മമ്മൂട്ടിയുടെ നില കൂടുതല്‍ മോശം

മോഹന്‍ലാലിനെ വെച്ച് നോക്കുമ്പോള്‍ മമ്മൂട്ടിയുടെ നില കൂടുതല്‍ മോശമാണ്. കഴിഞ്ഞവര്‍ഷത്തെ താരമായി മാറിയ മമ്മൂട്ടിയുടെ ആഗസ്റ്റ് 15, ഡബിള്‍സ്, ദ ട്രെയിന്‍ എന്നിങ്ങനെ മൂന്ന് ചിത്രങ്ങളാണ് ആദ്യ അഞ്ച് മാസത്തില്‍ തിയറ്ററുകളിലെത്തിയത്. പക്ഷേ താരത്തിന്റെ കടുത്ത ആരാധകര്‍ പോലും ഈ സിനിമകളോട് മുഖം തിരിച്ചു. ഷാജി കൈലാസ് സംവിധാനം ചെയ്ത ആഗസ്റ്റ് 15 മോശം പടമായിരുന്നില്ലെങ്കിലും ക്രിസ്ത്യന്‍ ബ്രദേഴ്‌സ്, ഉറുമി തരംഗം അതിജീവിയ്ക്കാനുള്ള ശക്തി അതിനുണ്ടായില്ല. രണ്ടാമത്തെ ചിത്രമായ ഡബിള്‍സിന്റെ പരാജയം ആദ്യദിനം തന്നെ നിര്‍ണയിക്കപ്പെട്ടു. മുന്‍കാലനടി നദിയാ മൊയ്തുവിന്റെ സാന്നിധ്യവും സിനിമയ്ക്ക് ഗുണകരമായില്ല. ഏറ്റവുമവസാനം തിയറ്ററുകളിലെത്തിയ ജയരാജിന്റെ ദ ട്രെയിനും പരാജയത്തിന്റെ പാളയത്തിലൂടെയാണ് ഓടുന്നത്. ത്രില്ലടിപ്പിയ്ക്കാത്ത ത്രില്ലര്‍ മൂവിയെന്ന ദുഷ്‌പേരാണ് സിനിമയ്ക്കുള്ളത്.

ഈ പരാജയങ്ങള്‍ കൊണ്ടൊന്നും ഈ രണ്ട് നടന്‍മാരെയും ആരും എഴുതിത്തള്ളാന്‍ ധൈര്യപ്പെടില്ല. മികച്ച ചിത്രങ്ങളുമായി അവര്‍ തിരിച്ചുവരണമെന്ന് തന്നെയാണ് ആരാധകരും പ്രേക്ഷകരും ആഗ്രഹിയ്ക്കുന്നത്. കാസനോവ, അറബിയും ഒട്ടകവും മാധവന്‍ നായരും, സത്യന്‍ ചിത്രം കിങ് 2, വെനീസിലെ വ്യാപാരി, കോട്ടയം ബ്രദേഴ്‌സ് എന്നിങ്ങനെ ഇവരുടെ തിരിച്ചുവരവിന് കളമൊരുക്കുന്ന ചിത്രങ്ങള്‍ അണിയറിയില്‍ ഒരുങ്ങുകയാണ്.

സിനിമകളുടെ എണ്ണത്തില്‍ മൂന്നൂറിലെത്തിയ ലാലും നാനൂറിലേക്ക് കുതിയ്ക്കുന്ന മമ്മൂട്ടിയും കൂടുതല്‍ സിനിമകളില്‍ കാണാനല്ല, നല്ല സിനിമകളില്‍ അഭിനയിക്കുന്നത് കാണാനാണ് പ്രേക്ഷകര്‍ താത്പര്യപ്പെടുന്നത്. താരങ്ങള്‍ തിരിച്ചറിയുമെന്ന് തന്നെ കരുതാം.