ജൂലൈ നാലും പരാജയത്തിന്റെ ഗണത്തില്‍

ദിലീപ് നായകനായ ജൂലൈ നാലും പരാജയപ്പെട്ട ചിത്രങ്ങളുടെ കൂട്ടത്തില്‍ വരും. ആദ്യദിവസങ്ങള്‍ക്കു ശേഷം ഈ ചിത്രത്തിന് പ്രേക്ഷകര്‍ തീരെ കുറഞ്ഞു. ഹലോയ്ക്കും അറബിക്കഥയ്ക്കും പ്രേക്ഷകരുടെ തിരക്ക് തുടരുമ്പോള്‍ ആ ചിത്രങ്ങള്‍ക്കൊപ്പം റിലീസ് ചെയ്ത ജൂലൈ നാലിന് അത്തരമൊരു വിജയം നേടിയെടുക്കാനായില്ല.

ജയറാ നായകനായ സൂര്യനും പരാജയത്തിന്റെ ഗണത്തിലേക്കാണ് നീങ്ങുന്നത്. ജൂലൈ 20ന് റിലീസ് ചെയ്ത ഈ ചിത്രം രണ്ടാഴ്ച പിന്നിടുമ്പോഴേക്കും തീരെ കുറഞ്ഞ കളക്ഷനുമായാണ് പ്രദര്‍ശനം തുടരുന്നത്. അറബിക്കഥയോടും മോഹന്‍ലാല്‍, സുരേഷ് ഗോപി ചിത്രങ്ങളോടും മത്സരിച്ച് വിജയം നേടാന്‍ മാത്രമുള്ള രസികന്‍ കഥയോ നമ്പരുകളോ ഈ ചിത്രത്തിലില്ല. തുടര്ച്ചയായി ജയറാമിന് നേരിടേണ്ടി വരുന്ന പരാജയങ്ങളുടെ പട്ടികയില്‍ തന്നെയാണ് ഈ ചിത്രത്തിന്റെയും സ്ഥാനം.

ജൂലൈ അവസാനിച്ചപ്പോള്‍ മൂന്ന് വിജയചിത്രങ്ങളും മൂന്ന് പരാജയചിത്രങ്ങളുമാണ് മലയാള സിനിമക്ക് ലഭിച്ചിരിക്കുന്നത്. ഈ വര്‍ഷം ഇതുവരെ കണ്ട ഏറ്റവും ശക്തമായ സൂപ്പര്‍താര യുദ്ധത്തില്‍ വിജയിച്ചത് രണ്ട് സൂപ്പര്‍താര ചിത്രങ്ങള്‍ മാത്രം. മമ്മൂട്ടി, ജയറാം, ദിലീപ് ചിത്രങ്ങളെ പിന്നിലാക്കി ലാല്‍ ജോസിന്റെ അറബിക്കഥയും വിജയം വരിച്ചു.