സ്വത്തുക്കൾ പണയം വെച്ച് ലോൺ എടുത്ത് പ്രഭാസ്? നടന് സംഭവിക്കുന്നതെന്തെന്ന് ആരാധകർ

പ്രഭാസിന്റെ താരമൂല്യവും പ്രതിഫലവും കരിയർ ​ഗ്രാഫും കുത്തനെ ഉയർന്നു. ഇന്ന് തെലുങ്കിൽ ഏറ്റവും വില പിടിപ്പുള്ള നായക നടൻ ആണ് പ്രഭാസ്. പ്രൊജക്ട് കെ, സലാർ‌ തുടങ്ങിയവ ആണ് പ്രഭാസിന്റേതായി പുറത്തിറങ്ങാനുള്ള സിനിമകൾ. ബി​ഗ് ബജറ്റ് സിനിമകളിൽ ഇതുവരെ കാണാത്ത വേഷത്തിലാണ് പ്രഭാസ് എത്തുന്നതെന്നാണ് വിവരം.

Also Read: 'എന്നെ അറസ്റ്റ് ചെയ്തുവെന്ന വാർത്ത ഞാൻ‌ തന്നെ ടിവിയിൽ കണ്ടു, ഞാൻ മോശക്കാരനാണെന്ന് ​പറഞ്ഞ് നടക്കുന്നു'; സുധീർ

അതേസമയം ബാഹുബലിക്ക് ശേഷം അതേ പോലൊരു ഹിറ്റ് പ്രഭാസിന് ലഭിച്ചിട്ടില്ല. ഇതും വലിയ ചർച്ചാ വിഷയമാവാറുണ്ട്. ബാഹുബലിയിലൂടെ ലഭിച്ച താരമൂല്യമാണ് നടനെ ഇന്നും ഈ പ്രശസ്തിയിൽ നിലനിർത്തുന്നതെന്നാണ് ഒരു വിഭാ​ഗം പറയുന്നത്. ഇതിന് ശേഷം ഇറങ്ങിയ നടന്റെ ഒരു സിനിമയ്ക്കും വേണ്ടത്ര സ്വീകാര്യത ലഭിച്ചിട്ടില്ല.

രാധേ ശ്യാം എന്ന സിനിമ വൻ പരാജയം ആയിരുന്നു. സാഹോയും വേണ്ടത്ര ശ്രദ്ധിക്കപ്പെട്ടില്ല. വരാനിരിക്കുന്ന ആദിപുരുഷ് എന്ന സിനിമയ്ക്ക് നേരെയും വ്യാപക വിമർശനം വന്നു. കാർട്ടൂണിന് സമാനമായ വിഎഫ്എക്സ് ആണ് സിനിമയിൽ ഉപയോ​ഗിച്ചിരിക്കുന്നതെന്നാണ് ടീസർ കണ്ട ശേഷം പ്രേക്ഷകർ അഭിപ്രായപ്പെടുന്നത്.

ഇപ്പോഴിതാ പ്രഭാസിനെക്കുറിച്ച് പുതിയാെരു വിവരമാണ് തെലുങ്ക് മാധ്യമങ്ങളിലൂടെ പുറത്ത് വരുന്നത്. തന്റെ സ്വത്തുക്കളിൽ ചിലത് വെച്ച് ലോൺ എടുത്തിരിക്കുകയാണത്രെ പ്രഭാസ്. 21 കോടിയുടെ ലോൺ ആണ് എടുത്തതെന്നാണ് റിപ്പോർട്ട്.

പ്രഭാസിനെ പോലെ വലിയൊരു താരം എന്തിനാണ് 21 കോടിയുടെ ലോൺ എടുക്കുന്നതെന്നാണ് സോഷ്യൽ മീഡിയയിലെ ചോദ്യം. നടൻ ഒരു സിനിമയ്ക്ക് വാങ്ങുന്ന പ്രതിഫലം നൂറ് കോടിയോളമാണ്. നടൻ ബിസിനസിൽ ഇൻവെസ്റ്റ് ചെയ്യുകയാണെന്നും അഭ്യൂഹമുണ്ട്. രാധേ ശ്യാം എന്ന സിനിമയുടെ പരാജയത്തിന് ശേഷം പ്രഭാസിന്റെ മാർക്കറ്റിൽ ഇടിവ് വന്നിരുന്നു. ‌

പൊതുവെ വാണിജ്യ സിനിമകളുടെ വിളനിലമായ തെലുങ്ക് സിനിമയിൽ പ്രഭാസിന്റെ ഒരു സിനിമയ്ക്ക് വരുന്ന മുടക്കു മുതൽ കോടികളാണ്. 500 കോടി ആണത്രെ പ്രൊജക്ട് കെ എന്ന സിനിമയുടെ ബജറ്റ്. തുടരെ വന്ന സിനിമകൾ പരാജയപ്പെട്ട സാഹചര്യത്തിൽ ഒരു വിജയം പ്രഭാസിനെ സംബന്ധിച്ച് അനിവാര്യമാണ്.

ആദിപുരുഷ് പരാജയപ്പെട്ടാൽ നടന്റെ കരിയറിനെ വലിയ തോതിൽ ബാധിച്ചേക്കും. രാമായണ കഥ പശ്ചാത്തലത്തിൽ ഒരുങ്ങുന്ന സിനിമയിൽ സെയ്ഫ് അലി ഖാൻ, കൃതി സനോൻ തുടങ്ങിയവരും അഭിനയിക്കുന്നു.

ഓം റൗത്ത് ആണ് സിനിമ സംവിധാനം ചെയ്തിരിക്കുന്നത്. പ്രൊജക്ട് കെയിൽ ദീപിക പദുകോൺ, അമിതാഭ് ബച്ചൻ എന്നിവരും പ്രഭാസിനൊപ്പം അഭിനയിക്കുന്നു. മലയാള നടൻ പൃഥിരാജ് ആണ് സലാറിൽ പ്രഭാസിനൊപ്പം എത്തുന്നത്. പ്രഭാസിന്റെ ശക്തമായ തിരിച്ചു വരവിനായി കാത്തിരിക്കുകയാണ് ആരാധകർ.