മൃഗയയുടെ റീമേക്കിനില്ല: അമല്‍ നീരദ്

മമ്മൂട്ടി-ഐവി ശശി ടീമിന്റെ സൂപ്പര്‍ഹിറ്റ് ചിത്രമായ മൃഗയ തമിഴിലേക്ക് റീമേക്ക് ചെയ്യാന്‍ ഉദ്ദേശമില്ലെന്ന് അമല്‍ നീരദ് വ്യക്തമാക്കി. മൃഗയയുടെ തമിഴ് റീമേക്കിന് അമല്‍ ഒരുങ്ങുന്നുവെന്നും ചിത്രത്തില്‍ കോളിവുഡ് സൂപ്പര്‍താരം സൂര്യ അഭിനയിക്കുമെന്നും നേരത്തെ റിപ്പോര്‍ട്ടുകളുണ്ടായിരുന്നു.

അതേ സമയം സൂര്യയുമൊത്തുള്ള ഒരു പ്രൊജക്ട് അടുത്ത വര്‍ഷം ഉണ്ടാകുമെന്ന വാര്‍ത്തകള്‍ സംവിധായകന്‍ സ്ഥിരീകരിച്ചു. തീര്‍ത്തും ഫ്രഷായ ഒരു സ്‌റ്റോറിയായിരിക്കും ഈ സിനിമയുടേത്. സൂര്യ ഇതില്‍ ഒരു വ്യത്യസ്തമായ ഒരു കഥാപാത്രമായിരിക്കും അവതരിപ്പിയ്ക്കുകയെന്നും അമല്‍ പറയുന്നു.

സൂര്യയുടെ രാംഗോപാല്‍ വര്‍മ്മ, മുരുഗദോസ് പ്രൊജക്ടുകള്‍ക്ക് ശേഷം 2010ന്റെ അവസാനത്തോടെ മാത്രമേ ഈ സിനിമയുടെ വര്‍ക്കുകള്‍ ആരംഭിയ്ക്കുകയുള്ളൂ. അതിനിടെ പൃഥ്വിരാജിനെ നായകനാക്കി അന്‍വര്‍ എന്ന പേരിലൊരുക്കുന്ന ചിത്രം അമലിന്റെതായി അടുത്ത വര്‍ഷം തിയറ്ററുകളിലെത്തും.