ഇങ്ങനെയാകാൻ കഷ്ടപ്പെട്ടു; സങ്കടം തോന്നിയെന്ന് അമൃത; തിരുത്തി ഗോപി സുന്ദർ; ശ്രദ്ധ നേടി വാക്കുകൾ

അമൃത സുരേഷും ​ഗോപി സുന്ദറും സോഷ്യൽ മീഡിയയിൽ എന്നും ചർച്ചയാണ്. ഇരുവരുടെയും വ്യക്തിജീവിതം നേരത്തെ തന്നെ വാർത്താ പ്രാധാന്യം നേടിയിട്ടുണ്ട്. ബാലയുമായുള്ള വിവാഹമോചനവും തുടർന്നുണ്ടായ പ്രശ്നങ്ങളുമാണ് അമൃതയെ വാർത്തകളിൽ നിറച്ചത്. വിവാഹബന്ധം നിലനിൽക്കെ ​ഗായിക അഭയ ഹിരൺമയിയുമായി പ്രണയത്തിലായത് ​ഗോ​പി സുന്ദർ ​ഗോസിപ്പ് കോളങ്ങളിൽ സ്ഥിരം വിഷയമാകാൻ കാരണമായി.

അമൃതയും ​ഗോപി സുന്ദറും ഒന്നിച്ചപ്പോൾ ഇത് വലിയ ചർച്ചയായി. ഇരുവരും വിവാഹിതരാണെന്ന് അഭ്യൂഹമുണ്ടെങ്കിലും ഇക്കാര്യത്തിൽ വ്യക്തതയില്ല. ഇരുവരും ഒരുമിച്ചുള്ള ചിത്രങ്ങൾ സോഷ്യൽ മീഡിയയിൽ എപ്പോഴും ജനശ്രദ്ധ നേടുന്നു. അമൃതയുടെ കുടുംബവുമായും അടുത്ത ബന്ധം ​ഗോപി സുന്ദറിനുണ്ട്. സൈബറാക്രമണവും പരിഹാസങ്ങളും വന്നപ്പോഴും അമൃതയോ ​ഗോപി സുന്ദറോ ഇതൊന്നും കാര്യമാക്കിയില്ല. ഒരുമിച്ച് മുന്നോട്ട് നീങ്ങവെയാണ് ഇരുവരും അകൽച്ചയിലാണെന്ന ​ഗോസിപ്പുകൾ വന്നത്.

ഇൻസ്റ്റ​ഗ്രാമിൽ പരസ്പരം അൺഫോളോ ചെയ്തിന് ശേഷമാണ് അഭ്യൂഹങ്ങൾ ഉയർന്നത്. അഭ്യൂഹങ്ങൾ കടുത്തതോടെ അമൃതയ്ക്കൊപ്പമുള്ള ഫോട്ടോ ഗോപി സുന്ദർ സോഷ്യൽ മീഡിയയിൽ പങ്കുവെച്ചു. ഇൻസ്റ്റ​ഗ്രാമിൽ ഇരുവരും വീണ്ടും ഫോളോ ചെയ്തു. ഇതോടെ ആഴ്ചകൾ നീണ്ടു നിന്ന അഭ്യൂഹങ്ങൾ കെട്ടടങ്ങി. ഇപ്പോഴിതാ അമൃതയും ​ഗോപി സുന്ദറും ഒരുമിച്ചുള്ള അഭിമുഖമാണ് ആരാധക ശ്രദ്ധ നേടുന്നത്. ​ഗോപി സുന്ദറിന്റെ ഡയറ്റിനെക്കുറിച്ചാണ് അമൃത സംസാരിക്കുന്നത്.

മുമ്പൊരിക്കൽ ഫിൽമിബീറ്റ് മലയാളത്തിന് നൽകിയ അഭിമുഖത്തിൽ സംസാരിക്കുകയായിരുന്നു താരങ്ങൾ. ​ഗോപി സുന്ദർ കടുത്ത ഡയറ്റിം​ഗ് ചെയ്താണ് ശരീരഭാരം കുറച്ചതെന്ന് അമൃത പറഞ്ഞു. ഭക്ഷണം കഴിക്കുന്നതേ കാണാറില്ല. ചെറിയ ഡയറ്റൊന്നുമല്ല ഫോളോ ചെയ്യുന്നത്. വളരെ കഷ്ടപ്പെട്ടാണ് ഇങ്ങനെയായത്. ഞാൻ കാണുന്നതല്ലേ. ഞാൻ ചോറൊക്കെ കഴിക്കുമ്പോൾ എനിക്ക് തന്നെ സങ്കടമാകുമെന്നാണ് അമൃത പറഞ്ഞത്. ഇത് കേട്ട് ​ഗോപി സുന്ദർ അങ്ങനെയല്ല തന്റെ ഡയറ്റ് എന്ന് വ്യക്തമാക്കി.

ഡയറ്റിം​ഗ് എന്നാൽ പട്ടിണി കിടക്കലല്ല. എനിക്ക് ഡോക്ടറുണ്ട്. ഡോക്ടർ പറയുന്നത് പ്രകാരമാണ് ഡയറ്റ് ചെയ്യുന്നത്. വെറുതെ ഭക്ഷണം കഴിക്കാതിരുന്നാൽ നമ്മൾ ആശുപത്രിയിലാകും. ക്രമീകരിച്ച് വേണ്ട ഭക്ഷണം കഴിക്കുകയെന്നാണ് രീതി. ജീവിക്കാൻ ഇത്രയും ഭക്ഷണത്തിന്റെ ആവശ്യമില്ലെന്നും ​ഗോപി സുന്ദർ അന്ന് ചൂണ്ടിക്കാട്ടി. ​

ആ​രോ​ഗ്യം നോക്കാതെുള്ള പ്രശ്നങ്ങൾ മുമ്പ് ഉണ്ടായിട്ടുണ്ട്. പക്ഷെ ഇപ്പോൾ ശ്രദ്ധിക്കും. ആ​രോ​ഗ്യമില്ലെങ്കിൽ എല്ലാം പോയില്ലേ. പണ്ട് നല്ല തടിയുണ്ടായിരുന്നു. ഇപ്പോൾ ഓടാനും ചാടാനുമൊന്നും പ്രയാസമില്ലെന്ന് ​ഗോപി സുന്ദർ പറഞ്ഞു. മറ്റുള്ളവർ എന്ത് ചിന്തിക്കുമെന്ന് ആശങ്കപ്പെട്ട് ജീവിക്കാൻ പറ്റില്ലെന്നും ​ഗോപി സുന്ദർ ചൂണ്ടിക്കാട്ടി.

മറ്റുള്ളവർ എന്ത് ചിന്തിക്കുന്നതിനെക്കുറിച്ച് ആലോചിക്കാതെ എന്ന് ജീവിക്കുന്നോ, അന്നേ നമ്മൾ ജീവിക്കാൻ തുടങ്ങൂ. കാരണം മരിക്കുമ്പോൾ നമ്മൾ ഒറ്റയ്ക്കാണ്. ജീവിക്കുന്ന കാലം നമുക്ക് ഇഷ്ടമുള്ള പോലെ ജീവിക്കുക. മറ്റുള്ളവർ എന്തും പറഞ്ഞോട്ടെയെന്നും ​ഗോപി സുന്ദർ വ്യക്തമാക്കി. ‌‌

വ്യക്തി ജീവിതത്തെക്കുറിച്ച് തുടരെ ​ഗോസിപ്പുകൾ വരുമ്പോഴും ഇതേക്കുറിച്ച് പ്രതികരിക്കാൻ ​ഗോപി സുന്ദർ തയ്യാറായിട്ടില്ല. സോഷ്യൽ മീഡിയയിലെ കമന്റുകൾ ശ്രദ്ധിക്കാൻ പോയാൽ അതിനേ സമയമുണ്ടാകൂ എന്നാണ് ​ഗോപി സുന്ദർ പറയുന്നത്. ചിലപ്പോൾ ഒരു വിനോദത്തിന് വേണ്ടി വായിക്കും. കമന്റുകൾ കണ്ട് താൻ പ്രകോപിതനാകാറില്ലെന്നും ​ഗോപി സുന്ദർ മുമ്പൊരിക്കൽ പറഞ്ഞിട്ടുണ്ട്.

അതേസമയം സോഷ്യൽമീഡിയയിലെ അധിക്ഷേപങ്ങൾ അമൃതയെയും കുടുംബത്തെയും കാര്യമായി ബാധിച്ചിട്ടുണ്ട്. അമൃതയും സഹോദരി അഭിരാമി സുരേഷും ഇക്കാര്യം തുറന്ന് പറഞ്ഞിട്ടുമുണ്ട്. മകൾ അവന്തികയെയും വിവാദങ്ങളിലേക്ക് വലിച്ചിഴയ്ക്കുന്നതിൽ അമൃതയ്ക്ക് എതിർപ്പുണ്ട്.