'അച്ഛൻ ഒരിക്കൽ പോലും ചോദിച്ചില്ല; ഒറ്റ മകളാണ്, അദ്ദേഹമത് ആ​ഗ്രഹിച്ചിരുന്നു; അത് മാത്രമാണ് വിഷമം'

മലയാള സിനിമാ ലോകം എന്നും അഭിമാനത്തോടെ കാണുന്ന നടിയാണ് ശോഭന. 80 കളിലും 90 കളിലും സിനിമാ ലോകത്ത് നിറസാന്നിധ്യമായ ശോഭനയ്ക്ക് ശ്രദ്ധേയമായ നിരവധി വേഷങ്ങൾ ലഭിച്ചു. ഒട്ടനവധി സിനിമകൾ ചെയ്തെങ്കിലും മണിച്ചിത്രത്താഴ് എന്ന സിനിമയാണ് ശോഭനയുടെ കരിയറിൽ ഇന്നും എല്ലാവരും എടുത്ത് പറയുന്ന സിനിമ. നാ​ഗവല്ലി എന്ന ഐക്കോണിക് കഥാപാത്രത്തെ ശോഭന മികവുറ്റതാക്കി. പല ഭാഷകളിലേക്ക് സിനിമ റീമേക്ക് ചെയ്തെങ്കിലും മറ്റൊരു നടിക്കും ശോഭന നൽകിയ പൂർണത ഈ കഥാപാത്രത്തിന് കൊടുക്കാൻ കഴിഞ്ഞില്ലെന്ന് ആരാധകർ പറയുന്നു.

പിൽക്കാലത്ത് സിനിമകളിൽ നിന്നും അകന്ന് തുടങ്ങിയ ശോഭന നൃത്തത്തിലേക്ക് ശ്രദ്ധ കേന്ദ്രീകരിച്ചു. അഭിനയ രം​ഗത്ത് ഇടവേള വന്ന കാലഘട്ടങ്ങളിൽ ശോഭന നൃത്തവേദികളിൽ സജീവമായിരുന്നു. നൃത്തത്തിനും സിനിമയ്ക്കുമപ്പുറം ശോഭനയെ മറ്റ് നടിമാരെ പോലെ അടുത്തറിയാൻ ആരാധകർക്ക് പറ്റിയിട്ടില്ല. തന്റെ വ്യക്തിപരമായ കാര്യങ്ങളിൽ എന്നും സ്വകാര്യത പുലർത്തിയ ശോഭന മാധ്യമങ്ങളിൽ നിന്നും അകലം പാലിച്ചു.

അഭിമുഖങ്ങളിൽ സ്വകാര്യമായ കാര്യങ്ങളെക്കുറിച്ച് ചോദിക്കാൻ ശോഭന അനുവദിക്കാറുമില്ല. അതേസമയം മുമ്പൊരിക്കൽ നടി രേവതിക്കൊപ്പമുള്ള അഭിമുഖ പരിപാടിയിൽ തന്റെ കുടുംബത്തെക്കുറിച്ച് ശോഭന പരാമർശിച്ചിട്ടുണ്ട്. അന്ന് ശോഭന തന്റെ പിതാവിനെക്കുറിച്ച് പറഞ്ഞ വാക്കുകളാണിപ്പോൾ ശ്രദ്ധ നേടുന്നത്.

'1979 മുതൽ 1995 വരെ ഞാൻ ഒരു ദിവസം പോലും വീട്ടിൽ ഇരുന്നിട്ടില്ല. അച്ഛൻ ഒരിക്കൽ പോലും എന്തുകൊണ്ട് നീ ഡബിൾ ഷിഫ്റ്റ് എടുക്കുന്നു, ഒരു ഷിഫ്റ്റ് ചെയ്ത് വീട്ടിൽ ഇരുന്നാൽ പോരെ എന്ന് പറഞ്ഞിട്ടില്ല. തീർച്ചയായും അദ്ദേഹത്തിന് എന്റെയൊപ്പം സമയം ചെലവഴിക്കാൻ ആ​ഗ്രഹമുണ്ടായിരുന്നു. ഞാൻ ഒറ്റ മകളാണ്. പാവം... അദ്ദേഹം ഒന്നും പറഞ്ഞില്ല. ഞങ്ങൾ ഒരുമിച്ച് സമയം ചെലവഴിച്ചില്ലെന്ന ഒറ്റ വിഷമം മാത്രമേ ഉള്ളൂ,' ശോഭന പറഞ്ഞതിങ്ങനെ. ചന്ദ്രകുമാർ പിള്ള എന്നാണ് ശോഭനയുടെ പിതാവിന്റെ പേര്.

വർഷങ്ങൾക്ക് മുമ്പ് മഴവിൽ മനോരമയിലെ അഭിമുഖത്തിനാണ് ശോഭനയും രേവതിയും ഒരുമിച്ച് എത്തിയത്. അഭിനയം നിർത്താൻ തീരുമാനിച്ചതിന് കാരണമെന്തെന്നും ശോഭന അന്ന് വ്യക്തമാക്കി. കരിയറിലെ മികച്ച സമയത്ത് സിനിമകളിൽ മാത്രമായിരുന്നു ശ്രദ്ധ. ഒരു ദിവസം എനിക്ക് തോന്നി, ഇതെല്ലാം മതിയാക്കാമെന്ന്. എനിക്ക് മറ്റ് ആ​ഗ്രഹങ്ങളുണ്ടായിരുന്നു. സിനിമകൾ തന്നെ ചെയ്താൽ അത് നടക്കില്ല. അങ്ങനെയാണ് നൃത്തത്തിലേക്ക് ശ്രദ്ധ കൊടുക്കുന്നതെന്നും അന്ന് ശോഭന തുറന്ന് പറഞ്ഞു.

വലിയൊരു ആ​ഗ്രഹമെന്താണെന്ന് ചോദിച്ചപ്പോൾ തന്റെ മകൾ നൃത്തത്തിൽ അരങ്ങേറണമെന്നാണെന്ന് ശോഭന വ്യക്തമാക്കി. ഡാൻസ് ചെയ്യാൻ താൽപര്യമുണ്ട്. പക്ഷെ ‍ഡാൻസ് ക്ലാസിൽ വരില്ല. അവൾക്ക് സ്വയം ചെയ്യണം. അവൾ നന്നായി നൃത്തം ചെയ്യണമെന്ന ആ​ഗ്രഹമുണ്ടെന്നും ശോഭന പറഞ്ഞു. അനന്ത നാരായണി എന്നാണ് ശോഭനയുടെ മകളുടെ പേര്.

2020 ൽ പുറത്തിറങ്ങിയ വരനെ ആവശ്യമുണ്ട് എന്ന സിനിമയിലാണ് ശോഭന അവസാനമായി അഭിനയിച്ചത്. സുരേഷ് ​​ഗോപി, ദുൽഖർ സൽമാൻ, കല്യാണി പ്രിയദർശൻ തുടങ്ങിയവർ പ്രധാന കഥാപാത്രങ്ങളെ അവതരിപ്പിച്ച സിനിമ മികച്ച വിജയം നേടി. വർഷങ്ങളുടെ ഇടവേളയ്ക്ക് ശേഷം ശോഭന ചെയ്ത സിനിമയായിരുന്നു ഇത്. എന്നാൽ പിന്നീടും നടി സിനിമകളിൽ സജീവമായില്ല. ശോഭനയെ വീണ്ടും സിനിമകളിൽ കാണാൻ പറ്റുമെന്ന പ്രതീക്ഷയിലാണ് ആരാധകർ.