തിരക്കഥ വായിച്ച ശേഷം ആദ്യം മനസില്‍ വന്നത് ജിത്തു സര്‍! തമ്പിയെക്കുറിച്ച് കാര്‍ത്തി

തമ്പിയുടെ തിരക്കഥ വായിച്ചശേഷം ആര് ഇത് സംവിധാനം ചെയ്യുമെന്ന ചര്‍ച്ച ഞങ്ങള്‍ക്കിടയിലുണ്ടായി. ജിത്തു സാറിന്റെ പേരാണ് ആദ്യം മനസില്‍ വന്നത്. പിന്നീട് കഥ അദ്ദേഹത്തോട് പറഞ്ഞപ്പോള്‍ സാറിനും ഇഷ്ടമായി. ഞാനും അണ്ണിയും (ജ്യോതിക) സിനിമയിലുണ്ടാവുമെന്ന് പറഞ്ഞപ്പോള്‍ സിനിമ അദ്ദേഹം ചെയ്യാമെന്ന് പറഞ്ഞു.

സിനിമയോടുളള ജീത്തു സാറിന്റെ സമീപനം തനിക്കേറെ ഇഷ്ടമായെന്നും കാര്‍ത്തി പറഞ്ഞു. ഒരു ഫാമിലി ത്രില്ലര്‍ എടുക്കുമ്പോള്‍ അതിനു വേണ്ട കാര്യങ്ങളെല്ലാം വളരെ വ്യക്തതയോടെയും കൃത്യതയോടെയുമാണ് അദ്ദേഹം ചെയ്തത്. അതുകൊണ്ട് സെറ്റില്‍ താന്‍ വളരെ റിലാക്‌സ്ഡ് ആയിരുന്നുവെന്നും കാര്‍ത്തി പറഞ്ഞു. ജിത്തു സാറിനോടൊപ്പം രണ്ടാമത്തെ ചിത്രമാണിതെന്ന് ആന്‍സണ്‍ പോള്‍ പറഞ്ഞു.

ആദ്യ സിനിമയില്‍ ചെറിയ റോളായിരുന്നുവെന്നും എന്നാല്‍ ഇത്തവണ നല്ലൊരു റോള്‍ ലഭിച്ചെന്നും നടന്‍ പറഞ്ഞു. എല്ലാ കഥാപാത്രങ്ങള്‍ക്കും പ്രാധാന്യമുളള ഒരു ചിത്രമാണ് തമ്പിയെന്ന് കാര്‍ത്തി പറഞ്ഞു. എടുക്കാന്‍ പോവുന്ന സീനുകളെക്കുറിച്ച് എല്ലാ താരങ്ങളെയും ഒരുമിച്ച് ഇരുത്തി കൃത്യമായി ജീത്തു സര്‍ പറഞ്ഞുതരുമായിരുന്നു.

അതുകൊണ്ട് എല്ലാവര്‍ക്കും നല്ല രീതിയില്‍ സിനിമയില്‍ പെര്‍ഫോം ചെയ്യാന്‍ പറ്റി. എല്ലാ ഇമോഷന്‍സും ഉളള ഒരു ചിത്രമായിരിക്കുമിതെന്നും ക്രിസ്മസിന് മുന്‍പ് എത്തുമെന്നും നടന്‍ പറഞ്ഞു. എല്ലാവരും കുടുംബത്തോടൊപ്പം വന്ന് ചിത്രം കാണണമെന്നും കാര്‍ത്തി പറഞ്ഞു. 96ലൂടെ തരംഗമായ ഗോവിന്ദ് വസന്തയാണ് സിനിമയ്ക്ക് വേണ്ടി സംഗീതമൊരുക്കിയിരിക്കുന്നത്. ട്രെയിലറിനും ടീസറിനുമൊപ്പം തമ്പിയിലെ ഗാനങ്ങളും നേരത്തെ അണിയറ പ്രവര്‍ത്തകര്‍ പുറത്തുവിട്ടിരുന്നു. ഡിസംബര്‍ 20നാണ് കാര്‍ത്തി ചിത്രം തിയ്യേറ്ററുകളിലേക്ക് എത്തുന്നത്. തമിഴ്‌നാട്ടിലെന്ന പോലെ കേരളത്തിലും ഒരേസമയം സിനിമ റിലീസ് ചെയ്യും.