മീര ജാസ്മിനെതിരെയുള്ള കേസ് 29ന്

വഞ്ചനാക്കുറ്റം ആരോപിച്ച് നടി മീര ജാസ്മിനെതിരേയെടുത്ത കേസ് പരിഗണിക്കുന്നത് 29ലേക്ക് മാറ്റി. കരിമ്പില്‍ ഫിലിംസ് മാനേജിങ് പാര്‍ട്ണറും സംവിധായകനുമായ കെഎ ദേവരാജ് സമര്‍പ്പിച്ച ഹര്‍ജിയില്‍ കോഴിക്കോട് സിജെഎം കെപി ജോണ്‍ മുന്‍പ് സമന്‍സ് അയച്ചിരുന്നു.

'സ്വപ്‌നമാളിക' എന്ന സിനിമയിലഭിനയിക്കാന്‍ നാലുകൊല്ലം മുമ്പ് അഞ്ചുലക്ഷം രൂപ വീതം സിനിമാതാരങ്ങളായ മീരാ ജാസ്മിനും പൃഥ്വിരാജും അഡ്വാന്‍സ് കൈപ്പറ്റി അഭിനയിക്കാതെ വഞ്ചിച്ചുവെന്നാണ് കേസ്.

താരങ്ങള്‍ പണം തിരികെ നല്‍കിയില്ലെന്ന് കാണിച്ച് താരസംഘടന അമ്മയ്ക്ക് പരാതി നല്‍കിയിട്ടും വക്കീല്‍ നോട്ടീസ് അയച്ചിട്ടും നടപടിയില്ലാത്തതിനെ തുടര്‍ന്നാണ് കോടതിയില്‍ ഹര്‍ജി നല്‍കിയത്.

മീരാ ജാസ്മിനുവേണ്ടി ഹാജരായ അഡ്വ. പി.വി. ഹരി അവര്‍ക്കുവേണ്ടി അവധിയപേക്ഷ നല്‍കി. നടപടിക്രമങ്ങള്‍ പാലിക്കാതെയാണ് പരാതി നല്‍കിയതെന്ന് കാണിച്ച് ഹൈകോടതിയെ സമീപിച്ചതായും അഭിഭാഷകന്‍ കോടതിയെ അറിയിച്ചു.

പൃഥ്വിരാജുമായുള്ള കേസ് ഒത്തുതീര്‍പ്പായതായി കഴിഞ്ഞ തവണ കേസ് പരിഗണിക്കവെ കരിമ്പില്‍ ഫിലിംസിന്റെ അഭിഭാഷകന്‍ കോടതിയെ അറിയിച്ചിരുന്നു.