മനസ്സ് പതറിപ്പോയി! കാലയുടെ ചിത്രീകരണത്തിനിടയില്‍ രജനികാന്തിനെ തളര്‍ത്തിയ സംഭവത്തെക്കുറിച്ച് ബൃന്ദ

സെറ്റിലെ അപകടം

സിനിമയുടെ ഗാനരംഗം ചിത്രീകരിക്കുന്നതിന്റെ തിരക്കിലായിരുന്നു എല്ലാവരും. കരികാലയും ഭാര്യയും ജീപ്പില്‍ വരുന്ന രംഗമായിരുന്നു ചിത്രീകരിച്ചുകൊണ്ടിരിക്കുന്നത്. അതിനിടയിലാണ് അപ്രതീക്ഷിതമായി ഒരു അപകടം ഉണ്ടായത്. ഷൂട്ടിങ്ങ് കാണാന്‍ വന്ന ഒരാളുടെ കാലിലൂടെ ജീപ്പിന്റെ ടയര്‍ കയറി ഇറങ്ങുകയായിരുന്നു. സെറ്റിലെ എല്ലാവരും ആകെ ഞെട്ടിപ്പോയ സംഭവമായിരുന്നു ഇത്. ഇത് രജനീകാന്തിനേയും ബാധിച്ചിരുന്നുവെന്ന് ബൃന്ദ മാസ്റ്റര്‍ പറയുന്നു.

മനസ്സിന് സുഖമില്ല

ജീപ്പ് കയറിയിറങ്ങിയ ഉടന്‍ തന്നെ അയാളുടെ കാലില്‍ നീര് വന്നു, കാല് വല്ലാതെ വീര്‍ത്ത് വരുന്നുണ്ടായിരുന്നു. ഷൂട്ടിങ്ങ് നിര്‍ത്തി ഉടന്‍ തന്നെ താരം അദ്ദേഹത്തെ ശുശ്രൂഷിക്കാനായി മുന്നിട്ടിറങ്ങി. കാലില്‍ ഐസ് വെച്ചതിന് ശേഷമാണ് ഡോക്ടറുടെ അടുത്തേക്ക് കൊണ്ടുപോയത്. ഈ സമയത്ത് അദ്ദേഹം ആകെ അസ്വസ്ഥനായിരുന്നു. ഇത് തനിക്ക് കൃത്യമായി മനസ്സിലാക്കാന്‍ കഴിഞ്ഞിരുന്നുവെന്നും ബൃന്ദ മാസ്റ്റര്‍ പറയുന്നു.

ചിത്രീകരണം നിര്‍ത്താം

അദ്ദേഹത്തിന്റെ ആ മാനസികാവസ്ഥയില്‍ ചിത്രീകരണവുമായി മുന്നോട്ട് പോവുന്നത് ശരിയല്ലെന്ന് തോന്നി. അതോടെയാണ് ചിത്രീകരണം നിര്‍ത്താന്‍ തീരിമാനിച്ചത്. തന്റെ തീരുമാനത്തെക്കുറിച്ച് അറിഞ്ഞതും അദ്ദേഹം തന്നോട് നന്ദി പറഞ്ഞുവെന്നും ബൃന്ദ മാസ്റ്റര്‍ പറയുന്നു. അയാള്‍ക്ക് അപകടം പറ്റിയതിനെക്കുറിച്ചായിരുന്നു അദ്ദേഹം ചിന്തിച്ചത്. കാലിലെ പരിക്ക് എങ്ങനെയാവുമെന്നായിരുന്നു ആശങ്ക. പരിക്കേറ്റയാളുടെ കാലിലെ എല്ല് പൊട്ടിയിരുന്നു. അയാള്‍ക്ക് വേണ്ട സഹായങ്ങളെല്ലാം ചെയതത് അദ്ദേഹമായിരുന്നുവെന്നും അവര്‍ പറയുന്നു.

പ്രേക്ഷകര്‍ക്ക് മുന്നില്‍

പ്രഖ്യാപനം മുതല്‍ത്തന്നെ വാര്‍ത്തകളിലിടം പിടിച്ച സിനിമയായിരുന്നു കാല. സിനിമയുടെ റിലീസ് തടയണമെന്നാവശ്യപ്പെട്ട് നിരവധി പേര്‍ രംഗത്തെത്തിയിരുന്നു. സുപ്രീം കോടതി ഉത്തരവ് ലഭിച്ചതോടെയാണ് കര്‍ണ്ണാടകയിലെ റിലീസിന്റെ കാര്യത്തില്‍ തീരുമാനമായത്. അമേരിക്കയില്‍ നേരത്തെ റിലീസ് ചെയ്ത ചിത്രം വ്യാഴാഴ്ചയാണ് ഇന്ത്യയിലേക്ക് എത്തിയത്. ആരാധകപ്രതീക്ഷകളെ തൃപ്തിപ്പെടുത്തുന്ന തരത്തിലുള്ള സിനിമ തന്നെയാണ് ഇതെന്നാണ് പ്രേക്ഷകര്‍ പറയുന്നത്.