമായി ​ഗോപി സുന്ദർ

സം​ഗീത ലോകത്ത് ഇന്ന് അറിയപ്പെടുന്ന മ്യുസീഷനാണ് ​ഗോപി സുന്ദർ. മലയാളത്തിന് പുറമെ ഇന്ന് തമിഴിലും തെലുങ്കിലും ​​ഗോപി സുന്ദർ സാന്നിധ്യമറിയിക്കുന്നു. മലയാളത്തിൽ ​ഗോപി സുന്ദറൊരുക്കിയ മിക്ക പാട്ടുകളും പശ്ചാത്തല സം​ഗീതവും ജനശ്രദ്ധ നേടി. എന്ന് നിന്റെ മൊയ്തീൻ, ഉയരെ തുടങ്ങിയ സിനിമകളിൽ ​ഗോപി സുന്ദറാെരുക്കിയ പാട്ടുകൾക്ക് വലിയ ജനപ്രീതി ലഭിച്ചു. കരിയറിനപ്പുറത്ത് നിരന്തരം ​​ഗോസിപ്പ് കോളങ്ങളിൽ ഇടം പിടിക്കുന്നയാളുമാണ് ​ഗോപി സുന്ദർ.

വിവാഹ ബന്ധത്തിലെ പ്രശ്നങ്ങൾ, പിന്നീ‌ടുണ്ടായ പ്രണയങ്ങൾ എന്നിവയെല്ലാം ​ഗോപി സുന്ദറിനെ ചർച്ചാ വിഷയമാക്കി, ​ഗായിക അഭയ ഹിരൺമയിയുമായി ദീർഘ നാൾ ലിവിം​ഗദ് ടുഗെദറിലായിരുന്നു ​ഗോപി സുന്ദർ. ഭാര്യയെയും മക്കളെയും ഉപേക്ഷിച്ചവൻ എന്ന കുറ്റപ്പെടുത്തൽ അന്നേ ​ഇദ്ദേഹത്തിന് കേട്ടു.

പിന്നീട് അഭയയുമായുള്ള ബന്ധം അവസാനിപ്പിച്ച ​ഗോപി സുന്ദർ ​ഗായിക അമൃത സുരേഷിനെ ജീവിത പങ്കാളിയാക്കി. ഇതോടെ ​ഗോപി സുന്ദറിനെ സ്ത്രീലമ്പടനായി വിമർശകർ ചിത്രീകരിച്ചു. ​ അമൃതയ്ക്കൊപ്പം പങ്കുവെക്കുന്ന ചിത്രങ്ങൾക്ക് കളിയാക്കലുകളും വരാറുണ്ട്. എന്നാൽ തന്റെ വ്യക്തി ജീവിതത്തിലേക്ക് കൈ കടത്താൻ ആർക്കും അനുവാദമില്ലെന്നാണ് ​ഗോപി സുന്ദർ വ്യക്തമാക്കിയത്.

അടുത്തിടെ സോഷ്യൽ മീഡിയ കമന്റുകളെക്കുറിച്ച് ​ഗോപി സുന്ദർ സംസാരിച്ചിരുന്നു. വെറുതെയിരിക്കുമ്പോൾ ഒരു വിനോദ​ത്തിന് വേണ്ടി കമന്റുകൾ നോക്കാറുണ്ട്. ചില കമന്റുകളൊക്കെ തമാശയാണ്. അതേ ലാഘവത്തോടെ ചിലപ്പോൾ അങ്ങോട്ടും പറയും. ആരെയും വേദനിപ്പിക്കാനല്ല. കൂടി വന്നാൽ ഒരു 15 സെക്കന്റിനപ്പുറത്തേക്ക് മോശം കമന്റുകൾ തന്റെ മനസ്സിൽ നിൽക്കാറില്ലെന്നും ​ഗോപി സുന്ദർ വ്യക്തമാക്കി.

സോഷ്യൽ മീഡിയയിൽ വന്ന ഒരു കമന്റിന് ​ഗോപി സുന്ദർ നൽകിയ മറുപടിയാണിപ്പോൾ ശ്രദ്ധ നേടുന്നത്. അമ്മയ്ക്കൊപ്പമുള്ള ഫോട്ടോയ്ക്ക് താഴെ വന്ന കമന്റിനാണ് ​ഗോപി സുന്ദർ മറുപടി നൽകിയത്. 'പാവം അമ്മ, നിന്റെ സ്വഭാവം കൊണ്ട് എത്ര വിഷമിച്ചിട്ടുണ്ടാവും ആ അമ്മ. ഇതിലെങ്കിലും ഉറച്ച് നിൽക്കട്ടെയെന്ന് പ്രാർത്ഥിക്കാം,' എന്നായിരുന്നു ഒരാളുടെ കമന്റ്. ഇതിന് ​ഗോപി സുന്ദർ മറുപടിയും നൽകി.

'എന്റെ അമ്മ എപ്പോഴും ഹാപ്പിയാണ്. ഞാൻ സന്തോഷമായിരിക്കണമെന്നാണ് അമ്മയ്ക്ക്. മകന്റെ തീരുമാനങ്ങളിൽ അമ്മയ്ക്ക് ഉറപ്പുണ്ട്. നിൽക്കാൻ പറ്റാത്ത സ്ഥലത്ത് ഉറച്ച് നിന്ന് ഉറഞ്ഞ് തുള്ളി മരിക്കാൻ എന്റെ അമ്മ എന്നെ പഠിപ്പിച്ചിട്ടില്ല,' ​ഗോപി സുന്ദർ നൽകിയ മറുപടിയിങ്ങനെ. നേരത്തെയും സമാന കമന്റുകൾക്ക് ​ഗോപി സുന്ദർ മറുപടി നൽകിയിട്ടുണ്ട്.

​ഗോപി സുന്ദറിനെ പോലെ തന്നെ സമാന കുറ്റപ്പെടുത്തലുകൾ അമൃത സുരേഷിന് നേരെയും വരാറുണ്ട്. നടൻ ബാലയുമായുള്ള വിവാഹ ബന്ധം വേർപെടുത്തി വർഷങ്ങൾക്കിപ്പുറമാണ് ​ഗോപി സുന്ദറുമായി അമൃത അടുക്കുന്നത്.

ആദ്യ വിവാഹത്തിലെ മകൾ അമൃതയ്ക്കൊപ്പമാണുള്ളത്. മകളെ കാണാനനുവദിക്കുന്നില്ലെന്ന് ബാല നേരത്തെ പല തവണ ആരോപിച്ചിരുന്നു. അടുത്തിടെ കരൾ രോ​ഗത്തെത്തുടർന്ന് ആശുപത്രിയിലായപ്പോഴാണ് നാളുകൾക്ക് ശേഷം മകളെ കാണാൻ ബാലയ്ക്ക് കഴിഞ്ഞത്.

അമൃതയ്ക്കും സഹോദരി അഭിരാമിക്കുമൊപ്പമെത്തിയ മകൾ ബാലയെ കണ്ട് കുറച്ച് സമയത്തിനുള്ളിൽ പോവുകയും ചെയ്തു. ​ഗോപി സുന്ദറും‌‌‌ അമൃതയുടെ മകളും ഒരുമിച്ചുള്ള ഫോട്ടോകൾക്കും വിമർശനം വരാറുണ്ട്. സ്വന്തം മക്കളെ നോക്കാത്ത വ്യക്തിയാണ് മറ്റൊരാളുടെ മകളെ സ്നേഹിക്കുന്നതൊണ് പലരും ആക്ഷേപിക്കാറ്. അമൃതയ്ക്കും ഇതിന്റെ പേരിൽ വിമർശനങ്ങൾ വരാറുണ്ട്.