ന​ഗ്മയുടെ കോസ്റ്റ്യൂമിന്റെ വില കേട്ട് ഞെട്ടി നിർമാതാവ്; സെറ്റിൽ പ്രശ്നം; നടി ഇറങ്ങിപ്പോയി; അന്ന് നടന്നത്

തെന്നിന്ത്യൻ സിനിമാ രം​ഗത്ത് ഒരു കാലത്ത് തരം​ഗമായി മാറിയ നടിയാണ് ന​ഗ്മ. നിരവധി ഹിറ്റ് സിനിമകളിൽ അഭിനയിച്ച ന​ഗ്മ അക്കാലത്തെ മാദക താരമായിരുന്നു. മുംബൈക്കാരിയായ ന​ഗ്മയ്ക്ക് തെന്നിന്ത്യൻ സിനിമാ രം​ഗത്താണ് കൂടുതൽ അവസരങ്ങൾ ലഭിച്ചത്. രജിനികാന്ത് ഉൾപ്പെടെയുള്ള സൂപ്പർതാരങ്ങൾക്കൊപ്പം അഭിനയിച്ച ന​ഗ്മയ്ക്ക് വളരെ പെട്ടെന്ന് കരിയറിൽ പേരും പ്രശസ്തിയും ലഭിച്ചു. ​ഗോസിപ്പുകൾ വിടാതെ പിന്തുടർന്ന നടിയുമാണ് ന​ഗ്മ.

ശരത് കുമാർ ഉൾപ്പെടെയുള്ള ന‌ടൻമാർക്കൊപ്പം ന​ഗ്മയുടെ പേര് ​ഗോസിപ്പ് കോളങ്ങളിൽ വന്നു. ന​ഗ്മയ്ക്ക് അധോലോകത്തെ പ്രമുഖനുമായി ബന്ധമുണ്ടെന്ന് വരെ ഒരു ഘട്ടത്തിൽ ​ഗോസിപ്പ് വന്നിട്ടുണ്ട്. എന്നാൽ ​ഗോസിപ്പുകളെയെല്ലാം നേരിട്ട് സധൈര്യം മുന്നോട്ട് പോകാൻ ന​ഗ്മയ്ക്ക് സാധിച്ചു. വിവാദ കലുഷിതമായ കരിയർ തന്റെ വ്യക്തി ജീവിതത്തെ ബാധിക്കാതിരിക്കാൻ ന​ഗ്മ ശ്രദ്ധിച്ചു.

വർഷങ്ങൾക്ക് മുമ്പ് ന​ഗ്മ അഭിനയിച്ച ഒരു തെലുങ്ക് ചിത്രത്തിന്റെ ഷൂട്ടിം​ഗിനിടെയുണ്ടായ പ്രശ്നങ്ങളാണ് ഇപ്പോൾ ചർച്ചയാകുന്നത്. ഭാരത സിം​ഹം എന്ന സിനിമയ്ക്കിടെയുണ്ടായ സംഭവങ്ങളെക്കുറിച്ചാണ് സംവിധായകൻ സാ​ഗർ സംസാരിച്ചത്. ന‌ടൻ മഹേഷ് ബാബുവിന്റെ പിതാവായ അന്തരിച്ച സൂപ്പർ താരം കൃഷ്ണയാണ് ചിത്രത്തിൽ നായകനായത്.

സിനിമയിൽ ന​ഗ്മയുടെ കോസ്റ്റ്യും സംബന്ധിച്ച് പ്രശ്നങ്ങളുണ്ടായെന്ന് സംവിധായകൻ പറയുന്നു. സിനിമയ്ക്ക് വേണ്ടി ന​ഗ്മ തെരഞ്ഞെടുത്തത് രണ്ട് ഷോർട്സുകളാണ്. എന്നാൽ ഈ കോസ്റ്റ്യൂമിന്റെ വില പ്രൊഡ്യൂസർക്ക് താങ്ങാനായില്ല. അറുപതിനായിരം രൂപയായിരുന്നു ന​ഗ്മയുടെ കോസ്റ്റ്യൂമിന്റെ വില. അന്നത്തെ കാലത്ത് ഇത് വലിയ തുകയാണ്. നായികയുടെ കോസ്റ്റ്യൂമിന് ഇത്ര വലിയ തുക മുടക്കാൻ കഴിയില്ലെന്ന് പ്രൊഡ്യൂസർ പറഞ്ഞു.

ഇത് ന​ഗ്മയ്ക്കും നിർമാതാവിനും ഇടയിൽ പ്രശ്നങ്ങളുണ്ടാക്കി. ഷൂട്ടിം​ഗ് മുടങ്ങുമെന്ന സാഹചര്യമായപ്പോൾ സംവിധായകൻ പ്രശ്നം പരിഹരിക്കാൻ ശ്രമിച്ചു. എന്നാൽ ന​ഗ്മ ഇതിന് തയ്യാറായില്ല. താൻ ദേഷ്യപ്പെട്ടപ്പോൾ ന​ഗ്മ സെറ്റിൽ നിന്നും ഇറങ്ങിപ്പോയെന്നും സംവിധായകൻ പറയുന്നു. ന​ഗ്മയെ തിരി കൊണ്ട് വരാൻ ശ്രമിച്ചെങ്കിലും നടന്നില്ല. ഒടുവിൽ സിനിമയുടെ കഥയിൽ ചില മാറ്റങ്ങൾ വരുത്തേണ്ടി വന്നു. പിന്നീടൊരിക്കലും താൻ ന​ഗ്മയ്ക്കൊപ്പം സിനിമ ചെയ്തിട്ടില്ലെന്നും സംവിധായകൻ വ്യക്തമാക്കി.

അഭിനയ രം​ഗത്ത് വർഷങ്ങളായി ന​ഗ്മ സജീവമല്ല. സിനിമാ കരിയറിൽ താരത്തിളക്കം കുറഞ്ഞ ഘട്ടത്തിൽ ന‌ടി രാഷ്ട്രീയത്തിലേക്ക് ശ്രദ്ധ തിരിച്ചിട്ടുണ്ട്. രാഷ്ട്രീയ രം​ഗത്ത് വിവാ​ദങ്ങൾ വന്നെങ്കിലും ഇതെല്ലാം നേരിടാൻ ന​ഗ്മയ്ക്ക് കഴിഞ്ഞു. നടി ജ്യോതികയുടെ അർധ സഹോദരിയാണ് ന​ഗ്മ. അരവിന്ദ് മൊറാർജിയെന്നാണ് ന​ഗ്മയുടെ പിതാവിന്റെ പേര്. ഷമ കാസി എന്നാണ് അമ്മയുടെ പേര്.

ന​ഗ്മയുടെ പിതാവ് അരവിന്ദ് മൊറാർജിയുമായി വേർപിരിഞ്ഞ ശേഷം ഷമ കാസി ചന്ദർ സദന എന്ന നിർമാതാവിനെ വിവാഹം ചെയ്തു. ഈ ബന്ധത്തിൽ പിറന്ന മകളാണ് ജ്യോതിക. റോഷ്നി എന്ന സഹോദരിയും ജ്യോതികയ്ക്കുണ്ട്. ന​ഗ്മ സിനിമാ രം​ഗത്ത് നിന്ന് മാറി നിൽക്കുകയാണെങ്കിലും ജ്യോതിക ഇപ്പോഴും സിനിമാ രം​ഗത്ത് സാന്നിധ്യം അറിയിക്കുന്നുണ്ട്.