എനിക്ക് ശ്വാസം മുട്ടും, വലിയ ഓഫറായിരുന്നു; ബി​ഗ് ബോസ് അവതാരകൻ ആവാഞ്ഞതിനെക്കുറിച്ച് മമ്മൂട്ടി

ഷോ തുടങ്ങിയ സമയത്ത് ബി​ഗ് ബോസിനും അവതാരകൻ ആയെത്തിയ മോഹൻലാലിനും നേരെ സോഷ്യൽ മീഡിയയിൽ വ്യാപക വിമർശനം ഉയർന്നിരുന്നു. എന്നാൽ തന്ത്രപരമായാണ് ബി​ഗ് ബോസ് ഈ വെല്ലുവിളി അതിജീവിച്ചത്.

ഈ വിമർശകരെക്കൂടി നാലാ സീസണിലെ പ്രേക്ഷകരാക്കി മാറ്റി ബിഗ് ബോസ്. വിമർശകരുടെ ചർച്ചാ വിഷയം ആകാൻ സാധ്യതയുള്ള മത്സരാർത്ഥികളെക്കൂടി ബി​ഗ് ബോസിലേക്ക് എത്തിച്ചു. മൂന്നാം സീസൺ വരെ ബി​ഗ് ബോസിനോട് മുഖം തിരിച്ചവർ നാലാം സീസണിൽ റിയാസ് സലിമിനെ പ്രകീർത്തിക്കാനും ലക്ഷ്മിപ്രിയ ഉൾപ്പെടെയുള്ള മത്സരാർത്ഥികളുടെ നിലപാടിനെ വിമർശിക്കാനും മുന്നിലുണ്ടായിരുന്നു.

ചുരുക്കത്തിൽ അവഗണിക്കാൻ നോക്കിയാലും അതിന് പറ്റാത്ത ഷോ ആണ് ബിഗ് ബോസ്. മലയാളത്തിൽ ഇതുവരെ വന്ന സീസണുകളിൽ ഏറ്റവും മികച്ചത് നാലാം സീസണായിരുന്നു. ഒന്നിനൊന്ന് മികച്ച് നിന്ന മത്സരാർത്ഥികളും സോഷ്യൽ മീഡിയയിൽ വന്ന ചർച്ചകളുമാണ് ഇതിന് കാരണം ആയത്. മോഹൻലാൽ അവതാകരൻ ആയെത്തുന്നതാണ് ഷോയുടെ മറ്റൊരു ഹൈലൈറ്റ്. യഥാർ‌ത്ഥത്തിൽ മോഹൻലാലിന് മുമ്പ് നടൻ മമ്മൂട്ടിയെ ആയിരുന്നു ഷോയുടെ അവതാരകൻ ആയി പരി​ഗണിച്ചിരുന്നത്.

എന്നാൽ മമ്മൂട്ടി ഈ ഓഫർ‌ നിരസിക്കുകയായിരുന്നു. കോടികൾ വാ​ഗ്ദാനം ചെയ്തിട്ടും മമ്മൂട്ടി തയ്യാറായില്ലെന്നാണ് അന്ന് പുറത്ത് വന്ന റിപ്പോർട്ട്. ഇപ്പോഴിതാ ഇതേപറ്റി പ്രതികരിച്ചിരിക്കുകയാണ് മമ്മൂട്ടി. മൂവി മാൻ‌ ബ്രോഡ് കാസ്റ്റുമായുള്ള അഭിമുഖത്തിൽ സംസാരിക്കുകയായിരുന്നു അദ്ദേഹം. ബി​ഗ് ബോസിന്റെ ഓഫർ, കൊക്കകോളയുടെ പരസ്യം എന്നിവ നിരസിച്ചതിന് പിന്നിലെ കാരണം എന്തെന്ന ചോദ്യത്തിന് നടൻ മറുപടി നൽകി.

'പ്രത്യേകിച്ച് തിയറി ഒന്നുമില്ല നമ്മളെക്കൊണ്ട് ആവില്ലെന്ന് വിചാരിച്ചാണ്. നമുക്ക് ശരിയാവില്ല എന്ന് തോന്നിയിട്ടാണ്. വെറുതെ അവസാനം ശ്വാസം മുട്ടും നമ്മൾ. വലിയ ഓഫറായിരുന്നു. അവരോട് ചോദിച്ചാൽ അറിയാം എത്രയാണെന്ന്. ലോകത്ത് ആർക്കും അങ്ങനെ ആലോചിക്കാൻ പറ്റില്ല. ഞാനങ്ങനെ ഒരു പൊട്ടൻ,' മമ്മൂട്ടി തമാശയോടെ പറഞ്ഞു.

സൂപ്പർ താരങ്ങളാണ് ബി​ഗ് ബോസിന്റെ അവതാരകരായി എത്തുന്നത്.
സൽമാൻ ഖാൻ ആണ് ഹിന്ദി ബി​ഗ് ബോസിന്റെ അവതാരകൻ.

തെലുങ്കിൽ നാഗാർജുന അവതാരകൻ ആയെത്തുന്നു. തമിഴിൽ കമൽ ഹാസനാണ് ഷോ നയിക്കുന്നത്. കന്നഡയിൽ നടൻ കിച്ച സുദീപും. കോടികളാണ് ഇവരുടെയെല്ലാം പ്രതിഫലം. 65-70 ലക്ഷം രൂപ വരെയാണ് ഒരു എപ്പിസോഡിന് മോഹൻലാൽ വാങ്ങുന്ന പ്രതിഫലം. സൽമാൻ ഖാനാവട്ടെ 40 കോടിക്ക് മുകളിലാണ് ഒരു എപ്പിസഡിന് കൈപറ്റുന്ന പ്രതിഫലം.