മോഹൻലാലിന്റെ അടിപൊളി താടി ലുക്കിന് പിന്നിൽ ഇദ്ദേഹമാണ്, കൈവിറച്ച നിമിഷത്തെ കുറിച്ച് സ്റ്റൈലിസ്റ്റ്

ആസിഫ് അലി, ആഷിക്ക് അബു, ശ്രീനാഥ് ഭാസി, ബാലു, വിനായകൻ, അർജുൻ അശോകൻ തുടങ്ങിയ താരങ്ങളുടെ ഹെയർസ്റ്റൈലിസ്റ്റാണ് ഉണ്ണി. ബി ഉണ്ണികൃഷ്ണൻ സംവിധാനം ചെയ്യുന്ന ചിത്രമായ ആറാട്ടിന്റെ ഒരു ഷെഡ്യൂൾ ഊട്ടിയിൽ പൂർത്തിയായിട്ടുണ്ട്. ഇനി കൊച്ചിയിലാണ് ചിത്രത്തിന്റെ ബാക്കി ചിത്രീകരണം. ഇതിനായി ആറാട്ട് സംഘം കൊച്ചിയിൽ എത്തിയിട്ടുണ്ട് താടി സ്റ്റൈൽ ചെയ്യുന്നതിനായിട്ടാണ് കൊച്ചിയിലെത്തിയ മോഹൻലാൽ ഉണ്ണിയുടെ സലൂണിൽ എത്തുന്നത്.

സിനിമയിൽ മാത്രം കണ്ടു വന്ന പ്രിയ താരത്തെ മുന്നിൽ കണ്ടപ്പോൾ അമ്പരപ്പും പേടിയുമായിരുന്നുവെന്ന് ഉണ്ണി പറയുന്നു. അതൊക്കെ മാറ്റി വെച്ച് അദ്ദേഹത്തിന് വേണ്ട രീതിയിൽ താടി സ്റ്റൈലാക്കി കൊടുക്കുകയായിരുന്നു. കൂടാതെ പ്രിയപ്പെട്ട താരത്തിനോടൊപ്പം നിന്ന് ഒരു ചിത്രവും എടുത്തിട്ടുണ്ട്. താരത്തിനോടൊപ്പമുള്ള ഉണ്ണിയുടെ ചിത്രം സമൂഹമാധ്യമങ്ങളിൽ വൈറലായിട്ടുണ്ട്.

ആറാട്ടിന് വേണ്ടിയാണെന്നും എന്താണ് വേണ്ടതെന്നും കൃത്യമായി പറഞ്ഞു തന്നു. പേടിയോടെയാണ് ലാലേട്ടന് വേണ്ടി സ്റ്റൈൽ ചെയ്തത്. ചെയ്തു കഴിഞ്ഞപ്പോൾ അദ്ദേഹം സ്വന്തം സ്റ്റൈലിൽ വളരെ നന്നായിട്ടുണ്ട് എന്ന് പറഞ്ഞു. അത് വലിയ സന്തോഷം നൽകിയെന്നും ഉണ്ണി അഭിമുഖത്തിൽ പറഞ്ഞു.മമ്മൂട്ടിയെ സ്റ്റൈൽ ചെയ്യണമെന്നുള്ള ആഗ്രഹം ഉണ്ണി പ്രകടിപ്പിച്ചിട്ടുണ്ട്.

മിസ്റ്റർ ഫ്രോഡിന് ശേഷം മോഹൻലാൽ, ബി ഉണ്ണികൃഷ്ണൻ ടീം ഒന്നിക്കുന്ന ചിത്രമാണ് ആറാട്ട്. നെയ്യാറ്റിൻ കര ഗോപന്റെ ആറാട്ട് എന്നാണ് ചിത്രത്തിന്റെ മുഴുവൻ പേര്. പുലുമുരുകന് ശേഷം ഉദയകൃഷ്ണ മോഹൻലാലിന് വേണ്ടി തിരക്കഥ ഒരുക്കുന്ന ചിത്രമാണിത്. ഹ്യൂമറിനും ആക്ഷനും ഒരുപോലെ പ്രധാന്യം നൽകി കൊണ്ടാണ് ചിത്രം ഒരുക്കിയിരിക്കുന്നത്. നെയ്യാറ്റിൻകര ഗോപൻ എന്ന കഥാപാത്രത്തെയാണ് മോഹൻലാൽ അവതരിപ്പിക്കുന്നത്.20 കോടി ബജറ്റിൽ ഒരുങ്ങുന്ന ചിത്രമായ ആറാട്ടിൽ മോഹൻലാലിനോടൊപ്പം വൻ താരനിരയാണ് അണിനിരക്കുന്നത്.നെടുമുടി വേണു, സിദ്ദീഖ്, സായ് കുമാർ, വിജയ രാഘവൻ, ജോണി ആന്‍റണി, ഇന്ദ്രൻസ്, രാഘവൻ, നന്ദു, ബിജു പപ്പന്‍, രവി കുമാർ, ഷീല, സ്വാസിക, മാളവിക, രചന നാരായണൻ കുട്ടി തുടങ്ങിയവർ ചിത്രത്തിൽ പ്രധാന വേഷത്തിവെത്തുന്നുണ്ട്. ശ്രദ്ധ ശ്രീനാഥാണ് ചിത്രത്തിലെ നായിക.