ചിമ്പു-ഗൗതം മേനോന്‍ കൂട്ടുകെട്ട് വീണ്ടും ഒന്നിക്കുന്നു! ഇത്തവണയെത്തുക ഒരു ആക്ഷന്‍ എന്റടെയ്‌നറുമായി

വിണ്ണൈത്താണ്ടി വരുവായ എന്ന ഒറ്റ ചിത്രത്തിലൂടെ തമിഴില്‍ ശ്രദ്ധേയമായ കൂട്ടുകെട്ടാണ് ചിമ്പുവും ഗൗതം മേനോനും. ആദ്യ ചിത്രം തന്നെ സൂപ്പര്‍ ഹിറ്റാക്കികൊണ്ടായിരുന്നു ഈ കൂട്ടുകെട്ട് തമിഴില്‍ ഒന്നിച്ചിരുന്നത്. തൃഷയും ചിമ്പുവും ഒന്നിച്ച ചിത്രത്തിന് മികച്ച സ്വീകാര്യത സിനിമാ പ്രേമികള്‍ നല്‍കിയിരുന്നു,

ചിമ്പുവിന്റെയും തൃഷയുടെയും പ്രകടനത്തോടെയാപ്പം ഗൗതം മേനോന്റെ മേക്കിങ്ങും ചിത്രത്തില്‍ മികച്ചുനിന്നിരുന്നു. വിണ്ണൈത്താണ്ടി വരുവായയ്ക്ക് ശേഷം അച്ചം എന്‍ബത് മഠമയെടാ എന്ന ചിത്രത്തിലാണ് ഈ കൂട്ടുകെട്ട് ഒന്നിച്ചിരുന്നത്. രണ്ടാമത്തെ ചിത്രത്തിനും മികച്ച സ്വീകാര്യത സിനിമാ പ്രേമികള്‍ നല്‍കിയിരുന്നു.

ഇപ്പോഴിതാ ഇവരുടെ മൂന്നാമത്തെ സിനിമയെക്കുറിച്ചുളള റിപ്പോര്‍ട്ടുകള്‍ വന്നിരിക്കുകയാണ്. ഇത്തവണ ഒരു ആക്ഷന്‍ എന്റര്‍ടെയിനറുമായിട്ടാകും ഈ കൂട്ടുകെട്ട് എത്തുകയെന്നാണ് അറിയുന്നത്. സംഗീത മാന്ത്രികന്‍ എആര്‍ റഹ്മാന്‍ തന്നെയായിരിക്കും ഇത്തവണയും ചിത്രത്തിന് വേണ്ടി സംഗീതമൊരുക്കുക. നേരത്തെ വിണ്ണൈത്താണ്ടി വരുവായ 2 ഒരുക്കാനാണ് ഇവര്‍ പദ്ധതിയിട്ടിരുന്നതെങ്കിലും അതിനു മുന്‍പ് ഈ ചിത്രമൊരുക്കാനുളള തയ്യാറെടുപ്പുകളിലാണ് ഇവരെന്നാണ് അറിയുന്നത്.

പുതിയ ചിത്രങ്ങളുടെ റിലീസിനു ശേഷമായിരിക്കും ഗൗതം മേനോന്‍ ചിമ്പു ചിത്രത്തിന്റെ പ്രീ പ്രൊഡക്ഷന്‍ വര്‍ക്കുകള്‍ ആരംഭിക്കുക. തമിഴില്‍ മണിരത്‌നം സംവിധാനം ചെയ്ത ചെക്ക ചിവന്ത വാനം എന്ന ചിത്രത്തിലായിരുന്നു ചിമ്പു എറ്റവുമൊടുവിലായി അഭിനയിച്ചിരുന്നത്.