യുവകൃഷ്ണ മൃദുലയ്ക്ക് സ്വന്തം, രോഹിത്തിന്റെ കൈപിടിക്കാന്‍ എലീന പടിക്കല്‍, ഇനിയങ്ങോട്ട് വിവാഹമേളമാണ്

യുവയും മൃദുലയും

മിനിസ്‌ക്രീന്‍ പ്രേക്ഷകര്‍ക്ക് പരിചിതരായ താരങ്ങളാണ് യുവകൃഷ്ണയും മൃദുല വിജയും. സീരിയലിനായി ഇതുവരെ ഒരുമിച്ചിട്ടില്ലെങ്കിലും ജീവിതത്തില്‍ ഒന്നിക്കുകയാണ് ഇരുവരും. കഴിഞ്ഞ ദിവസമായിരുന്നു ഇവരുടെ വിവാഹവാര്‍ത്ത പുറത്തുവന്നത്. പക്കാ അറേഞ്ചഡാണ് വിവാഹമെന്നും ഇവര്‍ പറഞ്ഞിരുന്നു. രേഖ രതീഷ് വഴിയാണ് യുവയുടെ ആലോചന വന്നത്. ജാതകം ചേര്‍ന്നതോടെയാണ് വിവാഹം തീരുമാനമായത്. സ്റ്റാര്‍ മാജിക്കില്‍ അദ്ദേഹവും വന്നിട്ടുണ്ടെങ്കിലും ഇതുവരെ ഒരുമിച്ച് പരിപാടി ചെയ്തിട്ടില്ലെന്നായിരുന്നു മൃദുല പറഞ്ഞത്. ജനുവരിയിലായിരിക്കും ഇവരുടെ വിവാഹമെന്നുള്ള വിവരങ്ങളും പുറത്തുവന്നിരുന്നു.

പ്രണയമല്ല

പ്രണയവിവാഹമായിരിക്കും ഇവരുടേതെന്നായിരുന്നു ആരാധകര്‍ കരുതിയത്. വിവാഹ വാര്‍ത്ത വൈറലായി മാറിയതിന് ശേഷമായാണ് പ്രതികരണവുമായി താരങ്ങളെത്തിയത്. ഞങ്ങള്‍ ഇരുവര്‍ക്കുമിടയിലെ കോമണ്‍ സുഹൃത്താണ് രേഖ രതീഷ്. നിങ്ങള്‍ക്ക് ഒന്നിച്ചൂടേയെന്ന് യുവന്‍ ചേട്ടനോട് ചോദിച്ചത് ചേച്ചിയായിരുന്നു. നോക്കാമെന്ന് കരുതുകയായിരുന്നു പിന്നീട്. വീട്ടുകാര്‍ സംസാരിച്ച്, ജാതകം നോക്കി തീരുമാനിക്കുകയായിരുന്നു. പരിചയപ്പെട്ട് ഒരു വര്‍ഷം കഴിയുന്നതിനിടയിലാണ് വിവാഹം തീരുമാനമായതെന്നും മൃദുല പറഞ്ഞിരുന്നു.

എലീനയുടെ വിവാഹം

ബിഗ് ബോസിലൂടെയാണ് എലീന പടിക്കലിനെക്കുറിച്ച് പ്രേക്ഷകര്‍ കൂടുതല്‍ മനസ്സിലാക്കിയത്. വിവാഹ ജീവിതത്തിലേക്ക് പ്രവേശിക്കാന്‍ പോവുകയാണ് താനെന്ന് വ്യക്തമാക്കിയായിരുന്നു എലീന എത്തിയത്. കോമഡി സ്റ്റാര്‍സില്‍ അതിഥിയായി പങ്കെടുത്തപ്പോഴായിരുന്നു എലീന വിവാഹത്തെക്കുറിച്ച് പറഞ്ഞത്. 6 വര്‍ഷത്തിന് ശേഷം പ്രണയം വിവാഹത്തിലേക്ക് എത്തുകയാണ്. എതിര്‍പ്പുകളെല്ലാം മാറ്റി എന്റെ വീട്ടുകാര്‍ വിവാഹത്തിന് സമ്മതിച്ചിരിക്കുകയാണെന്നായിരുന്നു താരം പറഞ്ഞത്.

6 വര്‍ഷത്തെ പ്രണയം

കോഴിക്കോട്ടുകാരനായ രോഹിത്ത് നായരാണ് എലീനയെ വിവാഹം ചെയ്യുന്നത്. 6 വര്‍ഷമായി ഇവര്‍ പ്രണയത്തിലായിട്ട്. വീട്ടുകാര്‍ സമ്മതിക്കാതെ വിവാഹത്തിലേക്ക് കടക്കില്ലെന്ന് തുടക്കത്തിലേ പറഞ്ഞിരുന്നു. രോഹിത് ഹിന്ദുവായതും ബിസിനസിലേക്ക് തിരിഞ്ഞതുമായിരുന്നു വീട്ടുകാര്‍ക്ക് പ്രശ്‌നമായി തോന്നിയത്. ബിസിനസുകാരനാവുമ്പോള്‍ ജീവിതത്തില്‍ ടെന്‍ഷനൊക്കെയുണ്ടാവും, ക്രിസത്യന്‍ കുടുംബമായതിനാല്‍ ആവശ്യത്തിന് സ്വാതന്ത്ര്യമൊക്കെ തന്നാണ് വളര്‍ത്തിയത്. ഈ വക കാര്യങ്ങളൊക്കെയായിരുന്നു മാതാപിതാക്കളുടെ വിയോജിപ്പിന് കാരണമെന്നും എലീന പറഞ്ഞിരുന്നു.