രണ്ടാമതൊരു റിലേഷന്‍ കല്യാണമാണെന്ന് തീരുമാനിച്ചു; ചീത്തപ്പേരുണ്ടാക്കാന്‍ താല്‍പര്യമില്ലായിരുന്നുവെന്ന് നടി യമുന

രണ്ടാമതൊരു വിവാഹത്തിന് പ്രായം ഒരിക്കലും തടസ്സമല്ല. പ്രായം ഒന്നിനും തടസ്സമല്ല. അതൊരു വെറും നമ്പര്‍ മാത്രമാണ്. പിന്നെ എല്ലാത്തിനും മക്കളാണ് പിന്തുണ നല്‍കിയത്. അവരൊക്കെ വളരെയധികം പ്രാക്ടിക്കലായി ചിന്തിക്കുന്നവരാണ്.

എന്റെ ആദ്യ വിവാഹ ജീവിതം വേര്‍പ്പെടുത്തിയതിന് പിന്നാലെ അമ്മ രണ്ടാമതും വിവാഹം കഴിക്കണമെന്ന് മക്കളാണ് പറഞ്ഞിരുന്നത്. അമ്മ ഇനിയൊരു വിവാഹം കഴിക്കണം, കുറച്ച് കഴിഞ്ഞാല്‍ ജോലി ഒക്കെയായി ഞങ്ങള്‍ പുറത്തേക്ക് പോവും, അപ്പോള്‍ അമ്മ തനിച്ചാവും എന്നൊക്കെ അവര്‍ പറയും. എന്ന് കരുതി ആരെയെങ്കിലും കേറി കെട്ടരുതെന്നും യമുന പറയുന്നു.

നമ്മള്‍ നോക്കിയും കണ്ടും വളരെയധികം പഠിച്ചതിന് ശേഷമേ രണ്ടാമതും വിവാഹം കഴിക്കാവൂ. രണ്ടോ മൂന്നോ മാസമെങ്കിലും പരസ്പരം സംസാരിക്കണം. ആദ്യത്തെയും രണ്ടാമത്തെയോ ഏതാണെങ്കിലും നമ്മള്‍ മനസിലാക്കാതെ കെട്ടിക്കഴിഞ്ഞാല്‍ വേറെ പണി പുറകിലൂടെ വരും.

എന്നെ സംബന്ധിച്ചിടത്തോളം ദേവേട്ടനെ കുറിച്ച് നന്നായി പഠിച്ചിട്ടാണ് വിവാഹം കഴിക്കുന്നത്. കാരണം എനിക്ക് രണ്ട് പെണ്‍മക്കളാണുള്ളത്. എന്തെങ്കിലും പ്രശ്‌നം ഉണ്ടായാല്‍ ഞാന്‍ മാത്രമല്ല എന്റെ മക്കളും അത് അനുഭവിക്കേണ്ടി വരും. അതുകൊണ്ടാണ് സൂക്ഷിച്ചാണ് അക്കാര്യം കൈകാര്യം ചെയ്തത്.

രണ്ടാമതൊരു റിലേഷന്‍ഷിപ്പ് ഉണ്ടായാല്‍ അത് കല്യാണം കഴിച്ചായിരിക്കുമെന്ന് ഞാന്‍ ആദ്യമേ തീരുമാനിച്ചിരുന്നു. എന്റെ മക്കള്‍ക്ക് ഒരിക്കലും ചീത്തപ്പേര് ഉണ്ടാവാന്‍ പാടില്ല. അതിന് എനിക്ക് താല്‍പര്യമില്ല. മുന്‍പ് ഞാനങ്ങനെ തീരുമാനം എടുക്കാറില്ലായിരുന്നു. എല്ലാം കണ്ണടച്ച് വിശ്വസിക്കും. ആര് വന്ന് വിഷമം പറഞ്ഞാലും കൈയ്യിലുള്ളതെല്ലാം കൊടുക്കു, അങ്ങനെയുള്ള സ്വഭാവം ഉണ്ടായിരുന്നു. എന്റെ സ്വര്‍ണം വരെ ഊരി കൊടുത്ത് ഒരു ബിഗ് സീറോ ആയ വ്യക്തിയാണ് ഞാനെന്നും യമുന പറയുന്നു.

എല്ലാവരും ജീവിതത്തില്‍ ഉണ്ടായിരുന്നൊരു കാലം എനിക്കുണ്ടായിരുന്നു. എന്റെ കൈയ്യില്‍ പണം ഉണ്ടായിരുന്നപ്പോള്‍ എല്ലാവരുമുണ്ട്. അക്കാലത്ത് ഞാനെന്റെ കുടുംബത്തിന്റെ നട്ടെല്ല് തന്നെയായിരുന്നു. എന്നാല്‍ എന്റെ കൈയ്യിലെ പണം എല്ലാം തീര്‍ന്ന് കഴിഞ്ഞപ്പോള്‍ നട്ടെല്ല് മാത്രമല്ല, ഒരു എല്ലും ഇല്ല എന്ന അവസ്ഥയിലായി. ഇത് ഇപ്പോഴും പറയാന്‍ തനിക്ക് യാതൊരു മടിയും ഇല്ലെന്നും യമുന പറയുന്നു.