ഷാരൂഖിന് ശേഷം അമീറിനൊപ്പം രജനി

ബോളിവുഡിലെ കിങ് ഖാന്‍ ഷാരൂഖിനൊപ്പം രാ വണ്ണില്‍ പ്രത്യക്ഷപ്പെട്ടതിന് പിന്നാലെ രജനി മറ്റൊരു സൂപ്പര്‍താരമായ അമീര്‍ ഖാനൊപ്പവും അഭിനയിക്കുന്നു. എന്നാല്‍ സിനിമയ്ക്ക് വേണ്ടിയല്ല, ഇന്ത്യയിലെ ഗ്രാമങ്ങളിലുള്ള കുട്ടികളുടെ പോഷകാഹാരകുറവിനെക്കുറിച്ച് പ്രതിപാദിക്കുന്നബോധവത്ക്കരണ ചിത്രത്തിലാണ് ഇതുവരും ഒന്നിക്കുക. കേന്ദ്ര സര്‍ക്കാരാണ് ഈ ചിത്രം നിര്‍മിയ്ക്കുന്നത്.

80കളില്‍ പോളിയോ നിര്‍മാര്‍ജനത്തിന്റെ ഭാഗമായി പുറത്തിറക്കിയ ബോധവത്ക്കരണ ചിത്രത്തില്‍ രജനി അഭിനയിച്ചിരുന്നു. 'ആതങ്ക് ഹി ആതങ്ക്' എന്ന 95ല്‍ പുറത്തിറങ്ങിയ ഹിന്ദി ചിത്രത്തില്‍ ആമിറും രജനിയും ഒരുമിച്ച് അഭിനയിച്ചിരുന്നു.

അടുത്തിടെ രജനിയുടെ ബോളിവുഡ് കണക്ഷന്‍ ശക്തമായി വരികയാണ്. യന്തിരനില്‍ ഐശ്വര്യ റായി നായികയായതിന് പിന്നാലെ ഹിന്ദി ചിത്രമായ രാ വണ്ണിലും രജനി അഭിനയിച്ചിരുന്നു. രജനിയുടെ പുതിയ ചിത്രമായ റാണയില്‍ നായികയാവുന്നത് ബോളിവുഡ് താരമായ ദീപിക പദുകോണാണ്.

ഇന്ത്യന്‍ ഷോ ബിസിനസ്സിലെ സൂപ്പര്‍ താരമാണെങ്കിലും ഒരു പരസ്യചിത്രത്തിലും മുഖം കാണിയ്ക്കാന്‍ രജനി തയാറായിട്ടില്ല. എന്നാല്‍ ജനോപകാരപ്രദമായ പരസ്യവുമായി സഹകരിയ്ക്കുന്നതിലൂടെ റിയല്‍ സൂപ്പര്‍സ്റ്റാറെന്ന് രജനി ഒരിയ്ക്കല്‍ കൂടി തെളിയുകയാണ്.