»   » ലാല്‍-ബ്ലെസി ചിത്രത്തില്‍ അനുപം ഖേര്‍

ലാല്‍-ബ്ലെസി ചിത്രത്തില്‍ അനുപം ഖേര്‍

Posted By:
Subscribe to Filmibeat Malayalam
Mohanlal And Anupam Kher
തന്മാത്ര, ഭ്രമരം കരിയറിലെ എണ്ണപ്പെട്ട സിനിമകളുടെ സംവിധായകന്‍ ബ്ലെസിയുമൊത്ത് ലാല്‍ വീണ്ടും കൈകോര്‍ക്കുന്നു. പ്രണയം എന്ന് പേരിട്ടിരിയ്ക്കുന്ന ചിത്രത്തില്‍ ബോളിവുഡിന്റെ അഭിനയസാമ്രാട്ട് അനുപം ഖേര്‍ അഭിനയിക്കുന്നത് ലാല്‍ ആരാധകര്‍ക്ക് മറ്റൊരു സര്‍പ്രൈസാണ്. മോഹന്‍ലാലും അനുപം ഖേറും ഒന്നിയ്ക്കുന്ന മൂന്നാമത്തെ ചിത്രം കൂടിയായിരിക്കും ഇത്. 1990ല്‍ പുറത്തിറങ്ങിയ ഇന്ദ്രജാലം, 2001ല്‍ പ്രജ എന്നീ ലാല്‍ ചിത്രങ്ങളിലാണ് അനുപം ഖേര്‍ ഇതിന് മുന്പ് മുഖം കാണിച്ചിരിയ്ക്കുന്നത്. ഇതിലെല്ലാം ചെറിയ വേഷങ്ങളായിരുന്നെങ്കില്‍ പ്രണയത്തില്‍ ലാലിനൊപ്പം നില്‍ക്കുന്ന വേഷത്തില്‍ തന്നെയാണ് അനുപം പ്രത്യക്ഷപ്പെടുന്നത്.

മോഹന്‍ലാല്‍, അനുപം ഖേര്‍, ജയപ്രദ എന്നിവര്‍ അവതരിപ്പിയ്ക്കുന്ന കഥാപാത്രങ്ങളുടെ പോയകാലത്തെ പ്രണയം തന്നെയാണ് സിനിമയുടെ പ്രമേയം. അടുത്തയാഴ്ച കൊച്ചിയില്‍ ചിത്രീകരണം ആരംഭിയ്ക്കുന്ന സിനിമയില്‍ ലാല്‍, അനുപം ഖേര്‍, ജയപ്രദ എന്നിവരുടെ കോമ്പിനേഷന്‍ സീനുകളാണ് ആദ്യം ചിത്രീകരിയ്ക്കുക. പ്രണയത്തിലൂടെ സതീഷ് കുറുപ്പ് എന്നൊരു ക്യാമറമാനെ കൂടി ബ്ലെസി മലയാളത്തിന് സമ്മാനിയ്ക്കുകയാണ്. ഒഎന്‍വിയുടെ വരികള്‍ക്ക് ജയചന്ദ്രന്‍ ഈണം പകരും.

പ്രണയത്തിന്റെ ആദ്യ ഷെഡ്യൂളിന് ശേഷം പ്രിയന്‍ ചിത്രമായ അറബിയും ഒട്ടകവും മാധവന്‍നായരും... തീര്‍ക്കുന്നതിനായി ലാല്‍ അബുദാബിയിലേക്ക് പോകും. ഇത് പൂര്‍ത്തിയാക്കിയതിന് ശേഷം ബ്ലെസി ചിത്രത്തില്‍ ലാല്‍ വീണ്ടും ജോയിന്‍ ചെയ്യും.

ചൈനാ ടൗണ്‍, ക്രിസ്ത്യന്‍ ബ്രദേഴ്‌സ് എന്നിങ്ങനെ പക്കാ കൊമേഴ്‌സ്യല്‍ മസാലകള്‍ക്ക് ശേഷമാണ് ലാല്‍ ബ്ലെസിയ്‌ക്കൊപ്പം കൈകോര്‍ക്കുന്നത്. ലാല്‍ ആരാധകര്‍ക്ക് ഏറെ സന്തോഷം പകരുന്ന വാര്‍ത്തയാണ് ഇതെന്ന കാര്യത്തില്‍ സംശയമില്ല. കൂട്ടുകെട്ട് ഒന്നിച്ചപ്പോഴൊക്കെ മലയാളത്തിന് മികച്ച സിനിമകള്‍ ലഭിച്ചിരുന്നു. ബ്ലെസിയുടെ സിനിമകളില്‍ അഭിനയത്തിന്റെ പുതിയ തലങ്ങളിലെത്തിച്ചേരാനും ലാലിന് കഴിഞ്ഞു. എന്നാല്‍ അനുപം ഖേറിനെ പോലെ എക്‌സ്പീരിയന്‍സ് ആക്ടര്‍ക്കൊപ്പമുള്ള അഭിനയം ലാലിനൊരു വെല്ലുവിളിയാവുമെന്ന കാര്യത്തില്‍ സംശയമില്ല.

English summary
Mohanlal and Blessy are coming together for the third time after their critically acclaimed Thanmatra and Bhramaram.
Please Wait while comments are loading...

Malayalam Photos

Go to : More Photos