റിലീസ് വൈകിയത്, പറഞ്ഞ് കേട്ടത് സത്യമല്ല, തിയേറ്ററില്‍ എത്തിയ ടിയാനില്‍ വെളിപ്പെടുത്തിയത് ഇതാണ്!!

സെന്‍സറിങ് വൈകി

ചിത്രവുമായി ബന്ധപ്പെട്ട് ആദ്യ ചര്‍ച്ചകള്‍ നടക്കുന്ന സമയത്ത് തന്നെ ടിയാന്‍ പ്രേക്ഷകര്‍ക്കിടയിലും ശ്രദ്ധനേടി. ആറുമാസത്തോളം സമയമെടുത്താണ് ചിത്രത്തിന്റെ പ്രീ-പ്രൊഡക്ഷന്‍ ജോലികളിലെ ഓരോ സ്‌റ്റെപ്പുകളും പൂര്‍ത്തിയാക്കിയത്. പിന്നീട് പോസ്റ്റ്- പ്രൊഡക്ഷന്‍ വര്‍ക്കിന് ശേഷം റിലീസ് തിയതി തീരുമാനിച്ചുവെങ്കിലും പറഞ്ഞ ഡേറ്റില്‍ തിയേറ്ററുകളില്‍ എത്തിക്കാന്‍ കഴിഞ്ഞില്ല. ചിത്രത്തിന്റെ സെന്‍സറിങായിരുന്നു റിലീസ് നീട്ടി വയ്ക്കാന്‍ കാരണമായത്.

ആഗ്രഹിച്ചതെല്ലാം ചിത്രത്തിലുണ്ട്

ടിയാന്റെ സെന്‍സറിങ് സോഷ്യല്‍ മീഡയയില്‍ ഏറെ ചര്‍ച്ച ചെയ്തിരുന്നു. പക്ഷേ ചിത്രത്തില്‍ താന്‍ ആഗ്രഹിച്ച കാര്യങ്ങളെല്ലാം ചിത്രത്തിലുണ്ടെന്ന് സംവിധായകന്‍ ജിയെന്‍ കൃഷ്ണകുമാര്‍ പറയുന്നു. മാതൃഭൂമി ഡോട്ട് കോമിന് നല്‍കിയ അഭിമുഖത്തിലാണ് സംവിധായകന്‍ ഇക്കാര്യം തുറന്ന് പറഞ്ഞത്.

ചില സത്യങ്ങളുണ്ട്

ഒരു മലയാളിക്ക് ഇന്ത്യയോട് പറയാനുള്ളതെല്ലാം ഈ ചിത്രത്തിലുണ്ടെന്ന് സംവിധായകന്‍ പറയുന്നു. ചില സത്യങ്ങളുടെ വെളിപ്പെടുത്തലുകളുണ്ട്. എന്നാല്‍ വ്യക്തിപരമായോ മതപരമായോ ആരെയും അധിക്ഷേപിക്കുന്ന ഒന്നും തന്നെ ഈ ചിത്രത്തില്‍ ഇല്ലെന്ന് സംവിധായകന്‍ വ്യക്തമാക്കി.

കേരളത്തിന് പുറത്ത് ലൊക്കേഷന്‍

കേരളത്തിന് പുറത്താണ് ടിയാന്‍ പൂര്‍ണമായും ചിത്രീകരിച്ചത്. ലഡാക്ക്, നാസിക്, മുംബൈ, പ്രയാഗ, ഹൈദരബാദ് രാംമോജി ഫിലിംസിറ്റി എന്നിവടങ്ങളായിരുന്നു ചിത്രത്തിന്റെ പ്രധാന ലൊക്കേഷന്‍.

കുംഭമേള ഉള്‍പ്പെടുത്തി

ചിത്രത്തിന് വേണ്ടി കുംഭമേള ലൈവായി ചിത്രീകരിച്ചിരുന്നു. ഇത് ആദ്യമായാണ് ഒരു മലയാള സിനിമയില്‍ കുംഭമേള ഉള്‍പ്പെടുത്തുന്നത്. ആയിരത്തോളം ആളുകളുടെ നടുവില്‍ വെച്ചാണ് ടിയാന്റെ അറുപത് ശതമാനത്തോളം ഭാഗം ചിത്രീകരിച്ചതെന്ന് സംവിധായകന്‍ പറയുന്നു.

വന്‍ താരനിര

ഇന്ദ്രജിത്ത്, പൃഥ്വിരാജ്, മുരളിഗോപി എന്നിവര്‍ക്ക് പുറമെ പത്മപ്രിയ, ഷൈന്‍ ടോം ചാക്കോ, അനന്യ, സുരാജ് വെഞ്ഞാറമൂട്, തുടങ്ങിയവരും അന്യഭാഷാ താരങ്ങളും ചിത്രത്തില്‍ അണിനിരക്കുന്നുണ്ട്.