എല്ലാവരു‌ടെയും മുന്നിൽ വെച്ച് വഴക്ക് പറയരുതെന്ന് സംവിധായകനോട് പറഞ്ഞു; തിരിച്ച് വരവിൽ ലക്ഷ്മി മേനോൻ

തമിഴകത്ത് ഭാ​ഗ്യനായികയായി അറിയപ്പെട്ട നടിയാണ് ലക്ഷ്മി മേനോൻ. കുംകി, പാണ്ഡ്യനാട് തുടങ്ങിയ സിനിമകളിലൂടെ തമിഴ് പ്രേക്ഷകരു‌ടെ മനം കവർന്ന ലക്ഷ്മി മേനോൻ മലയാളിയാണ്. മലയാളത്തിൽ ചെറിയ വേഷങ്ങൾ ചെയ്ത് തമിഴകത്തേക്ക് ക‌ടന്നതോ‌ടെ ലക്ഷ്മി മേനോന്റെ കരിയർ ​ഗ്രാഫ് മാറി മറിഞ്ഞു. തുടക്ക കാലം മുതൽ ഹിറ്റ് സിനിമകളാണ് ലക്ഷ്മി മേനോന് തമിഴകത്ത് ലഭിച്ചത്. താരമായി മാറിയ ശേഷം മലയാളത്തിൽ അവതാരം എന്ന സിനിമയിൽ അഭിനയിച്ചിട്ടുണ്ട്. ദിലീപ് നായകനായ ചിത്രം 2014 ലാണ് റിലീസ് ചെയ്തത്.

കരിയറിലെ ഏറ്റവും മികച്ച സമയത്ത് നിൽക്കുമ്പോഴാണ് ലക്ഷ്മി മേനോൻ അഭിനയ രം​ഗത്ത് നിന്നും ഇ‌ടവേളയെടുക്കുന്നത്. പഠനവും ഒരേ പോലുള്ള കഥാപാത്രങ്ങൾ വന്നതുമാണ് നടിയെ ഇടവേളയെടുക്കാൻ പ്രേരിപ്പിച്ചത്. നയൻതാര, അമല പോൾ തുടങ്ങിയ താരങ്ങളെ പോലെ തമിഴകത്തെ തിരക്കേറിയ മലയാളി നടിയായി ഏറെക്കാലം ലക്ഷ്മി മേനോൻ തുടരുമെന്നാണ് പ്രേക്ഷകർ കരുതിയത്.

എന്നാൽ ഇ‌ടവേളയെടുക്കാനുള്ള ലക്ഷ്മി മേനോന്റെ തീരുമാനം ആരാധകരെ നിരാശപ്പെടുത്തി. ഇടവേളയ്ക്ക് ശേഷം സിനിമാ രം​ഗത്തേക്ക് തിരിച്ച് വന്നിരിക്കുകയാണ് ലക്ഷ്മി മേനോൻ. പി വാസു സംവിധാനം ചെയ്ത ചന്ദ്രമുഖി 2 എന്ന സിനിമയിലൂടെയാണ് തിരിച്ച് വരവ്. റെഡ്നൂൽ ചാനലിന് നൽകിയ അഭിമുഖത്തിൽ സിനിമയെക്കുറിച്ചുള്ള വിശേഷങ്ങൾ പങ്കുവെക്കുകയാണ് ലക്ഷ്മി മേനോൻ.

സിനിമകളിൽ സജീവമായിരുന്ന സമയത്ത് ചെറിയ പ്രായമായിരുന്നു. അന്ന് കരിയറിൽ പ്ലാനിം​ഗ് ഉണ്ടായിട്ടില്ല. ഇപ്പോഴാണ് നടിയെന്ന നിലയിൽ ​ഗൗരവമായി എടുക്കുന്നത്. തമിഴിൽ സായ് പല്ലവി ചെയ്യുന്ന കഥാപാത്രങ്ങൾ വളരെ ഇഷ്ടമാണ്. മലയാളത്തിൽ നിരവധി ഇഷ്‌ട സിനിമകളുണ്ട്. കഥാപാത്രം ചെറുതാണെങ്കിലും ചലഞ്ചിം​ഗ് ആയിരിക്കും. വളരെ നാച്വറലായിരിക്കും. എനിക്ക് എല്ലാ തരത്തിലുമുള്ള കഥാപാത്രങ്ങൾ ഇഷ്ടമാണെന്ന് ലക്ഷ്മി മേനോൻ വ്യക്തമാക്കി.

ചന്ദ്രമുഖി 2 ചെയ്യാനുള്ള കാരണമെന്തെന്നും ലക്ഷ്മി ചൂണ്ടിക്കാട്ടി. വർഷങ്ങൾക്ക് ശേഷമാണ് ചന്ദ്രമുഖിയുടെ രണ്ടാം ഭാ​ഗം ചെയ്യുന്നത്. അതിൽ എന്തെങ്കിലും പ്രത്യേകതയുണ്ടാകുമെന്ന് കരുതിയാണ് ചന്ദ്രമുഖി ചെയ്യാൻ തീരുമാനിച്ചത്. ലൈക പ്രെഡക്ഷൻ, വലിയ ക്രൂ, ലോറൻസ് മാസ്റ്ററു‌ടെ സാന്നിധ്യം തു‌ടങ്ങിയ പല കാരണങ്ങൾ സിനിമ ചെയ്തതിന് പിന്നിലുണ്ടെന്നും ലക്ഷ്മി മേനോൻ വ്യക്തമാക്കി.

സംവിധായകൻ പി വാസു എനിക്ക് അച്ഛനെ പോലെയാണ്. ഞാൻ കൃത്യ സമയത്ത് വരില്ല. അപ്പോൾ വഴക്ക് പറയും. രാവിലെ തന്നെ വഴക്ക് കേൾക്കും. ഒറ്റയ്ക്ക് വിളിച്ച് ചീത്ത പറയൂ, എല്ലാവരുടെയും മുന്നിൽ വെച്ച് പറയല്ലേ എന്ന് ഞാൻ അദ്ദേഹത്തോ‌ട് പറയും. അദ്ദേഹം ചിരിക്കും. വളരെ നല്ല മനുഷ്യനാണ്.

അദ്ദേഹത്തിന് വളരെ കൃത്യനിഷ്ഠയുണ്ട്. ഈ പ്രായത്തിലും അദ്ദേഹം സമയനിഷ്ഠ പാലിക്കുമ്പോൾ എനിക്ക് മാത്രം മടി കാണിക്കാൻ പറ്റില്ലെന്നും ലക്ഷ്മി മേനോൻ പറയുന്നു. ന‌ടി കങ്കണ റണൗത്തിനൊപ്പമുള്ള അനുഭവങ്ങളും ലക്ഷ്മി മേനോൻ പങ്കുവെച്ചു. വളരെ ഇഷ്‌ടപ്പെട്ട നടിയാണ് നിങ്ങളെന്ന് കങ്കണ മാഡത്തോട് പറഞ്ഞു. അവർ എന്നേക്കാളും ജോളിയായിരുന്നു.

കങ്കണയുടെ എല്ലാ സിനിമയിലും ഓരോ കഥാപാത്രവും വ്യത്യസ്തമാണ്. ഫാഷനിലെ കഥാപാത്രം പോലെയല്ല തലൈവിയിൽ. തനു വെഡ്സ് മനു ‌2 വിൽ രണ്ട് കഥാപാത്രങ്ങൾ ചെയ്തു. രണ്ടും തീർത്തും വ്യത്യസ്തമാണ്. ചന്ദ്രമുഖിയുടെ ഷൂ‌ട്ടിം​ഗിൽ നിന്നും ഞാൻ പഠിച്ചത് കൃത്യനിഷ്ഠയാണ്. എന്നെപ്പോലെയല്ല മറ്റുള്ളവർ. എല്ലാവരും കൃത്യസമയത്ത് വരും. കൃത്യസമയത്ത് ഷൂ‌ട്ടിനെത്തേണ്ടതുണ്ടെന്ന് താൻ മനസിലാക്കിയെന്നും ലക്ഷ്മി മേനോൻ വ്യക്തമാക്കി. ലക്ഷ്മി മേനോന്റെ പുതിയ സിനിമകൾക്കായി കാത്തിരിക്കുകയാണ് ആരാധകർ.