ഹോം

വാർത്ത

മലയാളത്തിലേക്ക് പുതുമുഖങ്ങളുടെ പ്രവാഹം അവസാനിക്കുന്നില്ല. ഒടുവില്‍ റിപ്പോര്‍ട്ട് എത്തുമ്പോള്‍ പൃഥ്വിരാജിന്റെ നായികയായി ഒരു കാശ്മീരി സുന്ദരി വരുന്നു. മേജര്‍ രവി സംവിധാനം ചെയ്യുന്ന പിക്കറ്റ് 43 എന്ന ചിത്രത്തിന് വേണ്ടിയാണ് പൃഥ്വിരാജിന് കാശ്മീരിന്‍ നിന്നൊരു നായിക വരുന്നത്.

മോഹന്‍ലാലിനെയല്ലാതെ മറ്റൊരു താരത്തെ നായകനാക്കി മേജര്‍ രവി പരീക്ഷിക്കുന്ന ആദ്യത്തെ ചിത്രമാണ് പിക്കറ്റ് 43. പതിവുപോലെ തന്റെ പട്ടാള ജീവിതാനുഭവങ്ങള്‍ തന്നെയാണ് ചിത്രത്തിന്റെ പ്രമേയം. പക്ഷെ മുന്‍ ചിത്രങ്ങളില്‍ നിന്ന് മാറി വ്യത്യസ്തമായ ലൊക്കേഷനുകളും രചാനാ രീതിയുമായിരിക്കും പിക്കറ്റ് 43യിലെന്ന് സംവിധായകന്‍ മേജര്‍ രവി പറയുന്നു.

കാശ്മീരില്‍ തണുപ്പുള്ള ഒരു പ്രദേശത്ത് ഒറ്റപ്പെട്ടുപോകുന്ന സൈനികന്റെ കഥ പറയുന്ന ചിത്രമാണ് പിക്കറ്റ് 43. ഒരു നായ ചിത്രത്തിലെ പ്രധാന കഥാപാത്രമായി എത്തുന്നുണ്ട്. പൃഥ്വിരാജിന് പുറമെ ഹിന്ദി, തമിഴ് താരങ്ങളായിരിക്കും മറ്റ് പ്രധാന കഥാപത്രങ്ങളെ അവതരിപ്പിക്കുക. നാസര്‍ദ്ദീന്‍ ഷായുടെ ബന്ധുവാണ് ചിത്രത്തിലെ വില്ലന്‍ വേഷത്തിലെത്തുന്നത് എന്നും റിപ്പോര്‍ട്ടുകളുണ്ട്.

സൈന്യവും യുദ്ധവും മാത്രമല്ല മനോഹരമായ പാട്ടും പ്രണയവും ചിത്രത്തിലുണ്ട്. യുവതലമുറയ്ക്ക് ഒരു സന്ദേശം കൂടിയായിരിക്കും പിക്കറ്റ് 43 എന്ന് മേജര്‍ രവി പറയുന്നു. ഇപ്പോള്‍ സെവന്‍ത് ഡേ എന്ന ചിത്രത്തിലാണ് പൃഥ്വിരാജ് അഭിനയിക്കുന്നത്. ചിത്രത്തില്‍ 42 കാരനായ പൊലീസ് ഉദ്യോഗസ്ഥനെയാണ് പൃഥ്വി അവതരിപ്പിക്കുന്നത്.