ബോംബെ കലാപഭൂമിയില്‍ മമ്മൂട്ടി

രാജ്യത്തെ നടുക്കിയ ബോംബെ കലാപത്തെ ആസ്പദമാക്കിയൊരുക്കുന്ന ചിത്രത്തില്‍ മമ്മൂട്ടി നായകനാവുന്നു. മികച്ച തിരക്കഥകളൊരുക്കി ശ്രദ്ധേയനായ ബാബു ജനാര്‍ദ്ദനന്‍ ആദ്യമായി സംവിധായകനാവുന്ന ബോംബെ മാര്‍ച്ച് 12 എന്ന ചിത്രത്തിന് വേണ്ടിയാണ് മമ്മൂട്ടി ഡേറ്റ് നല്‍കിയിരിക്കുന്നത്.

രാജ്യത്തിന്റെ സാമ്പത്തിക തലസ്ഥാനത്തെ ഭീതിയിലാഴ്ത്തി 1993ലെ മാര്‍ച്ച് 12നുണ്ടായ സ്‌ഫോടനപരമ്പരയില്‍ തകര്‍ത്തെറിയപ്പെട്ട സാധാരണക്കാരുടെ ജീവിതമാണ് ബോംബെ മാര്‍ച്ച് 12 എന്ന സിനിമയില്‍ ബാബു ജനാര്‍ദ്ദനന്‍ ആവിഷ്‌ക്കരിയ്ക്കുന്നത്. ബോംബെ നഗരത്തെ നടുക്കിയ 13 ബോംബ് സ്‌ഫോടനങ്ങളില്‍ 250ലധികം പേര്‍ കൊല്ലപ്പെടുകയും എഴുനൂറോളം പേര്‍ക്ക് പരിക്കേല്‍ക്കുകയും ചെയ്തിരുന്നു.

മലയാളത്തിന് പുറമെ മറ്റു ഭാഷകളിലും നിര്‍മിയ്ക്കുന്ന സിനിമ രാജസ്ഥാനിലും കേരളത്തിലും വെച്ച് ചിത്രീകരിയ്ക്കാനാണ് പ്ലാന്‍.

അച്ഛനുറങ്ങാത്ത വീട്, തലപ്പാവ്, വാസ്തവം തുടങ്ങിയവയാണ് ബാബു ജനാര്‍ദ്ദനന്റെ ശ്രദ്ധേയമായ തിരക്കഥകള്‍.