ബാഹുബലിക്ക് ശേഷം വന്ന ആ വലിയ അവസരം നഷ്ടപ്പെടുത്തി പ്രഭാസ്! നിരസിച്ചതിന് കാരണമിങ്ങനെ! കാണൂ

പ്രഭാസിന് ലഭിച്ച അവസരം

ബാഹുബലിയുടെ വിജയത്തിന് ശേഷം തെന്നിന്ത്യയില്‍ താരമൂല്യമേറിയ നടനായി പ്രഭാസ് മാറിയിരുന്നു. തെലുങ്കിലെ ഒരു സാധാരണ നടനില്‍ നിന്നുമാണ് ബാഹുബലിക്ക് ശേഷം അദ്ദേഹം സൂപ്പര്‍ താരമായിരുന്നത്. ചിത്രത്തിന്റെ വിജയത്തിലൂടെ നിരവധി ആരാധകരെ നേടിയെടുക്കാനും പ്രഭാസിനു സാധിച്ചിരുന്നു. ബാഹുബലിക്ക് ശേഷം നിരവധി അവസരങ്ങള്‍ തെലുങ്കില്‍ നിന്നും മറ്റു ഭാഷകളില്‍ നിന്നുമായി പ്രഭാസിന് ലഭിച്ചിരുന്നു. അടുത്തിടെയായിരുന്നു മുന്‍പ് പ്രഭാസ് നിരസിച്ച ഒരു ബോളിവുഡ് ചിത്രത്തെക്കുറിച്ചുളള റിപ്പോര്‍ട്ടുകള്‍ പുറത്തുവന്നത്.

ദീപികാ പദുകോണിന്റെ നായകന്‍

ദീപികാ പദുകോണിന്റെ നായകനായുളള ചിത്രമായിരുന്നു പ്രഭാസിനെ തേടിയെത്തിയിരുന്നത്. ചരിത്ര പശ്ചാത്തലത്തില്‍ കഥ പറഞ്ഞ ചിത്രത്തില്‍ ഒരു ശ്രദ്ധേയ കഥാപാത്രമായിരുന്നു പ്രഭാസിന് ലഭിച്ചതെങ്കിലും താരം അത് നിഷേധിക്കുകയായിരുന്നു. തുടര്‍ന്നാണ് സഹോ എന്ന ചിത്രം നടന്റെതായി പ്രഖ്യാപിക്കപ്പെട്ടിരുന്നത്. ചിത്രത്തിന്റെ പ്രഖ്യാപനത്തിനു ശേഷം സഹോയുടെ തിരക്കുകളിലേക്ക് താരം പോവുകയായിരുന്നു.

പദ്മാവത് എന്ന ചിത്രം

സഞ്ജയ് ലീലാ ബന്‍സാലിയുടെ സംവിധാനത്തില്‍ പുറത്തിറങ്ങിയ പദ്മാവതില്‍ അഭിനയിക്കാനുളള അവസരമായിരുന്നു പ്രഭാസിനെ തേടിയെത്തിയിരുന്നത്. പദ്മാവതില്‍ രത്തന്‍ സിംഗ് എന്ന കഥാപാത്രം അവതരിപ്പിക്കാനായിരുന്നു സംവിധായന്‍ സഞ്ജയ് ലീലാ ബന്‍സാലി പ്രഭാസിനെ സമീപിച്ചിരുന്നത്. എന്നാല്‍ പ്രഭാസ് ചിത്രം നിരസിച്ചതോടെ ഷാഹിദ് കപൂറായിരുന്നു പകരം ഈ റോള്‍ ചെയ്തിരുന്നത്. ഷാഹിദിന്റെ കരിയറിലെ ശ്രദ്ധേയ കഥാപാത്രമായി ഇത് മാറുകയും ചെയ്തിരുന്നു

നിരസിക്കാനുണ്ടായ കാരണം

പദ്മാവതില്‍ ബാഹുബലി പോലൊരു കഥാപാത്രമല്ലാത്തതിനാലാണ് പ്രഭാസ് ചിത്രം നിരസിച്ചതെന്നായിരുന്നു റിപ്പോര്‍ട്ടുകള്‍ വന്നത്. പദ്മാവതിന്റെ തിരക്കഥ താരത്തെ കേള്‍പ്പിച്ചെങ്കിലും ചിത്രത്തിലെ കഥാപാത്രം പ്രഭാസിനെ ആകര്‍ഷിച്ചില്ലായിരുന്നു. ബാഹുബലിയിലൂടെ നേടിയ ഇമേജ് ചിത്രത്തിലൂടെ കളഞ്ഞു കുളിക്കേണ്ടെന്ന ചിന്തയാണ് താരത്തിനെ നിരസിക്കാന്‍ പ്രേരിപ്പിച്ചിരുന്നത്.

സഹോ എന്ന ചിത്രം

ബാഹുബലിക്ക് ശേഷം സഹോ എന്ന ചിത്രത്തിലായിരുന്നു പ്രഭാസ് അഭിനയിച്ചത്.ബിഗ് ബഡ്ജറ്റില്‍ ഒരുക്കുന്ന ഈ സിനിമയില്‍ ശ്രദ്ധേയമായൊരു കഥാപാത്രത്തെയാണ് നടന്‍ അവതരിപ്പിക്കുന്നത്. ആക്ഷന് പ്രാധാന്യം നല്‍കിയൊരുക്കുന്ന ചിത്രമാണ് സഹോ എന്നാണറിയുന്നത്. ശ്രദ്ധ കപൂറാണ് ചിത്രത്തില്‍ പ്രഭാസിന്റെ നായികയായി എത്തുന്നത്. തെലുങ്കിനു പുറമെ തമിഴ്,മലയാളം,ഹിന്ദി തുടങ്ങിയ ഭാഷകളിലും ചിത്രം മൊഴിമാറ്റി പ്രദര്‍ശനത്തിന് എത്തിക്കുന്നുണ്ട്.