'അതിന് മുമ്പ് പലപ്പോഴും ഇങ്ങനെ സംഭവിച്ചു'; ഇടവേള ബാബുവിനോട് ദിലീപിന് വൈരാ​ഗ്യം വരാനുള്ള കാരണം; ലാൽ ജോസ്

'​ഗസൽ എന്ന സിനിമ തുടങ്ങുന്നത് ഒരു പാട്ടിലാണ്. തങ്ങൾ എന്ന പ്രധാന കഥാപാത്രം രാത്രി വീട്ടിലേക്ക് വരുന്ന സീൻ. രാവിലെ മൂന്നരമണിക്ക് പോയി സൂര്യനുദിക്കുന്നത് വരെ ഷൂട്ട് ചെയ്യും. കാസ്റ്റിം​ഗ് നടക്കുമ്പോൾ രണ്ട് കാര്യങ്ങളാണ് സംഭവിക്കാറ്. ഒന്ന് ദിലീപിന് റോൾ കൊടുക്കണം'

'ചെറുപ്പക്കാരനായ കഥാപാത്രം വന്ന് കഴിഞ്ഞാൽ ആ ക്യാരക്ടറിനെ പൊലിപ്പിക്കും. ആ കഥാപാത്രത്തെക്കൊണ്ട് ചെയ്യിപ്പിക്കാവുന്ന കാര്യങ്ങൾ കമൽ സാറിനോട് പറയും'

Also Read: 'അജിത് സാറിനെ ഏറ്റവും സന്തോഷവാനായി കാണുന്നത് അപ്പോഴാണ്; എന്നെ അങ്ങനെ പറയുമ്പോൾ ചിരിക്കാറേ ഉള്ളു': മഞ്ജു

'​ഗസലിൽ ഒരു നമ്പീശൻ കഥാപാത്രം ഉണ്ടായിരുന്നു, ബാക്കി എല്ലാ കഥാപാത്രങ്ങളും മുസ്ലിങ്ങൾ ആണ്. ആ കഥാപാത്രം ദിലീപിന് കിട്ടുമെന്ന് ഞങ്ങൾക്ക് ഉറപ്പായി. ആ കഥാപാത്രത്തെക്കൊണ്ട് ചെയ്യിക്കാവുന്ന കാര്യങ്ങളെക്കുറിച്ച് പറയും'

'അങ്ങനെ അത് ദിലീപ് ചെയ്യുമെന്ന് ഏതാണ്ട് ഉറപ്പിച്ച സമയത്താണ് കമൽ സർ പറയുന്നത് ഇടവേള ബാബുവിന് റോൾ കൊടുക്കണം, നമ്മുടെ നാട്ടുകാരനാണ്, നമ്പീശൻ അല്ലാതെ വേറൊരു കഥാപാത്രം ബാബുവിന് കൊടുക്കാനില്ല. ബാബുവിനെ ഫിക്സ് ചെയ്യാം എന്ന്. ഞങ്ങളെല്ലാവരും വേദനയോടെ ശരി എന്ന് പറഞ്ഞു'

'അതിന് മുമ്പ് പലപ്പോഴും ഇങ്ങനെ സംഭവിച്ചിട്ടുണ്ട്. എന്നോടിഷ്ടം കൂടാമോയിലും ഇങ്ങനെ സംഭവിച്ചു. ഒരു കഥാപാത്രം വന്നപ്പോൾ ഇടവേള ബാബുവിന് ലഭിച്ചു. ഇടവേള ബാബുവിനോട് എനിക്കും ദിലീപിനും വൈരാ​ഗ്യം നിലവിലുണ്ട്. അപ്പോഴാണ് ​ഗസലിൽ കിട്ടുമെന്നുറപ്പിച്ച റോൾ ഇല്ലാതാവുന്നത്'

'ഇടവേള ബാബു ലൊക്കേഷനിൽ വന്നിറങ്ങി. സ്റ്റെപ്പ് കട്ട് മുടിയും കട്ടി മീശയും ആയി വന്നപ്പോൾ കമൽ സർ പറഞ്ഞു പഴയ കാലഘട്ടത്തിലെ ആളുടെ രൂപത്തിലേക്ക് മാറ്റണം എന്ന്'

'ദിലീപ് ഉടനെ പറഞ്ഞു, ഞാൻ കൊണ്ട് പോവാം എന്ന്. ബാർബർ ഷാപ്പിൽ പോയി മുടിയൊക്കെ വെട്ടിക്കാെണ്ട് വരണം. അങ്ങനെ ദിലീപ് ബാബുവിനെയും കൊണ്ട് പോയി. തിരിച്ച് ബാബു വന്ന് ഇറങ്ങുമ്പോൾ സെറ്റിൽ എല്ലാവരും കൂട്ടച്ചിരി ആണ്' ‌‌

'മുടി മുഴുവൻ പറ്റെ വെട്ടിച്ച്, മീശ വടിച്ച് ഈർക്കിലി മീശ വെച്ച് വേറെ ഏതോ രൂപത്തിലുള്ള ബാബുവിനെയും കൊണ്ടാണ് ദിലീപ് വന്നിറങ്ങിയത്. കമൽ സാർ തന്നെ ചിരിച്ച് ഓടിക്കളഞ്ഞു. പക്ഷെ ആ രൂപത്തിൽ ബാബു അഭിനയിച്ചു'

'​ഗസൽ എന്ന സിനിമയുടെ ഷൂട്ടിം​ഗ് കഴിഞ്ഞ് ഡബ്ബിം​ഗ് വർക്കുകൾ നടക്കുന്ന സമയത്ത് കമൽ സാറിന് ഒരു അമേരിക്കൻ യാത്ര ഉണ്ടായിരുന്നു. ജയറാമേട്ടനൊക്കെ ഉള്ള ഷോ കമൽ സാർ ആയിരുന്നു ഡയരക്ട് ചെയ്തത്. ആ പോയ ​ഗ്രൂപ്പിൽ‌ ദിലീപിനെയും അബിയെയും രണ്ട് മിമിക്രിക്കാരായി കൊണ്ട് പോയി'

ദിലീപിന്റെ ആദ്യത്തെ യാത്ര കമൽ സാറിനൊപ്പമാണ്. ഭയങ്കര കുശുമ്പായിരുന്നു ഞങ്ങൾക്കൊക്കെ. ​ഗംഭീരമായ പരിപാടി ആയിരുന്നു. തിരിച്ച് വന്നപ്പോൾ ദിലീപ് എനിക്ക് ക്ലാപ്പ് ബോർഡിന്റെ ഷേപ്പിലുള്ള ഫോട്ടോ ഫ്രെയിം കൊണ്ട് വന്നെന്നും ലാൽ ജോസ് പറഞ്ഞു.