'ഈ ലോകത്ത് പൈസ ഇല്ലെങ്കിൽ ഒന്നുമില്ലെന്ന് മനസിലാക്കി, അവർ ഒപ്പം നിൽക്കുന്നത് അതുകൊണ്ടാണെന്ന് തോന്നാറുണ്ട്'

മലയാളി പ്രേക്ഷകരുടെ കൺമുന്നിൽ വളർന്ന പ്രതിഭയാണ് നടിയും ഡാൻസറും മോഡലുമെല്ലാമായ സാനിയ അയ്യപ്പൻ. ഡാൻസ് റിയാലിറ്റി ഷോകളാണ് കുടുംബപ്രേക്ഷകർക്കിടയിൽ പോലും സാനിയ സുപരിചിതയാകാൻ കാരണം. അതിന് പുറമെ മോഡലിങിലും തിളങ്ങി. നിരവധി ഫാഷൻ ഷോകളുടെയും ഭാ​ഗമായിട്ടുള്ള നടി സ്കൂൾ വിദ്യാർത്ഥിനിയായിരിക്കുമ്പോൾ മുതൽ മിനിസ്ക്രീനിൽ സജീവമാണ്. ജീവശ്വാസമായി സാനിയ കരുതുന്ന നൃത്തം തന്നെയാണ് നടിക്ക് സിനിമയിലേക്കുള്ള വഴി തുറന്ന് കൊടുത്തതും.

പണ്ട് മുതൽ ഡാൻസായിരുന്നു സാനിയയുടെ പാഷൻ. സിനിമ സ്വപ്നങ്ങളിൽ പോലും ഉണ്ടായിരുന്നില്ല. പക്ഷെ അഭിനയിക്കാനുള്ള അവസരങ്ങൾ ലഭിച്ചപ്പോൾ സാനിയയും അത് ഉപയോ​ഗിച്ചു. തുടക്കം ബാലതാരമായിട്ടായിരുന്നു. ഡാൻസ് റിയാലിറ്റി ഷോയിലൂടെയാണ് അപ്പോത്തിക്കിരിയിലും ബാല്യകാലസഖിയിലും ബാലതാരമായി സാനിയ അഭിനയിക്കുന്നത്.

വലിയ സ്ക്രീൻ സ്പേസുള്ള കഥാപാത്രമായിരുന്നില്ലെങ്കിലും തന്നാൽ കഴിയും വിധം മനോഹരമാക്കാൻ സാനിയ ശ്രമിച്ചു. ഈ രണ്ട് സിനിമകളും റിലീസ് ചെയ്ത് കുറച്ച് വർഷങ്ങൾ കൂടി പിന്നിട്ടശേഷമാണ് നായികയായി റീ എൻട്രി സാനിയ നടത്തുന്നത്. ക്വീൻ എന്ന സിനിമയിൽ നായികയായി അഭിനയിക്കുമ്പോൾ താരം ഒമ്പതാം ക്ലാസിൽ പഠിക്കുകയായിരുന്നു. ആ പടം റിലീസായപ്പോൾ പത്താം ക്ലാസിലെത്തി.

സിനിമ ഹിറ്റായെങ്കിലും സാനിയയുടെ ചിന്നുവെന്ന കഥാപാത്രത്തിന് ഒരുപാട് ട്രോൾ കിട്ടി. ഇപ്പോഴും സാനിയ ചെയ്ത കഥാപാത്രം ട്രോൾ മെറ്റീരിയലായി സോഷ്യൽമീഡിയ ഭരിക്കുന്നുണ്ട്. ആദ്യമായി നായികയായ സിനിമയിലെ കഥാപാത്രം മൂലം താനൊരു പരി​ഹാസ കഥാപാത്രമായിയെന്ന തോന്നൽ പോലും ആ കൗമാരക്കാരിക്ക് വന്നു. അതുകൊണ്ട് തന്നെ ഇനി സിനിമയുടെ ഏരിയയിലേക്ക് പോലുമില്ലെന്ന് തീരുമാനിക്കുകയും ചെയ്തിരുന്നു.

എന്നാൽ ആ തീരുമാനത്തിൽ നിന്നും സാനിയ പിന്മാറാൻ പൃഥ്വിരാജിന്റെ ഒറ്റ കോൾ ധാരളമായിരുന്നു. ലൂസിഫറിൽ മഞ്ജു വാര്യരുടെ മകളുടെ വേഷം ചെയ്തശേഷമാണ് സിനിമ ഉപേക്ഷിക്കേണ്ടതില്ലെന്ന് സാനിയയ്ക്ക് തോന്നി തുടങ്ങിയത്. ലൂസിഫറിനു ശേഷമാണ് നടി സിനിമയെ സീരിയസായി കാണാൻ തുടങ്ങിയത്. ഇന്ന് മലയാളത്തിൽ മാത്രമല്ല തമിഴ് സിനിമയിലും സാനിയ സജീവമാണ്. ഇതിനോടകം ചെയ്ത സിനിമകളെല്ലാം ശ്രദ്ധിക്കപ്പെടുകയും ചെയ്തു.

ഒരു മിഡിൽ ക്ലാസ് ഫാമിലിയിൽ നിന്നും സ്വപ്നങ്ങൾക്ക് പിന്നാലെ സഞ്ചരിച്ചാണ് സാനിയ ഇന്ന് കാണുന്ന വിജയങ്ങളും സന്തോഷവും എല്ലാം നേടിയെടുത്തത്. ഇരുപത്തിരണ്ടുകാരിയായ സാനിയ അഭിനയം, നൃത്തം, മോഡ‍ലിങ് എന്നിവയിലൂടെയെല്ലാം ലക്ഷങ്ങളാണ് ഇപ്പോൾ സമ്പാദിക്കുന്നത്.

പൈസ ഇല്ലെങ്കിൽ ഈ ലോകത്ത് ഒന്നുമില്ലെന്നത് താൻ മനസിലാക്കിയെന്ന് പറയുകയാണിപ്പോൾ നടി. കുറച്ച് മാസങ്ങൾക്ക് മുമ്പ് ഐ ആം വിത്ത് ധന്യ വർമ എന്ന യുട്യൂബ് ചാനലിന് നൽകിയ അഭിമുഖത്തിലാണ് താൻ ജീവിത്തതിൽ നിന്നും മനസിലാക്കിയ ചില കാര്യങ്ങളെ കുറിച്ച് നടി വാചാലയായത്. സാനിയ അയ്യപ്പന്റെ വാക്കുകളിലൂടെ തുടർന്ന് വായിക്കാം... ഞാൻ മനസിലാക്കിയ ഒരു കാര്യം ഈ ലോകത്ത് പൈസ ഇല്ലെങ്കിൽ ഒന്നുമില്ലെന്നതാണ്.

ഇക്കാര്യം ഞാൻ അടുത്തിടെയാണ് മനസിലാക്കിയത്. അത് എന്തുകൊണ്ടാണെന്ന് ചോ​ദിച്ചാൽ ഞാൻ ഒരു നോർമൽ ​ഗേൾ ആയിരുന്നുവെങ്കിൽ വെറുമൊരു സാനിയ അയ്യപ്പൻ മാത്രമായിരുന്നുവെങ്കിൽ, ചുമ്മ സ്കൂളിൽ പോയി പഠിച്ചിറങ്ങിയ ഒരു കുട്ടിയായിരുന്നുവെങ്കിൽ ഇന്ന് ഇപ്പോൾ എന്റെ കൂടെയുള്ള പല ആൾക്കാരും എന്റെ ഒപ്പം ഉണ്ടാകുമായിരുന്നില്ല. ഞാൻ അവരെ ഒരിക്കലും ജഡ്ജ് ചെയ്ത് പറയുകയല്ല.

പക്ഷെ ചിലപ്പോഴൊക്കെ എനിക്ക് അത്തരത്തിലൊരു വൈബ് ആളുകളിൽ നിന്നും കിട്ടാറുണ്ട്. ഞാൻ ഇന്നതായതുകൊണ്ടാണ് അവരൊക്കെ എനിക്ക് ഒപ്പം ഇപ്പോൾ നിൽക്കുന്നതെന്ന് തോന്നാറുണ്ട്. എനിക്ക് എന്തെങ്കിലുമൊക്കെ ചെയ്യാൻ കഴിയുമെന്ന് അവർക്ക് അറിയാം എന്നാണ് സാനിയ പറഞ്ഞത്. നടിയുടെ വാക്കുകൾ ശരിയാണെന്നാണ് പ്രേക്ഷക പ്രതികരണങ്ങൾ.