കമൽ ഹാസൻ വേണ്ടെന്ന് വച്ചു: തകർന്ന പ്രണയത്തെ കുറിച്ച് മനസ്സ് തുറന്ന ശ്രീ വിദ്യ

ഇന്ത്യൻ സിനിമയിലെ ഏറ്റവും മികച്ച നടന്മാരിൽ ഒരാളായ കമൽ ഹാസൻ, എന്നും വിവാദങ്ങളുടെ നിഴലിൽ ആയിരുന്നു. പ്രത്യേകിച്ച്, അദ്ദേഹത്തിന്റെ പ്രണയങ്ങൾ എന്നും മാധ്യമങ്ങൾ ചർച്ച ചെയ്തിരുന്നു. ഇതിൽ പ്രേക്ഷകരുടെ മനസ്സിൽ ഏറ്റവും ആഴത്തിൽ പതിഞ്ഞത്, പ്രശസ്ത നടി ശ്രീവിദ്യയും കമൽ ഹാസനും തമ്മിലുണ്ടായിരുന്ന നഷ്ട പ്രണയത്തിന്റെ കഥയാണ്. രഞ്ജിത്ത് സംവിധാനം ചെയ്ത് 2008ൽ പുറത്തിറങ്ങിയ തിരക്കഥ എന്ന ചിത്രത്തിന് പ്രചോദനമായത് പോലും, കമൽ ഹാസന്റെയും ശ്രീവിദ്യയുടേയും ജീവിതങ്ങളാണ്.

പ്രണയം അവസാനിപ്പിച്ചത് കമൽ; ശ്രീവിദ്യയുടെ വെളിപ്പെടുത്തൽ

മുൻപൊരിക്കൽ, അമൃത ടിവിക്ക് നൽകിയ അഭിമുഖത്തിൽ, കമൽ ഹാസനുമായുള്ള പ്രണയത്തെ കുറിച്ച് ശ്രീവിദ്യ സംസാരിച്ചിരുന്നു. ഇന്ന് വീണ്ടും വൈറാലായിക്കൊണ്ടിരിക്കുന്ന വിഡിയോയിൽ, അപൂർവ്വ രാഗങ്ങൾ എന്ന ചിത്രത്തിൽ കമലിനൊപ്പം അഭിനയിച്ചതിനെ കുറിച്ചു പറഞ്ഞു കൊണ്ടാണ് അന്തരിച്ച നടി തുടങ്ങിയത്. "ആ പടത്തിൽ വളരെ വ്യത്യസ്തമായ റോൾ ആയിരുന്നു. അന്ന് എനിക്ക് വെറും ഇരുപത്തിരണ്ട് വയസ്സേയുള്ളു. പക്ഷെ അഭിനയിച്ചത് നാൽപ്പത്കാരി ആയിട്ടാണ്," ശ്രീവിദ്യ ഓർത്തെടുക്കുന്നു.

Photo Credit: IMDb

പിന്നീട്, അവതാരകനായ നടൻ സിദ്ദിഖ്, കമൽ ഹാസനുമായുള്ള ബന്ധത്തെ കുറിച്ച് ചോദിച്ചപ്പോൾ, പ്രശസ്ത നടനുമായി താൻ പ്രണയത്തിലായിരുന്നു എന്ന് ശ്രീവിദ്യ സമ്മതിക്കുന്നുണ്ട്. "ആ കഥാപാത്രത്തെ ഇഷ്ടപ്പെട്ടത് പോലെ, ആ കഥാപാത്രമായി അഭിനയിച്ച കമൽ ഹാസനോട് ഇഷ്ടം തോന്നിയിരുന്നോ" എന്ന സിദ്ദിഖിന്റെ ചോദ്യത്തിന്, "തോന്നിയിരുന്നു" എന്നാണ് ശ്രീവിദ്യ മറുപടി നൽകിയത്. പിന്നീട് ഒരു സ്നേഹബദ്ധമായി മാറിയിട്ടും, എന്ത് കൊണ്ടാണ് ആ പ്രണയം വിവാഹത്തിൽ എത്താതിരുന്നത് എന്ന് ചോദിച്ചപ്പോൾ, "എല്ലാം തീരുമാനിച്ചതായിരുന്നു. പക്ഷെ അദ്ദേഹം വേണ്ടെന്ന് വച്ചു," എന്ന ഹൃദയഭേദകമായ മറുപടിയാണ് അന്തരിച്ച നടി നൽകിയത്.

കമൽ ഹാസനും ശ്രീവിദ്യക്കും ഇടയിൽ സംഭവിച്ചത്

മുൻപൊരിക്കൽ, കൈരളി ടിവിക്ക് നൽകിയ അഭിമുഖത്തിൽ, കമൽ ഹാസനുമായുള്ള പ്രണയത്തെ കുറിച്ച് കൂടുതൽ വെളിപ്പെടുത്തലുകൾ ശ്രീവിദ്യ നടത്തിയിരുന്നു. കമൽ ഹാസനുമായുള്ള വേർപിരിയലിന് ശേഷം താൻ അനുഭവിച്ച മാനസിക സംഘർഷങ്ങളെക്കുറിച്ച് അവർ തുറന്നു പറഞ്ഞു. ആദ്യഘട്ടങ്ങളിൽ തന്റെ മനസ്സ് പൂർണ്ണമായും ശൂന്യമായിരുന്നെന്നും, വേർപിരിയൽ ഉൾക്കൊള്ളാൻ ബുദ്ധിമുട്ടിയെന്നും, ഒടുവിൽ തന്റെ ജീവിതത്തിന് അർത്ഥം നഷ്ടപ്പെട്ടുവെന്ന് വിശ്വസിക്കുന്ന ഒരവസ്ഥയിലെത്തിയെന്നും അവർ വെളിപ്പെടുത്തി.

Photo Credit: IMDb

"ഞങ്ങളുടെ കുടുംബങ്ങൾ ഞങ്ങളുടെ വിവാഹം ആഗ്രഹിച്ചു. ഞാൻ കമലിന്റെ അച്ഛന് മകളെപ്പോലെയായിരുന്നു. അതിനിടെ കമൽ വലിയൊരു താരമായി മാറി," താനും കമൽഹാസനും തമ്മിലുണ്ടായിരുന്ന പ്രണയത്തെ കുറിച്ച് ശ്രീവിദ്യ പറഞ്ഞു. തങ്ങളുടെ ബന്ധം രഹസ്യമായിരുന്നില്ലെന്നും, ഇരുവരുടെയും കുടുംബങ്ങൾക്കും മുഴുവൻ സിനിമാ വ്യവസായത്തിനും അതിനെക്കുറിച്ച് അറിയാമായിരുന്നുവെന്നും അവർ വെളിപ്പെടുത്തി. കമലിന് തന്നേക്കാൾ ഏകദേശം ആറ് മാസം പ്രായം കുറവായിരുന്നെന്നും ശ്രീവിദ്യ സൂചിപ്പിച്ചു.

പക്ഷെ ആ സമയത്ത്, അമ്മ തന്നെ സമീപിച്ച് കമലുമായുള്ള ബന്ധത്തെക്കുറിച്ച് നൽകിയ ഉപദേശം അവർ ഓർത്തെടുത്തു. "അന്ന് അമ്മ പറഞ്ഞു - "നിങ്ങൾക്ക് ഒരു 4-5 വർഷം കാത്തിരുന്നുകൂടെ? കമൽ, നീ ഒരു വലിയ കലാകാരനാകാൻ പോകുന്നവനാണ്. ഈ ഇൻഡസ്ട്രിയിലെ ഏറ്റവും വലിയ നടന്മാരിൽ ഒരാളായി നീ മാറും. ശ്രീവിദ്യയും കഴിവുള്ളവളാണ്, വലിയ നിലയിലെത്തും. പിന്നീട്, ഒരുപക്ഷേ ഇതിലും നല്ല ആളുകളെ നിങ്ങൾ കണ്ടുമുട്ടിയേക്കാം. ആ സമയത്ത്, നിങ്ങളുടെ ഇപ്പോഴത്തെ തീരുമാനങ്ങളിൽ നിങ്ങൾക്ക് ഖേദം തോന്നരുത്. നിങ്ങൾക്ക് ഇപ്പോൾ വെറും 22 വയസ്സേ ഉള്ളൂ. എന്തിനാണ് ധൃതി വയ്ക്കുന്നത്? വിവാഹം കഴിക്കാനുള്ള പ്രായമായിട്ടില്ല നിങ്ങൾക്ക്" - അമ്മ പറഞ്ഞത് വളരെ ശരിയായിരുന്നു," ശ്രീവിദ്യ ഓർത്തെടുത്തു.

കമലിനോട് ഈ തീരുമാനം പറഞ്ഞപ്പോൾ അദ്ദേഹം അസ്വസ്ഥനാകുകയും ഇത് ശ്രീവിദ്യയുടെ അന്തിമ തീരുമാനമാണോ എന്ന് ചോദിക്കുകയും ചെയ്തു. അതിനു ശേഷം, വളരെക്കാലം ഒരു താരത്തിലും കോൺടാക്ട് ചെയ്യാതെ അദ്ദേഹം പിന്തിരിഞ്ഞു നടന്നു. ഒടുവിൽ ഇരുവരും തമ്മിലുള്ള ബന്ധം പൂർണ്ണമായി വേർപിരിയുകയും കമൽ പിന്നീട് വാണി ഗണപതിയെ വിവാഹം കഴിക്കുകയും ചെയ്തു.