പറഞ്ഞുവെച്ച കഥാപാത്രം ഒഴിവാക്കി! മമ്മൂട്ടി ചിത്രത്തില്‍ വിജയ് ദേവരകൊണ്ട എത്തില്ലെന്ന് റിപ്പോര്‍ട്ട്

യാത്ര എന്ന ചിത്രം

ഒരിടവേളയ്ക്കു ശേഷം മമ്മൂക്ക തെലുങ്കില്‍ തിരിച്ചെത്തുന്ന സിനിമയാണ് യാത്ര. ആന്ധ്ര പ്രദേശ് മുന്‍ മുഖ്യമന്ത്രി വൈ എസ് രാജശേഖര റെഡ്ഡിയുടെ ജീവിതകഥയാണ് ചിത്രത്തില്‍ പറയുന്നത്. മമ്മൂക്കയുടെ കരിയറിലെ വെല്ലുവിളി നിറഞ്ഞൊരു കഥാപാത്രമായിരിക്കും ചിത്രത്തിലേതെന്നാണ് അറിയുന്നത്. ചരിത്ര കഥാപാത്രമായി മമ്മൂക്ക വീണ്ടും എത്തുന്ന ചിത്രം കൂടിയാണിത്. 1999 മുതല്‍ 2004 വരെയുളള വൈഎസ് ആറിന്റെ ജീവിതമാണ് ചിത്രത്തില്‍ കാണിക്കുന്നത്.യാത്രയിലെ കഥാപാത്രത്തിനായി മമ്മൂക്കയെ തന്നെ സംവിധായകന്‍ തിരഞ്ഞെടുത്തത് ഏറെ ശ്രദ്ധേയമായി മാറിയിരുന്നു.

ഫസ്റ്റ്‌ലുക്കും ടീസറും

ചിത്രത്തിന്റെതായി പുറത്തിറങ്ങിയ ഫസ്റ്റ്‌ലുക്ക് പോസ്റ്ററുകള്‍ക്കും ടീസറിനും മറ്റും മികച്ച സ്വീകാര്യതയായിരുന്നു സമൂഹ മാധ്യമങ്ങളില്‍ ലഭിച്ചിരുന്നത്. ഫസ്റ്റ്ലുക്കില്‍ വൈഎസ്ആറായുളള രൂപമാറ്റത്തിലാണ് മമ്മൂക്കയെ കാണിച്ചിരുന്നത്. നീളമുളള കുര്‍ത്തയും മുണ്ടും ധരിച്ചായിരുന്നു മമ്മൂക്ക ഫസ്റ്റ്ലുക്കില്‍ എത്തിയിരുന്നത്.യാത്രയുടെ പോസ്റ്ററുകള്‍ക്കെല്ലാം തന്നെ മികച്ച സ്വീകാര്യതയായിരുന്നു സമൂഹമാധ്യമങ്ങളില്‍ ലഭിച്ചിരുന്നത്.ചിത്രത്തിന്റെതായി പുറത്തിറങ്ങിയ ടീസറും ഏറെ ശ്രദ്ധിക്കപ്പെട്ടിരുന്നു.

വിജയ് ദേവരകൊണ്ടയില്ല

ചിത്രത്തില്‍ നിന്നും സിനിമാ പ്രേമികളുടെ ഇഷ്ടതാരം വിജയ് ദേവരകൊണ്ടയും എത്തുമെന്ന് റിപ്പോര്‍ട്ടുകള്‍ വന്നിരുന്നെങ്കിലും ഇപ്പോള്‍ താരം എത്തില്ലെന്നാണ് അറിയുന്നത്. ചിത്രത്തില്‍ വൈഎസ് രാജശേഖരറെഡ്ഡിയുടെ മകന്‍ വൈഎസ് ജഗനായിട്ടാകും വിജയ് ദേവരകൊണ്ട എത്തുകയെന്നായിരുന്നു റിപ്പോര്‍ട്ടുകള്‍ വന്നിരുന്നത്. എന്നാലിപ്പോള്‍ ചിത്രത്തില്‍ നിന്നും ആ കഥാപാത്രത്തെ ഒഴിവാക്കിയതായാണ് അറിയുന്നത്. വമ്പന്‍ താരനിരയാണ് ചിത്രത്തിനു പിന്നില്‍ അണിനിരക്കുന്നത്.

മഹി വി രാഘവിന്റെ സിനിമ

തെലുങ്കിലെ യുവസംവിധായകന്‍ മഹി വി രാഘവാണ് മമ്മൂട്ടിയുടെ യാത്രയുമായി എത്തുന്നത്. 30 കോടി ബഡ്ജറ്റിലാണ് സംവിധായകന്‍ വൈ എസ് ആറിന്റെ ജീവിതം വെളളിത്തിരയിലേക്ക് എത്തിക്കുന്നത്,. അടുത്ത വര്‍ഷം ജനുവരിയിലായിരിക്കും ചിത്രം തിയ്യേറ്ററുകളിലേക്ക് എത്തുക.അടുത്തിടെ മമ്മൂക്ക തന്നെ പുറത്തുവിട്ട യാത്രയുടെ ലൊക്കേഷന്‍ പിക് സോഷ്യല്‍ മീഡിയയില്‍ വൈറലായി മാറിയിരുന്നു. തന്റെ ഇന്‍സ്റ്റഗ്രാം പേജിലൂടെയായിരുന്നു മമ്മൂക്ക ഈ ചിത്രം പങ്കുവെച്ചിരുന്നത്.

സബിതാ ഇന്ദ്രറെഡ്ഡിയായി സുഹാസിനി

യാത്രയില്‍ വൈഎസ്ആറിന്റെ ഭാര്യ വിജയലക്ഷ്മിയായി എത്തുന്നത് ആശ്രിത വെമുഗന്തിയാണ്. സുഹാസിനി മണിരത്നം,ഭൂമിക ചൌള തുടങ്ങിയവരും ചിത്രത്തില്‍ മറ്റു പ്രധാന കഥാപാത്രങ്ങളെ അവതരിപ്പിക്കുന്നുണ്ട്. ചിത്രത്തില്‍ സബിതാ ഇന്ദ്രറെഡ്ഡി എന്ന കഥാപാത്രമായാണ് സുഹാസിനി എത്തുന്നത്. വൈഎസ്ആറിന്റെ ഭരണക്കാലത്ത് മന്ത്രിയായിരുന്ന സബിത ആന്ധ്രയിലെ ആദ്യ വനിതാ ആഭ്യന്തര മന്ത്രി കൂടിയായിരുന്നു.