36 വയസ്സിന്‍റെ പ്രായവ്യത്യാസം! വാശിപ്പുറത്താണ് കെ.ടിയെ വിവാഹം ചെയ്തത്! വെളിപ്പെടുത്തലുമായി സീനത്ത്

നാടകീയത മുഹൂര്‍ത്തങ്ങള്‍ ജീവിതത്തിലും

നാടകത്തില്‍ നിന്നുമാണ് സീനത്ത് സിനിമയിലേക്കെത്തിയത്. കാലജീവിതത്തിലെപ്പോലെ തന്നെ തന്റെ ജീവിതത്തിലും നാടകീയത നിറഞ്ഞ രംഗങ്ങളായിരുന്നു ആവര്‍ത്തിച്ചതെന്ന് താരം പറയുന്നു. അതീവ നാടകീയത നിറഞ്ഞ കാര്യങ്ങളായിരുന്നു അരങ്ങേറിയിരുന്നത്. പക്വതയില്ലാത്ത പ്രായത്തിലായിരുന്നു ഇതൊക്കെ സംഭവിച്ചത്. 18മാത്തെ വയസ്സിലാണ് 54 വയസ്സുള്ള കെടി മുഹമ്മദിനെ വിവാഹം ചെയ്തതെന്ന് താരം പറയുന്നു.

കെടി മുഹമ്മദിനെ കണ്ടത്

കോഴിക്കോട്ടെ കലിംഗ തിയേറ്റേഴ്‌സില്‍ വെച്ചാണ് താന്‍ കെടി മുഹമ്മദിനെ കണ്ടതും പരിചയപ്പെട്ടതുമെന്ന് സീനത്ത് ഓര്‍ത്തെടുക്കുന്നു. അതുവരെയുള്ള ശൈലിയില്‍ നിന്നും വിഭിന്നമായാണ് അദ്ദേഹം നാടകമൊരുക്കിയിരുന്നത്. നാടക ലോകത്ത് വന്‍മാറ്റങ്ങള്‍ കൊണ്ടുവന്ന അദ്ദേഹം പ്രശസ്തിയുടെ കൊടുമുടിയില്‍ നില്‍ക്കുന്ന സമയം കൂടിയായിരുന്നു അത്. നാടകാചാര്യനായാണ് കെടിയെ വിശേഷിപ്പിക്കാറുള്ളത്.

വിവാഹം ചെയ്ത് തരാമോ?

അന്ന് അദ്ദേഹത്തിന് ചെറിയ തോതില്‍ ആസ്തമയുടെ പ്രശ്‌നമുണ്ടായിരുന്നു. മരുന്നൊക്കെ എടുത്ത് തരാമോയെന്ന് അദ്ദേഹം തന്നോട് ചോദിക്കാറുണ്ടായിരുന്നു. അതിനിടയിലെപ്പൊഴോ താന്‍ അദ്ദേഹത്തെ ശ്രദ്ധിച്ച് തുടങ്ങുകയായിരുന്നു. അദ്ദേഹത്തിന്റെ ആ ശൈലിയോട് അങ്ങനെയാണ് ഇഷ്ടം തോന്നിത്തുടങ്ങിയത്. താന്‍ പോലുമറിയാതെ ഒരിഷ്ടം രൂപപ്പെടുകയായിരുന്നു അപ്പോള്‍. അതിനിടയിലാണ് അദ്ദേഹം തന്നെ വിവാഹം ചെയ്ത് തരാമോ എന്ന് ഇളയമ്മയോട് ചോദിച്ചത്.

നാടകസമതിയില്‍ നിന്നും പിരിച്ചുവിട്ടു

പെട്ടെന്നൊരു ദിവസം അദ്ദേഹം അങ്ങനെ ചോദിച്ചപ്പോള്‍ തനിക്കത് ഉള്‍ക്കൊള്ളാനായില്ലെന്നും സീനത്ത് പറയുന്നു. പ്രായമായിരുന്നു പ്രധാന പ്രശ്‌നമായി തോന്നിയത്. ഇതിനിടയിലാണ് താന്‍ കെടിയെ വിവാഹം ചെയ്യാന്‍ പോവുന്നുവെന്നുള്ള പ്രചാരണങ്ങളും തുടങ്ങിയത്. ഗള്‍ഫില്‍ ജോലി ചെയ്യുന്ന ഒരാളുമായി വിവാഹം ഉറപ്പിച്ച സമയം കൂടിയായിരുന്നു അത്. താന്‍ അപ്പോള്‍ കെടിയോട് സംസാരിക്കാറില്ലായിരുന്നുവെന്നും സീനത്ത് പറയുന്നു. ഇതിനിടയിലാണ് തന്നേയും ഇളയമ്മയേയും നാടകസമിതിയില്‍ നിന്നും പിരിച്ചുവിട്ടത്.

വാശിയോടെ സമ്മതം മൂളി

തങ്ങളെ പിരിച്ചുവിടുന്നതിന് കാരണമായി പറഞ്ഞത് കെടിയുമായുള്ള ബന്ധമായിരുന്നു. ഈ സമയത്താണ് അദ്ദേഹത്തിന് ഫിലിം ഡവലപ്‌മെന്റ് കോര്‍പ്പറേഷനില്‍ ചെയര്‍മാനായി നിയമനം ലഭിച്ചത്. ആ വാശിയില്‍ അദ്ദേഹത്തെ വിവാഹം ചെയ്യാന്‍ സമ്മതമാണെന്ന് അറിയിക്കുകയായിരുന്നു. ഒരിക്കലും മാറാത്ത തരത്തിലുള്ള ഉറച്ച തീരുമാനമായിരുന്നു അത്.

പക്വതയില്ലാത്ത പ്രായത്തിലെ തീരുമാനം

ഞങ്ങള്‍ തമ്മിലുള്ള പ്രായവ്യതാസത്തെക്കുറിച്ച് ആളുകള്‍ പറയുന്നത് മനസ്സിലാക്കാനുള്ള അറിവോ പക്വതയോ അന്ന് തനിക്കുണ്ടായിരുന്നിലെന്നും സീനത്ത് പറയുന്നു. 16 വര്‍ഷത്തെ ആയുസ്സായിരുന്നു തങ്ങള്‍ തമ്മിലുള്ള ദാമ്പത്യത്തിനുണ്ടായിരുന്നതെന്നും സീനത്ത് പറയുന്നു.