'അച്ഛന്റെ പ്രസം​ഗത്തിനിടെ വേദിയിൽ പൊട്ടികരഞ്ഞ് വിഷ്ണു വിശാൽ'; വൈറലായി ട്രെയിലർ ലോഞ്ച് വീഡിയോ!

2007ൽ ആണ് വിഷ്ണുവിന്റെ ആദ്യ സിനിമ സംഭവിച്ചത്. വെണ്ണില കബഡി കുഴുവായിരുന്നു സിനിമ. ചിത്രത്തിന് വലിയ സ്വീകാര്യത ലഭിച്ചു. പിന്നീട് 2010ൽ ആണ് വിഷണുവിന്റെ രണ്ടാമത്തെ സിനിമ സംഭവിച്ചത്. ബലേ പാണ്ഡ്യയായിരുന്നു ചിത്രം. പിന്നീട് 2012ൽ ആയിരുന്നു വിഷ്ണുവിന്റെ നീർപറവൈ റിലീസിനെത്തിയത്. ജീവ, ഇൻഡ്രു നേട്ര് നാളെ, കഥാനായകൻ എന്നിവയാണ് വിഷ്ണുവിന്റെ റിലീസായ മറ്റ് സിനിമകൾ. 2018ൽ ആണ് വിഷ്ണുവിന്റെ രാക്ഷസൻ റിലീസ് ചെയ്തത്. ഒട്ടും പ്രതീക്ഷിക്കാത്ത വിജയമായിരുന്നു സിനിമയ്ക്ക് ലഭിച്ചത്. രാം കുമാറായിരുന്നു സിനിമ സംവിധാനം ചെയ്തത്. അമലാ പോളാണ് ചിത്രത്തിൽ നായികയായത്.

ഇപ്പോൾ എഫ്ഐആർ സിനിമയുടെ ട്രെയിലർ ലോഞ്ചിനിടെ വിഷ്ണു വിശാൽ കരയുന്ന വീഡിയോയാണ് ഇപ്പോൾ സോഷ്യൽമീഡിയയിൽ വൈറലാകുന്നത്. താരത്തിന്റെ അച്ഛൻ ട്രെയിലർ ലോഞ്ചിനിടെ പ്രസം​ഗിച്ചപ്പോൾ പറഞ്ഞ വാക്കുകളാണ് വിഷ്ണുവിനെ വികാരഭരിതനാക്കിയത്. മകനെ കുറിച്ച് ഓർത്ത് അഭിമാനം തോന്നുവെന്നും അവൻ കാരണമാണ് താൻ ഇന്ന് ഇത്രത്തോളം അറിയപ്പെടുന്നതും ജനങ്ങളോട് പൊതുവേദിയിൽ നിന്ന് സംസാരിക്കാൻ സാധിക്കുന്നത് എന്നുമാണ് വിഷ്ണു വിശാലിന്റെ അച്ഛൻ പറഞ്ഞത്. വിഷ്ണുവിന്റെ ഉയർച്ചയിലും താഴ്ചയിലും ഇത്രയും നാൾ ഒപ്പം നിന്നപോലെ തുടർന്നും മകനൊപ്പം നിൽക്കുമെന്നും വിഷ്ണുവിന്റെ അച്ഛൻ പ്രസം​ഗത്തിനിടെ പറ‍ഞ്ഞു. വികാരങ്ങൾ പിടിച്ച് നിർത്തണമെന്നും കരയരുതെന്നും നിശ്ചയിച്ചാണ് ട്രെയിലർ ലോഞ്ചിന് എത്തിയതെന്നും എന്നാൽ അച്ഛൻ സംസാരിച്ച് തുടങ്ങിയപ്പോൾ തന്നെ തനിക്ക് കരിച്ചിൽ വന്നുവെന്നുമാണ് വിഷ്ണു വിശാൽ പറ‍ഞ്ഞത്.

'ഞാൻ ഒരിക്കലും കരയരുതെന്ന് കരുതിയതാണ്. രാക്ഷസന്റെ വിജയത്തിന് ശേഷം ജീവിതം മുഴുവൻ നഷ്ടങ്ങൾ‌ നിറഞ്ഞതായിരുന്നു. അവസാനത്തെ ശ്രമം ആയിട്ടാണ് എഫ്ഐആർ ചെയ്തത്. സിനിമ ഞാൻ‍ ഇതുവരെ 250ൽ അധികം ആളുകളെ കാണിച്ചു. എല്ലാവരും എന്നിലെ നടൻ ഏറെ മെച്ചപ്പെട്ടുവെന്നാണ് പറഞ്ഞത്. അതിൽ‍ ധനുഷ് സർ പറഞ്ഞ വാക്കുകൾ എന്നെ ഏറെ സ്വാധീനിച്ചിരുന്നു. രാക്ഷസനിലെ നായകനിൽ നിന്നും എഫ്ഐആറിലെത്തിയപ്പോൾ വിഷ്ണു നല്ലൊരു നടനായി മാറിയെന്നാണ് ധനുഷ് സർ പറഞ്ഞത്. നിങ്ങൾക്കും നല്ലൊരു അനുഭവം എഫ്ഐആർ നൽകുമെന്ന് പ്രതീക്ഷിക്കുന്നു. രാക്ഷസൻ ജനങ്ങൾ സ്വീകരിച്ചപ്പോൾ മുതൽ കൂടുതൽ നന്നായി നല്ല സിനിമകകളും കഥാപാത്രങ്ങളും ചെയ്യണമെന്ന് തീരുമാനിച്ചതായിരുന്നുവെന്നും' വിഷ്ണു വിശാൽ പറ‍ഞ്ഞു.