ശ്രേയ റെഡ്ഢി വീണ്ടും മലയാളത്തില്‍

ശ്രേയ റെഡ്ഢി വീണ്ടും മലയാളത്തില്‍
മാര്‍ച്ച് 08, 2005

നവാഗതനായ കുക്കു സംവിധാനം ചെയ്യുന്ന ചിത്രത്തിലൂടെ തെലുങ്ക് നടി ശ്രേയ റെഡ്ഢി വീണ്ടും മലയാളത്തിലെത്തുന്നു. മുകേഷാണ് ഈ ചിത്രത്തില്‍ നായകനാവുന്നത്.

ഒരാള്‍ എന്നാണ് ചിത്രത്തിന് പേരിട്ടിരിക്കുന്നത്. സംവിധായകന്‍ സംഗീത് ശിവന്റെ സഹായിയായി പ്രവര്‍ത്തിച്ചിട്ടുള്ള കുക്കു ഈ ചിത്രത്തിലൂടെ സ്വതന്ത്രസംവിധായകനാവുകയാണ്. സംഗീത് ശിവന്റെ സ്നേഹപൂര്‍വം അന്ന എന്ന ചിത്രത്തില്‍ കുക്കു നായകനായി അഭിനയിച്ചിട്ടുണ്ട്.

രഞ്ജിത്തിന്റെ ബ്ലാക്ക് ആണ് ശ്രേയ റെഡ്ഢി ആദ്യമായി അഭിനയിച്ച മലയാളചിത്രം. മമ്മൂട്ടി നായകനായ ഈ ചിത്രത്തില്‍ ഒരു നാടന്‍ തമിഴ് പെണ്‍കുട്ടിയായി വേഷമിട്ട ശ്രേയ റെഡ്ഢിയുടെ അഭിനയം ശ്രദ്ധേയമായിരുന്നു.

അതുല്‍ കുല്‍ക്കര്‍ണി ആദ്യമായി അഭിനയിക്കുന്ന മലയാള ചിത്രത്തിലും ശ്രേയ റെഡ്ഢി വേഷമിടുന്നുണ്ട്. ഒരാള്‍ എന്ന ചിത്രത്തിന്റെ ഷൂട്ടിംഗ് പൊന്‍മുടിയില്‍ ആരംഭിക്കും.