ഷര്‍ട്ടൂരിയാണ് പുരുഷന്‍മാര്‍ പ്രവേശിക്കുന്നത്! സ്ത്രീകളും അതുപോലെ വേണമെന്ന് പറയുമോയെന്ന് അനുശ്രീ!

മാറ്റിനിര്‍ത്തുന്നുവെന്ന പരാതി

സുപ്രീം കോടതി പുറപ്പെടുവിച്ച വിധിയെ അംഗീകരിക്കുന്നു. ആ തീരുമാനത്തെ ബഹുമാനിക്കുന്നു. ശരീര ഘടനയും ശരീര ശാസ്ത്രവും പരിഗണിച്ച് തങ്ങളെ അമ്പലത്തില്‍ കയറ്റുന്നില്ല, മാറ്റി നിര്‍ത്തുന്നുവെന്ന് പരാതിപ്പെട്ടാല്‍ കോടതി ഇത്തരത്തില്‍ തീരുമാനമെടുക്കുമെന്നും ഇത് അങ്ങനെ സംഭവിച്ചതാണെന്നും കരുതുന്നതായും താരം പറയുന്നു. ശാരീരികാവസ്ഥയുടെ പേരില്‍ സ്ത്രീകളെ മാറ്റി നിര്‍ത്തരുതെന്നായിരുന്നു കോടതി നിര്‍ദേശിച്ചത്. തൃപ്തി ദേശായി ഉള്‍പ്പടെ നിരവധി പേരായിരുന്നു സ്ത്രീ പ്രവേശനത്തിനായി ശക്തമായി വാദിച്ചത്. വിലക്കുകള്‍ അവഗണിച്ച് ശബരിമലയില്‍ പ്രവേശിക്കുമെന്നും ഇവര്‍ നേരത്തെ വ്യക്തമാക്കിയിരുന്നു. ഇവരെ തടയുമെന്ന് ശിവസേനയും അറിയിച്ചിരുന്നു. ഇതിന് പിന്നാലെയായാണ് സുപ്രീം കോടതി വിധിയെത്തിയത്.

ആഗ്രഹമല്ല ഇതിന് പിന്നില്‍

മറ്റെല്ലാ ക്ഷേത്രങ്ങളും സന്ദര്‍ശിച്ചതിന് ശേഷം സബരിമലയില്‍ മാത്രമേ ഇനി പോവാന്‍ ബാക്കിയുള്ളൂ എന്ന തരത്തിലുള്ള ചിലരുടെ ആഗ്രഹവുമല്ല ഇിതിന് പിന്നില്‍. ചെയ്യരുതെന്ന് പറയുന്ന കാര്യം ചെയ്ത് കാണിക്കാനുള്ള ആവേശമാണ് ഇപ്പോഴത്തേതെന്നും ജനുവിനായി തോന്നുന്നില്ലെന്നും താരം പറയുന്നു. വിലക്ക് നിലനില്‍ക്കുന്ന കാര്യം ചെയ്ത് കാണിക്കാനുള്ള ആവേശമാണ് പലരിലും കാണുന്നത്. സ്ത്രീ പ്രവേശനത്തെ എതിര്‍ക്കുന്നവരും ഇത്തരത്തിലുള്ള വിലയിരുത്തലുകളാണ് നടത്തിയത്.

സമത്വം എല്ലാത്തിലും?

എല്ലാക്കാര്യത്തിലും സമത്വമെന്ന് നിര്‍ബന്ധം പിടിക്കാനാവുമോയെന്നും അനുശ്രീ ചോദിക്കുന്നു. സദ്ഗുരു ഒരു വീഡിയോയില്‍ പറയുന്നത് പോലെ അങ്ങനെയാണെങ്കില്‍ എന്തിനാണ് സ്ത്രീകള്‍ക്കും പുരുഷന്‍മാര്‍ക്കുമായി രണ്ട് ടോയ്‌ലെറ്റുകളെന്നും താരം ചോദിക്കുന്നു. സമത്വം വേണമെന്ന് വാദിക്കുന്നവര്‍ പുരുഷന്‍മാരുടെ ടോയ്‌ലറ്റില്‍ കയറാറുണ്ടോയെന്നും അനുശ്രീ ചോദിക്കുന്നു. പുരുഷന്‍മാര്‍ ഷര്‍ട്ട് ഊരിയതിന് ശേഷമാണ് അമ്പലത്തില്‍ പ്രവേശിക്കാറുള്ളത്. സ്ത്രീകളും അങ്ങനെ വേണമെന്ന് പറയാനാവുമോയെന്നും താരം ചോദിച്ചിട്ടുണ്ട്.

വിവാദമായ പ്രസ്താവനകള്‍

ശബരിമലയില്‍ പ്രവേശിക്കുന്ന സ്ത്രീകളെ തടയുമെന്ന തരത്തിലുള്ള അഭിപ്രായവുമായി നിരവധി പേര്‍ രംഗത്തുവന്നിരുന്നു. ക്ഷേത്ര സന്ദര്‍ശനത്തിനെത്തുന്ന സ്ത്രീകളെ കീറിമുറിക്കണമെന്ന വിവാദ പ്രസ്താവനയുമായാണ് കൊല്ലം തുളസിയെത്തിയത്. പ്രസ്താവന വിവാദമായി മാറിയപ്പോള്‍ അദ്ദേഹം ക്ഷമാപണം നടത്തിയിരുന്നു. ശബരിമലയിലെ സ്ത്രീപ്രവേശനവുമായി ബന്ധപ്പെട്ട കാര്യങ്ങള്‍ ക്ഷണനേരം കൊണ്ടാണ് സോഷ്യല്‍ മീഡിയയിലൂടെ വൈറലാവുന്നത്.

സോഷ്യല്‍ മീഡിയയിലെ ചര്‍ച്ചകള്‍

ശബരിമലയിലെ സ്ത്രീപ്രവേശനം ഇപ്പോഴും കീറാമുട്ടിയായി നില്‍ക്കുകയാണ്. ഒരുവിഭാഗം ഈ തീരുമാനത്തെ ശക്തമായി അനുകൂലിക്കുമ്പോള്‍ വിയോജിപ്പുമായി നിലനില്‍ക്കുകയാണ് മറുവിഭാഗം. ശബരിമലയിലേക്കെത്തുന്ന സ്ത്രീകള്‍ക്ക് വേണ്ട സുരക്ഷയൊരുക്കണമെന്നും കോടതി നിര്‍ദേശിച്ചിരുന്നു. നിത്യബ്രഹ്മചാരിയായ അയ്യപ്പന്റെ ബ്രഹ്മചര്യം സ്ത്രീ പ്രവേശനത്തോടെ നഷ്ടപ്പെടുമെന്നാണ് ഒരുവിഭാഗം ചൂണ്ടിക്കാണിക്കുന്നത്. സോഷ്യല്‍ മീഡിയയിലൂടെ ഈ വിഷയത്തില്‍ ഇപ്പോഴും സജീവമായ ചര്‍ച്ചകളാണ് അരങ്ങേറുന്നത്.