നല്ലൊരു വേഷം കിട്ടിയാലുടന്‍ വിവാഹം- ഭാവന

ഒടുവില്‍ ഭാവനയും വിവാഹജീവിതത്തെക്കുറിച്ച് ആലോചനകള്‍ തുടങ്ങിയിരിക്കുന്നു. കരിയറില്‍ കാര്യമായി എന്തെങ്കിലും നേട്ടങ്ങള്‍ ഉണ്ടായാല്‍ ഉടന്‍ തന്നെ വിവാഹജീവിതം ആരംഭിയ്ക്കുന്നതിനെപ്പറ്റി കാര്യമായി ആലോചിയ്ക്കാനാണ് ഭാവനയുടെ തീരുമാനം.

ഫിലിം ഇന്‍ഡസ്ട്രിയിലെത്തുന്ന ഏതൊരു നടിയ്ക്കും തന്റെ അഭിനയമികവ് വെളിപ്പെടുത്തുന്ന കുറച്ച് സിനിമകളെങ്കിലും ലഭിയ്ക്കാറുണ്ട്. എന്നാല്‍ അങ്ങനെ എടുത്തുപറയാവുന്ന സിനിമകള്‍ തനിയ്ക്കില്ലെന്നും നമ്മള്‍ എന്ന ചിത്രത്തിലൂടെ വെള്ളിത്തിരയിലെത്തിയ ഈ തൃശൂര്‍ക്കാരി പറയുന്നു.

വിവാഹജീവിതത്തെക്കുറിച്ച് പലരും ചോദിയ്ക്കാറുണ്ട്. അപ്പോഴൊക്കെ ഒരു മികച്ച കഥാപാത്രത്തെ അവതരിപ്പിയ്ക്കാനുള്ള ആഗ്രഹമാണ് എന്റെ ഉള്ളിലുണ്ടാവുക. അങ്ങനെയൊന്ന് ലഭിച്ചതിന് ശേഷം വിവാഹജീവിതത്തിലേക്ക് കടന്നാല്‍ മതിയെന്നാണ് തീരുമാനം- ഭാവന വ്യക്തമാക്കി.