തിലകന് സീരിയയിലും വിലക്ക്

ബിഗ് സ്‌ക്രീനിന് പിന്നാലെ മിനി സ്‌ക്രീനിലും നടന്‍ തിലകന് വിലക്ക്. സൂര്യ ടിവിയില്‍ സംപ്രേക്ഷണം ചെയ്യുന്ന മറ്റൊരുവള്‍ എന്ന സീരിയലില്‍ നിന്ന് തിലകനെ ഒഴിവാക്കി. സീരിയല്‍ അഭിനേതാക്കളുടെ സംഘടനയായ ആത്മയുടെ നിര്‍ദ്ദേശപ്രകാരമാണ് തിലകനെ ഒഴിവാക്കിയതെന്ന്റിപ്പോര്‍ട്ടുകളുണ്ട്.

സീരിയല്‍ നിര്‍മ്മാതാവ് ചൊവ്വാഴ്ച രാവിലെ തിലകനെ വിളിച്ച് ഒഴിവാക്കിയ വിവരം അറിയിക്കുകയായിരുന്നു. രാവിലെ കോവളത്ത് ഷൂട്ടിങ് ലൊക്കേഷനിലെത്തണമെന്ന് തിലകനോട് നേരത്തേ പറഞ്ഞിരുന്നു.

തിലകനെ ഒഴിവാക്കണമെന്ന് ആത്മയുടെ സെക്രട്ടറി പൂജപ്പുര രാധാകൃഷ്ണനാണ് നിര്‍മ്മാതാവിനോട് ആവശ്യപ്പെട്ടതെന്ന് സൂചനകളുണ്ട്. സിനിമാ താര സംഘടനയായ അമ്മയുടെ എതിര്‍പ്പ് നേരിടുന്നയാളെ ഒഴിവാക്കണമെന്നായിരുന്നു നിര്‍ദ്ദേശം.

സിനിമയില്‍ തൊഴില്‍ നിഷേധിച്ചുവെന്ന പരാതിയുടെ അടിസ്ഥാനത്തില്‍ സംസ്ഥാന ലേബര്‍ കമ്മീഷണര്‍ തിലകനില്‍ നിന്നും തെളിവെടുപ്പ് നടത്തിയതിന് തൊട്ടുപിറ്റേന്നാണ് ഈ മുതിര്‍ന്ന നടന്‍ സീരിയലില്‍ നിന്നും ഒഴിവാക്കപ്പെട്ടിരിയ്ക്കുന്നത്.