ഹോം

ഗോസിപ്പ്

തമിഴ് സൂപ്പര്‍ താരം തല അജിത്തിന്റെ കരിയറില്‍ വലിയ വഴിത്തിരിവുണ്ടാക്കിയ ചിത്രമായിരുന്നു മങ്കാത്ത. വെങ്കിട് പ്രഭു സംവിധാനം ചെയ്ത ചിത്രത്തിലെ പ്രകടനം നടന്റെതായി വലിയ രീതിയില്‍ ശ്രദ്ധിക്കപ്പെട്ടിരുന്നു. 2011ല്‍ പുറത്തിറങ്ങിയ മങ്കാത്ത സംവിധായകന്‍ വെങ്കട് പ്രഭുവിനും തമിഴില്‍ ബ്രേക്ക് നല്‍കിയ ചിത്രമായിരുന്നു. ആക്ഷന്‍ ത്രില്ലര്‍ ചിത്രത്തില്‍ വിനായക് മഹാദേവ് എന്ന കഥാപാത്രമായി പൂണ്ടുവിളയാടിയിരുന്നു അജിത്ത്. തലയ്‌ക്കൊപ്പം അര്‍ജുന്‍, തൃഷ, ലക്ഷ്മി റായ്, വൈഭവ്, പ്രേംജി അമരന്‍ തുടങ്ങിയരാണ് ചിത്രത്തില്‍ മറ്റ് പ്രധാന വേഷങ്ങളില്‍ എത്തിയിരുന്നത്.

അതേസമയം തിയ്യേറ്ററുകളില്‍ മെഗാ ബ്ലോക്ക്ബസ്റ്ററായ മങ്കാത്തയുടെ രണ്ടാം ഭാഗത്തിനായി വലിയ ആകാംക്ഷകളോടെയാണ് ആരാധകര്‍ കാത്തിരിക്കുന്നത്. അജിത്ത് ചിത്രത്തിന്റെ രണ്ടാം ഭാഗത്തെ കുറിച്ച് സംവിധായകന്‍ വെങ്കട് പ്രഭു തന്നെ മുന്‍പ് ഒരഭിമുഖത്തില്‍ തുറന്നുപറഞ്ഞിരുന്നു. മങ്കാത്ത 2വിനായി തല-ദളപതിമാരുടെ സമ്മതത്തിനായി കാത്തിരിക്കുകയാണെന്ന് ആണ് സംവിധായകന്‍ പറഞ്ഞത്. മങ്കാത്ത 2വില്‍ അര്‍ജുന്റെ റോളില്‍ വിജയ് എത്തിയാല്‍ നന്നാകുമെന്ന അഭിപ്രായം ആരാധകര്‍ക്കുണ്ട്.

മുന്‍പ് മങ്കാത്ത ചിത്രീകരണ സമയത്ത് വിജയോടും അജിത്തിനോടും ഒരുമിച്ചൊരു ചിത്രം ചെയ്യണമെന്ന് വെങ്കട് പ്രഭു പറഞ്ഞിരുന്നു. അന്ന് രണ്ട് പേരും താല്‍പര്യം പ്രകടിപ്പിക്കുകയും ചെയ്തിരുന്നു. അതേസമയം മങ്കാത്ത 2 അജിത്തിനെയും വിജയെയും മനസില്‍ കണ്ടാണ് സംവിധായകന്‍ പ്ലാന്‍ ചെയ്യുന്നതെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്. എന്നാല്‍ സിനിമയുടെ ജോലികള്‍ ഇതുവരെ ആരംഭിച്ചിട്ടില്ല. നിലവില്‍ ചിമ്പുവിനെ വെച്ചുളള മാനാട് എന്ന ചിത്രത്തിന്റെ തിരക്കിലാണ് സംവിധായകനുളളത്. കല്യാണി പ്രിയദര്‍ശനാണ് ചിത്രത്തില്‍ നായികയായി എത്തുന്നത്.

സിനിമയുടെ ജോലികള്‍ നേരത്തെ ആരംഭിച്ചിരുന്നെങ്കിലും ലോക്ഡൗണ്‍ കാരണം നിര്‍ത്തിവെക്കേണ്ടി വന്നിരുന്നു. ചിമ്പുവും വെങ്കട് പ്രഭുവും ആദ്യമായി ഒന്നിക്കുന്ന ചിത്രം കൂടിയാണ് മാനാട്. അതേസമയം പാര്‍ട്ടി എന്ന ചിത്രമാണ് വെങ്കട് പ്രഭു ഒടുവില്‍ സംവിധാനം ചെയ്തിരുന്നത്. വമ്പന്‍ താരനിര അഭിനയിച്ച സിനിമയുടെ റിലീസും മാറ്റിവെക്കേണ്ടി വന്നിരുന്നു. പാര്‍ട്ടിക്ക് പിന്നാലെയാണ് ചിമ്പു ചിത്രമായ മാനഗരത്തിന്റെ ജോലികള്‍ സംവിധായകന്‍ ആരംഭിച്ചത്. പൊളിറ്റിക്കല്‍ ആക്ഷന്‍ ത്രില്ലറായിട്ടാണ് മാനഗരം അണിയറയില്‍ ഒരുങ്ങുന്നത്. സിമ്പുവിനും കല്യാണിക്കുമൊപ്പം വലിയ താരനിരയാണ് ചിത്രത്തില്‍ എത്തുന്നത്. യുവന്‍ ശങ്കര്‍രാജയാണ് ഇത്തവണ വെങ്കട് പ്രഭു ചിത്രത്തിന് സംഗീതമൊരുക്കുന്നത്.