തടി കൂട്ടാന്‍ പറ്റില്ലെന്ന് തൃഷ

ഫിറ്റ്‌നസിന്റെ കാര്യത്തില്‍ വിട്ടുവീഴ്ചയില്ലാത്ത താരമാണ് തൃഷ. ലേശം മാദകത്വമുള്ള നടിമാരോട് കൂടുതല്‍ ഇഷ്ടം തോന്നുന്ന തെന്നിന്ത്യന്‍ പ്രേക്ഷകരുടെ മനം കവരാന്‍ മെലിഞ്ഞ ശരീരപ്രകൃതി വെച്ച് തൃഷയ്ക്ക് കഴിഞ്ഞിട്ടുണ്ട്. ഇതൊക്കെ കൊണ്ട് തന്നെ ശരീര സൗന്ദര്യം നിലനിര്‍ത്തുന്ന കാര്യത്തില്‍ എന്തൊക്കെ ചെയ്യാന്‍ പറ്റുമോ അതിനെല്ലാം ഈ നടി തുനിഞ്ഞിറങ്ങാറുണ്ട്.

ഈയിടെ പുതിയ തമിഴ് ചിത്രമായ 'മന്മഥന്‍ അമ്പി'ന് വേണ്ടി തൃഷ ലേശം തടി കൂട്ടണമെന്ന് സംവിധായകന്‍ കെഎസ് രവികുമാര്‍ പറഞ്ഞിരുന്നു. എന്നാല്‍ സംവിധായകന്റെ ഈയാവശ്യത്തിന് അറുത്തുമുറിച്ചൊരു നോ ആയിരുന്നത്രേ തൃഷയുടെ മറുപടി. മറ്റെന്തിന് തയാറായാലും തടി കൂട്ടുന്ന കാര്യം ആലോചിയ്ക്കുകയേ ഇല്ലെന്നാണ് തൃഷ പറയുന്നത്. സൈസ് സീറോ നടിമാര്‍ വാഴുന്ന ബോളിവുഡില്‍ കാലുറപ്പിയ്ക്കാന്‍ ശ്രമിയ്ക്കുന്ന തൃഷ ഇതല്ലാതെ എന്ത് പറയും?

പട്ടിണിക്കോലം പോലെയുള്ള സൈസ് സീറോ ഭ്രമം തലയ്ക്ക് പിടിച്ച മറ്റൊരു നടി ലക്ഷ്മി റായി ആണത്രേ. ബോളിവുഡ് ലക്ഷ്യമിടുന്ന ലക്ഷ്മി ആയുര്‍വേദ ട്രീറ്റ്‌മെന്റിലൂടെ തന്റെ ബബ്ലി ബോഡി ഉപേക്ഷിയ്ക്കാനുള്ള ശ്രമത്തിലാണ്. ലക്ഷ്മി ചെന്നൈ വിട്ട് മുംബൈയിലേക്ക് താമസം മാറ്റിയത് ബോളിവുഡില്‍ കൂടുതല്‍ അവസരം തേടിയാണെന്നും കോടമ്പാക്കത്ത് വാര്‍ത്തകളുണ്ട്.