ഇത് പൊളിക്കും! കാത്തിരിപ്പിന് വിരാമമിട്ട് ബിലാല്‍ ജോണ്‍ കുരിശ്ശിങ്കല്‍ എത്തുന്നു! കാണാം

ബിഗ്ബി

നിരവധി ഹിറ്റ് ചിത്രങ്ങളിലൂടെ മലയാളത്തില്‍ ശ്രദ്ധേയനായ സംവിധായകനാണ് അമല്‍ നീരദ്. ബിഗ്ബി മുതല്‍ കംമ്രേഡ് ഇന്‍ അമേരിക്ക വരെയുളള അമലിന്റെ ചിത്രങ്ങളെല്ലാം തന്നെ ഹിറ്റായി മാറിയിരുന്നു. സ്‌റ്റൈലിഷ് ലുക്കുകളിലെത്തുന്ന കഥാപാത്രങ്ങളും നായകന്റെ സ്ലോ മോഷന്‍ നടത്തവുമൊക്കെ അമല്‍ നീരദ് ചിത്രങ്ങളിലെ പതിവ് കാഴ്ചകളാണ്. ബിഗ് ബി എന്ന തന്റെ ആദ്യ ചിത്രവും ഇത്തരത്തിലായിരുന്നു അമല്‍ ഒരുക്കിയിരുന്നത്. മമ്മൂട്ടി ചെയ്ത ബിലാല്‍ എന്ന കഥാപാത്രത്തെ ആരാധകര്‍ നെഞ്ചിലേറ്റിയത് ഇക്കാരണത്താല്‍ ആയിരുന്നു. മമ്മൂട്ടിക്കൊപ്പം ബാല,മനോജ് കെ ജയന്‍, മംമ്താ മോഹന്‍ദാസ് തുടങ്ങിയ താരങ്ങളും മികച്ച പ്രകടനം കാഴ്ചവെച്ച ചിത്രമായിരുന്നു ബിഗ്ബി.

ബിലാല്‍ ജോണ്‍ കുരിശിങ്കല്‍

മമ്മൂക്കയുടെ കരിയറിലെ മികച്ച കഥാപാത്രങ്ങളിലൊന്നായാണ് ബിഗ്ബിയിലെ ബിലാല്‍ ജോണ്‍ കുരിശിങ്കല്‍ അറിയപ്പെടുന്നത്. ഭയവും സങ്കടവും ഒന്നുമില്ലാത്ത ഒരു കൂളായ കഥാപാത്രമായിരുന്നു ബിഗ് ബിയിലെ ബിലാല്‍. ഹോളിവുഡിലെ സൂപ്പര്‍ഹിറ്റ് ചിത്രങ്ങളിലൊന്നായ ഫോര്‍ ബ്രദേഴ്‌സില്‍ നിന്ന് പ്രചോദനം ഉള്‍ക്കൊണ്ടായിരുന്നു സംവിധായകന്‍ ഈ ചിത്രമൊരുക്കിയിരുന്നത്. അല്‍ഫോണ്‍സ് ജോസഫിന്റെ സംഗീതവും ഗോപീസുന്ദറിന്‌റെ ബാക്ഗ്രൗണ്ട് സ്‌കോറുമെല്ലാം തന്നെ ചിത്രത്തെ മറ്റൊരു ലെവലിലെത്തിച്ചിരുന്നു. ഉണ്ണി ആറിന്റെ തിരക്കഥയില്‍ ഒരുങ്ങിയ ചിത്രത്തില്‍ മമ്മൂട്ടിയുടെ ബിലാല്‍ ജോണ്‍ തന്നെയായിരുന്നു മികച്ചുനിന്നത്.

ബിലാലിന്റെ രണ്ടാംവരവ്

ബിഗ്ബിയ്ക്ക് രണ്ടാം ഭാഗം പ്രഖ്യാപിച്ചതു മുതല്‍ ആരാധകര്‍ വലിയ ആവേശത്തോടെയാണ് ചിത്രത്തിനായി കാത്തിരിക്കുന്നത്. ബിഗ്ബിയ്ക്ക് നല്‍കിയ അതേ സ്വീകാര്യത തന്നെയാണ് ചിത്രത്തിന്റെ രണ്ടാം ഭാഗത്തിനും ആരാധകര് നല്‍കുന്നത്. ആദ്യ ഭാഗത്തേക്കാള്‍ മികച്ചൊരു ചിത്രമായിരിക്കും ഇത്തവണ ഉണ്ടാവുക എന്നാണ് എല്ലാവരും പ്രതീക്ഷിക്കുന്നത്. ആദ്യ ഭാഗത്തിലെ ചില കഥാപാത്രങ്ങള്‍ ബിഗ്ബിയുടെ രണ്ടാം ഭാഗത്തിലും എത്തുന്നുണ്ടെന്നാണ് അറിയുന്നത്.

തരംഗമായ പ്രഖ്യാപനം

ബിഗ്ബിയുടെ പത്താം വാര്‍ഷികത്തിന് പിന്നാലെയായിരുന്നു ചിത്രത്തിന്റെ രണ്ടാം ഭാഗം വരുന്നുണ്ടെന്ന റിപ്പോര്‍ട്ടുകള്‍ വന്നത്. അമല്‍ നീരദ് തന്റെ ഫേസ്ബുക്കില്‍ ബിലാലിന്റെ പോസ്റ്റര്‍ പങ്കുവെച്ചപ്പോഴായിരുന്നു എല്ലാവരും രണ്ടാം ഭാഗത്തെക്കുറിച്ച് അറിഞ്ഞിരുന്നത്. പ്രേക്ഷകരും ആരാധകരും എറ്റെടുത്തതോടെ പ്രഖ്യാപനം സോഷ്യല്‍ മീഡിയയില്‍ തരംഗമായി മാറുകയായിരുന്നു. ആദ്യ ഭാഗം വളരെ ആഘോഷിക്കപ്പെട്ടിരുന്നെങ്കിലും ചിത്രത്തിന്റെ രണ്ടാം ഭാഗത്തിന് ഇത്രയുമധികം സ്വീകാര്യത ലഭിക്കുമെന്ന് കരുതിയല്ലായെന്നാണ് അമല്‍നീരദ് അന്ന് പറഞ്ഞത്.

രണ്ടാം വരവിന്റെ പ്രസക്തി

ആദ്യഭാഗം ആഘോഷിക്കപ്പെട്ടതുകൊണ്ട് മാത്രമല്ല ചിത്രത്തിന് രണ്ടാം ഭാഗം വരുന്നതെന്നാണ് സംവിധായകന്‍ അന്നു പറഞ്ഞത്. വളരെ കൗതകമുളള ഒരു ആശയം തനിക്ക് ലഭിച്ചിട്ടുണ്ടെന്നും ഇക്കാരണത്താലാണ് താന്‍ രണ്ടാം ഭാഗം ഒരുക്കുന്നതെന്നുമാണ് അമല്‍നീരദ് പറഞ്ഞത്. ചിത്രത്തിന്റെ വര്‍ക്കുകളിലാണ് ഉളളതെന്നും ചിത്രീകരണത്തിന് കൂടുതല്‍ സമയം ആവശ്യമാണെന്നും അമല്‍നീരദ് പറഞ്ഞിരുന്നു.

ബിലാലിന്റെ ഷൂട്ടിംഗ് ഉടന്‍

ആരാധകരെ ആവേശത്തിലാഴ്ത്തി ബിലാലിന്റെ ഷൂട്ടിംഗ് ഉടന്‍ തുടങ്ങുന്നുവെന്ന തരത്തില്‍ റിപ്പോര്‍ട്ടുകള്‍ വന്നിരിക്കുകയാണ്. ഫഹദ് ഫാസിലിനെ വെച്ചുളള ചിത്രത്തിന്റെ പോസ്റ്റ് പ്രൊഡക്ഷന്‍ വര്‍ക്കുകള്‍ കഴിഞ്ഞാലുടന്‍ അമല്‍ നീരദ് ബിലാല്‍ തുടങ്ങുമെന്നാണ് അറിയുന്നത്. തരംഗമായ ഒരു പോസ്റ്ററായിരുന്നു സംവിധായകന്‍ അന്ന് പുറത്തുവിട്ടിരുന്നത്. സിനിമാ ലോകവും പ്രേക്ഷകരുമടക്കം നിരവധി പേരായിരുന്നു പോസ്റ്റര്‍ സമൂഹാധ്യമങ്ങളില്‍ പങ്കുവെച്ചിരുന്നത്.