ലൈല ഹോട്ടൽ മുറിയിലിരുന്ന് കരച്ചിൽ; ഒടുവിൽ തെറ്റ് മനസിലായി; സൂര്യക്കൊപ്പമുള്ള സിനിമയ്ക്കിടെ സംഭവിച്ചത്

തെന്നിന്ത്യൻ സിനിമാ രം​ഗത്ത് ഒരു കാലത്ത് തരം​ഗം സൃഷ്ടിച്ച താരമാണ് ലൈല. ​​ഗോവയിൽ ജനിച്ച് വളർന്ന ലൈലയ്ക്ക് വളരെ പെട്ടെന്ന് തമിഴ് സിനിമാ രം​ഗത്ത് ശ്രദ്ധിക്കപ്പെടാനായി. നന്ദ, പിതാമകൻ, ഉന്നെെ നിനത്ത്, ​ദീന, ദിൽ, തുടങ്ങിയ സിനിമകളിൽ ശ്രദ്ധേയ പ്രകടനം നടി കാഴ്ച വെച്ചു. ചുരുങ്ങിയ കാലം മാത്രമേ നടി സിനിമാ രം​ഗത്ത് സജീവമായിരുന്നുള്ളൂ. 2006 ൽ വിവാഹിതയായ ശേഷം അഭിനയ രം​ഗം വിട്ട ലൈല കുടുംബ ജീവിതത്തിലേക്ക് ശ്രദ്ധ നൽകി.

കഴിഞ്ഞ വർഷമാണ് സർദാർ എന്ന കാർത്തി ചിത്രത്തിലൂടെ നടി അഭിനയ രം​ഗത്തേക്ക് തിരിച്ചെത്തിയത്. സിനിമാ രം​ഗത്ത് സജീവമായിരുന്ന കാലത്ത് ലൈലയുടെ ഏറ്റവും മികച്ച ഓൺസ്ക്രീൻ നായകൻ സൂര്യയായിരുന്നു. പിതാമകൻ, നന്ദ, ഉന്നെെ നിനത്ത് തുടങ്ങിയ സിനിമകളിൽ ഇരുവരും ഒരുമിച്ച് അഭിനയിച്ചിട്ടുണ്ട്. സൂര്യയുടെ ഏറ്റവും മികച്ച നായിക ലൈലയാണെന്ന് നടന്റെ ഭാര്യ ജ്യോതിക മുമ്പൊരിക്കൽ പറഞ്ഞിട്ടുമുണ്ട്.

2001 ലാണ് നന്ദ എന്ന ചിത്രം പുറത്തിറങ്ങുന്നത്. സൂര്യയും ലൈലയും മികച്ച പ്രകടനം ഈ സിനിമയിൽ കാഴ്ച വെച്ചു. പ്രമുഖ തമിഴ് സംവിധായകൻ ബാലയാണ് ഈ സിനിമ ഒരുക്കിയത്. സിനിമയ്ക്കിടെയുണ്ടായ ഒരു സംഭവമാണ് തമിഴ് സിനിമാ മാധ്യമങ്ങളിൽ ഇപ്പോഴത്തെ ചർച്ച. നന്ദ എന്ന സിനിമയിൽ അഭിനയിക്കാൻ ലൈല വളരെ ബുദ്ധിമുട്ടിയിരുന്നു. ഒരു ഘട്ടത്തിൽ സിനിമ വേണ്ടെന്ന് പോലും ലൈലയ്ക്ക് തോന്നി. ഇതിന് കാരണവും ഉണ്ട്. കർക്കശക്കാരനാണ് സംവിധായകൻ ബാല. ആർട്ടിസ്റ്റുകളെ ചീത്ത പരസ്യമായി വഴക്ക് പറയാനും മടിക്കില്ല.

തമിഴ് ഭാഷ സ്പഷ്ടമായി സംസാരിക്കാൻ ലൈലയ്ക്ക് സാധിച്ചിരുന്നില്ല. ഇത് കാരണം അഭിനയിക്കുമ്പോൾ ലൈല ബുദ്ധിമുട്ടി. പലപ്പോഴും ലൈലയെ ബാല വഴക്ക് പറയുകയും ചെയ്തു. ഹോട്ടൽ മുറിയിൽ വന്ന് ലൈല കരയും. സിനിമ വേണ്ടെന്ന് വെക്കാൻ തീരുമാനിച്ചപ്പോൾ ബാല പ്ര​ഗൽഭ സംവിധായകനാണെന്നും അദ്ദേഹത്തിന്റെ സിനിമയിൽ അഭിനയിക്കുന്നത് കരിയറിൽ ​ഗുണം ചെയ്യുമെന്നും ഒപ്പമുള്ളവർ ലൈലയോട് പറഞ്ഞു.

സിനിമ കണ്ട ശേഷം ലൈലയുടെ മനസ് മാറി. ഇത്രയും മികച്ച സംവിധായകനെയാണോ താൻ തെറ്റായി കണ്ടതെന്ന് തോന്നിയ ലൈല അദ്ദേഹത്തിന്റെ കാലിൽ വീണു. പിന്നീട് ബാലയുടെ പിതാമകൻ എന്ന സിനിമയിലും ലൈല അഭിനയിച്ചിട്ടുണ്ട്. ഇതിലും സൂര്യയുടെ കാമുകിയുടെ വേഷമാണ് ലൈല ചെയ്തത്.

ഇറാനിയൻ ബിസിനസുകാരനായ മെഹ്ദിയെയാണ് ലൈല വിവാഹം ചെയ്തത്. പ്രണയ വിവാഹമായിരുന്നു. എട്ട് വർഷത്തെ പ്രണയത്തിനൊടുവിലായിരുന്നു വിവാ​ഹം. രണ്ട് മക്കളും ദമ്പതികൾക്ക് പിറന്നു. ഏറെക്കാലം ലൈലയെ ലൈം ലൈറ്റിൽ കണ്ടതേയില്ല. അടുത്തിടെ നൽകിയ അഭിമുഖത്തിൽ സിനിമയിലേക്കുള്ള തന്റെ തിരിച്ച് വരവിനെക്കുറിച്ച് ലൈല സംസാരിച്ചിരുന്നു. സിനിമയിൽ ഇന്ന് ഒരുപാട് മാറ്റങ്ങൾ സംഭവിച്ചു. ഇന്ന് സ്ക്രിപ്റ്റും കഥകളും കഥാപാത്രങ്ങളും വ്യത്യസ്തമാണ്.

നായകനും നായികയുമെന്ന പഴയ ഫാഷൻ ഇപ്പോഴില്ല. പുതിയ തരം സിനിമകളിൽ പ്രേക്ഷകർക്കും താൽപര്യമുണ്ട്. അതിനാൽ തിരിച്ച് വരവിൽ സന്തോഷമുണ്ട്. ഇനിയും സിനിമകൾ ചെയ്യാനാണ് തീരുമാനമെന്നും ലൈല വ്യക്തമാക്കി.
മലയാളത്തിൽ മഹാസമുദ്രം എന്ന മോഹൻലാൽ ചിത്രത്തിൽ ലൈല ചെയ്ത വേഷം ജനശ്രദ്ധ നേടി. സ്വപ്നക്കൂട് എന്ന ചിത്രത്തിൽ അതിഥി വേഷത്തിലും ലൈല അഭിനയിച്ചു. ലൈലയുടെ പുതിയ സിനിമകൾക്കായി കാത്തിരിക്കുകയാണ് ആരാധകർ.