ആശാന്റെ കൈ തല്ലിയൊടിച്ചോ? പരുക്കന്‍ കഥാപാത്രം ഡിമാന്‍ഡ് ചെയ്ത പരിക്കാണെന്ന് നടന്‍ കുഞ്ചാക്കോ ബോബന്‍

കൈ തുക്കിയിടാതെ ഇരിക്കാനായി ആര്‍മ് സ്ലിങ് ഇട്ട് നില്‍ക്കുന്നൊരു ഫോട്ടോയാണ് കുഞ്ചാക്കോ ബോബന്‍ സോഷ്യല്‍ മീഡിയ പേജിലൂടെ പങ്കുവെച്ചിരിക്കുന്നത്. ഒരു കലിപ്പ് നോട്ടത്തോട് കൂടി നില്‍ക്കുന്ന ചിത്രത്തിന് സമാനമായിട്ടുള്ള അടിക്കുറിപ്പാണ് താരം നല്‍കിയതും. 'ഒരു പരുക്കന്‍' കഥാപാത്രം ഡിമാന്‍ഡ് ചെയ്ത പരിക്ക്.. എന്നാണ് ചാക്കോച്ചന്റെ ക്യാപ്ഷന്‍. അതേ സമയം ഫ്രീക്ക് ആക്‌സിഡന്റാണെന്നും കൈയ്യിലിരിപ്പ്, കൈയ്യിരിപ്പ് പരിക്ക്, എന്നൊക്കെ ഹാഷ് ടാഗില്‍ നടന്‍ കൊടുത്തിട്ടുണ്ട്.

ടിനു പാപ്പച്ചന്റെ മൂവിയുടെ ലൊക്കേഷനില്‍ നിന്നാണ് കുഞ്ചാക്കോ ബോബന് പരിക്ക് പറ്റുന്നത്. ഇക്കാര്യവും ഹാഷ് ടാഗിൽ സൂചിപ്പിച്ചിട്ടുണ്ട്. പുതിയ ഫോട്ടോ കണ്ടതോടെ ചാക്കോച്ചനോട് സുഖവിവരം അന്വേഷിച്ച് എത്തുകയാണ് ആരാധകരും സഹപ്രവര്‍ത്തകരും. 'ഇനി പല്ല് മുറിയെ തിന്നാം' എന്നാണ് രമേഷ് പിഷാരടി നല്‍കിയ കമന്റ്. 'വേഗം സുഖം പ്രാപിച്ച് അതേ രീതിയില്‍ തന്നെ തിരിച്ച് വരാന്‍ സാധിക്കട്ടേ' എന്ന് നടന്‍ ബാലാജി ശര്‍മ്മയും കുറിച്ചു.

അടുത്തിടെ റിലീസിനെത്തിയ ചാക്കോച്ചന്റെ സിനിമയിലെ 'ന്നാ താന്‍ കേസ് കൊട്' എന്ന കമന്റാണ് കൂടുതലായും വരുന്നത്. റോഡിലെ കുഴില്‍ വീണോ, ചാക്കോച്ചനെയും പട്ടി ഓടിച്ചോ, ആശാന്റെ കൈ തല്ലിയൊടിച്ചോ? ടിനു പാപ്പച്ചന്റെ സിനിമയാണെങ്കില്‍ തീര്‍ച്ചയായും ഒരു പരിക്ക് പ്രതീക്ഷിക്കണം. ഇതൊക്കെ എന്ത്, അടുത്ത വര്‍ക്ക് രൂപകല്‍പന ചെയ്യാന്‍ ഒരു ഇടവേള, അത്രയേ ഒള്ളു, എല്ലാം ദൈവം നോക്കിക്കൊള്ളും' എന്ന് തുടങ്ങി നിരവധി കമന്റുകളാണ് ചാക്കോച്ചന്റെ പോസ്റ്റിന് താഴെ വന്ന് കൊണ്ടിരിക്കുന്നത്.

കഴിഞ്ഞ കുറേ കാലത്തിന് ശേഷം വേറിട്ട കഥാപാത്രങ്ങളുമായി പ്രേക്ഷകരുടെ മനം കവര്‍ന്നിരിക്കുകയായിരുന്നു കുഞ്ചാക്കോ ബോബന്‍. ന്നാ താന്‍ കേസ് കൊട് എന്ന സിനിമയ്ക്ക് പിന്നാലെ ഒറ്റ് എന്ന ചിത്രവും തിയറ്ററുകളിലേക്ക് എത്തിയിരുന്നു. രണ്ട് സിനിമകൡും ഗംഭീര പ്രകടനമാണ് താരം കാഴ്ച വെച്ചിരിക്കുന്നത്. ഇതിനിടെ ദേവദൂതര്‍ പാടി എന്ന പാട്ടിനൊപ്പമുള്ള ചാക്കോച്ചന്റെ ഡാന്‍സും സൂപ്പര്‍ഹിറ്റായി മാറിയിരുന്നു. നിലവില്‍ ഒന്‍പതോളം സിനിമകളാണ് കുഞ്ചാക്കോ ബോബന്റേതായി വരാനിരിക്കുന്നത്.