പ്രോ​ഗ്രാം ഏറ്റാൽ ഞാൻ ചത്തില്ലെങ്കിൽ ഉറപ്പായും എത്തും, അന്ന് ഓപ്പറേഷന് പിന്നാലെ ഷോ; സുബിയുടെ വാക്കുകൾ

കോമഡി വേദികളിൽ നിന്നുമാണ് സുബി സുരേഷ് സിനിമാ രം​ഗത്തേക്ക് കടക്കുന്നത്. എന്നാൽ അവസാന നാൾ വരെയും കോമഡി ഷോകളോട് സുബി മുഖം തിരിച്ചിരുന്നില്ല. വർഷങ്ങൾ നീണ്ട കരിയറിൽ വിദേശത്തുൾപ്പെടെ നിരവധി ഷോകളിൽ സുബി സുരേഷ് പങ്കെടുത്തു.

കോമഡി പ്രോ​ഗ്രാമുകളോട് തനിക്കുള്ള ആത്മാർത്ഥതയെക്കുറിച്ച് സുബി മുമ്പൊരിക്കൽ സംസാരിച്ചിരുന്നു. കൈരളി ടിവിയിലെ ജെബി ജം​ഗ്ഷൻ എന്ന പ്രോ​ഗ്രാമിൽ വെച്ചായിരുന്നു ഇത്.

'സിനിമ കിട്ടിയില്ലല്ലോ എന്ന തോന്നലൊന്നും എനിക്കില്ലായിരുന്നു. ഞാൻ സിനിമ ചെയ്യണമെന്ന് എന്നേക്കാൾ കൂടുതൽ അമ്മയ്ക്കായിരുന്നു. ആ​ഗ്രഹം. അമ്മ പറഞ്ഞാൽ ഞാൻ കേൾക്കും. അങ്ങനെ ഓഫർ വന്നപ്പോൾ സിനിമ ചെയ്തു. കുറെ സിനിമകൾ എനിക്ക് ചെയ്യാൻ പറ്റാതെ പോയി'

'അതിന് കാരണം പ്രോ​ഗ്രാമുകൾ തന്നെയാണ്. പത്ത് ദിവസത്തെ ഡേറ്റ് ചോദിക്കുമ്പോൾ അതിനിടയിൽ ഒന്നോ രണ്ടോ പ്രോ​ഗ്രാമുകളുണ്ടാവും. ചില പ്രോ​ഗ്രാമുകൾ ചെയ്ത് ഒത്തിരി ഞാൻ ബുദ്ധിമുട്ടിയിട്ടുണ്ട്. അവരെയും ബുദ്ധിമുട്ടിച്ചിട്ടുണ്ട്. അഞ്ച് മണിക്ക് ഷൂട്ട് കഴിഞ്ഞ് വിട്ടേക്കാമെന്ന് പറയും'

'101 വെഡ്ഡിം​ഗിസിൽ പിറ്റേ ദിവസം രാവിലെ ജോയിൻ ചെയ്യണമെന്ന് പറഞ്ഞപ്പോൾ ഞാൻ‌ ​ഗോവയിലാണ്. രാത്രി മൊത്തം എന്റെ അനിയൻ ഡ്രെെവ് ചെയ്താണ് ലൊക്കേഷനിലെത്തുന്നത്. അത് കഴിഞ്ഞ് മൂന്നാമത്തെ ദിവസം എനിക്ക് പ്രോ​ഗ്രാമുണ്ട്, വൈകുന്നേരം അഞ്ച് മണിക്ക് വിടണമെന്ന് പറഞ്ഞു'

'സിനിമാ ഷൂട്ടിം​ഗ് ഒരിക്കലും പറഞ്ഞ സമയത്ത് തീർക്കാൻ പറ്റില്ല. അപ്പോൾ ഞാനവരെ ടെൻഷനടിപ്പിക്കുന്നു, ചില സീനുകളിൽ നിന്ന് കട്ടാവുന്നു. അങ്ങനെ കുറേ ബുദ്ധിമുട്ടുകൾ ഞാനവർക്കും അവരെനിക്കും ഉണ്ടാക്കിയിട്ടുണ്ട്. പ്രോ​ഗ്രാമേറ്റാൽ എനിക്ക് ചെല്ലാതിരിക്കാൻ പറ്റില്ല'

'സിനിമയുടെ ഡേറ്റ് നോക്കി ഞാൻ പ്രോ​ഗ്രാം ഇതുവരെ കളഞ്ഞിട്ടില്ല. ഒരു പ്രോ​ഗ്രാം ഏറ്റാൽ ഞാൻ ചത്തില്ലെങ്കിൽ അവിടെ എത്തിയിരിക്കും. യെമനിൽ പ്രോ​ഗ്രാം ചെയ്യാൻ പോവുമ്പോൾ ഞാനൊരു കീ ഹോൾ ഓപ്പറേഷൻ കഴിഞ്ഞ് ആശുപത്രിയിൽ അഡ്മിറ്റാണ്'

'ഞങ്ങൾ നാല് പേരെ പ്രോ​ഗ്രാമിലുള്ളൂ. കീ ​ഹോൾ കഴിഞ്ഞ് നാലാമത്തെ ദിവസം ഡോക്ടർ വിടില്ലെന്ന് പറഞ്ഞിട്ടും സ്വന്തം ഇഷ്ടപ്രകാരം പോവുന്നെന്ന് എഴുതിക്കൊടുത്ത് ഞാൻ പ്രോ​ഗ്രാമിന് പോയി,' സുബി സുരേഷ് പറഞ്ഞതിങ്ങനെ.

സുബിക്ക് ആദരാഞ്ജലികളർപ്പിച്ച് നിരവധി പേർ സോഷ്യൽ മീഡിയയിൽ ഓർമ്മകൾ പങ്കുവെക്കുന്നുണ്ട്, കോമഡി ഷോകളിൽ പണ്ട് മുതലേ സാന്നിധ്യമറിയിച്ച ചുരുക്കം വനിതകളിലൊരാളാണ് സുബി സുരേഷ്.

ചെയ്ത് സിനിമകൾ കുറവാണെങ്കിലും ടെലിവിഷൻ രം​ഗത്ത് സുബി സജീവമായിരുന്നു. യൂട്യൂബ് ചാനലിലൂടെ തന്റെ പല വിശേഷങ്ങളും സുബി സുരേഷ് പങ്കുവെക്കാറുണ്ടായിരുന്നു. സുബി കഴിഞ്ഞ കുറച്ച് നാളുകളായി ചികിത്സയിലാണെന്ന് പലർക്കും അറിയില്ലായിരുന്നു.