തമിഴ് നടൻ റോബോ ശങ്കർ അന്തരിച്ചു; വിട പറഞ്ഞത് പ്രേക്ഷകരെ ചിരിപ്പിച്ച പ്രിയ നടൻ

തമിഴ് നടൻ റോബോ ശങ്കർ അന്തരിച്ചു. 46 വയസായിരുന്നു. ചെന്നെെയിലായിരുന്നു അന്ത്യം. പുതിയ സിനിമയുടെ ഷൂട്ടിം​ഗിനിടെ ദേഹാസ്വസ്ഥ്യം ഉണ്ടാവുകയായിരുന്നു. കഴിഞ്ഞ ദിവസം തീവ്രപരിചരണ വിഭാ​ഗത്തിലേക്ക് മാറ്റിയിരുന്നു. രാത്രി എട്ടരയോടെയാണ് മരണം സ്ഥിരീകരിച്ചത്. കോമഡി വേഷങ്ങളിലൂടെയാണ് റോബോ ശങ്കർ ശ്രദ്ധിക്കപ്പെ‌ട്ടത്. ധനുഷ് നായകനായ മാരി എന്ന സിനിമയിലെ വേഷം ജനപ്രീതി നേടി. തമിഴ് ടെലിവിഷൻ രം​ഗത്തും റോബോ ശങ്കർ ശ്രദ്ധേയ സാന്നിധ്യമായിരുന്നു.

കലക്ക പൂ വാട്, ഇ​​ദ് ഇദ് എദ് എന്നീ ടെലിവിഷൻ ഷോകളിലൂടെ റോബോ ശങ്കർ ശ്രദ്ധ നേടി. മാരിയിലൂടെയാണ് സിനിമാ രം​ഗത്ത് തുടക്കം കുറിക്കുന്നത്. പിന്നീടിങ്ങോട്ട് നിരവധി സിനിമകളിൽ നിന്നും ഓഫറുകൾ വന്നു. കമൽ ഹാസൻ, സിമ്രാൻ, കാർത്തി തുടങ്ങിയവർ സോഷ്യൽ മീഡിയയിലൂടെ നടന് ആദരാഞ്ജലി അർപ്പിച്ചു.

ഇടക്കാലത്ത് മഞ്ഞപ്പിത്തം ബാധിച്ച് ശങ്കർ ആശുപത്രിയിലായിരുന്നു. ആരോ​ഗ്യം മോശമായതിനെത്തുടർന്ന് കുറച്ച് കാലം സിനിമാ രം​ഗത്ത് നിന്നും മാറി നിന്നു. ആരോ​ഗ്യം വീണ്ടെടുത്ത് വീണ്ടും അഭിനയ രം​ഗത്ത് സജീവമാകുന്നതിനിടെയാണ് മരണം. വൃക്കയുടെയും കരളിന്റെയും പ്രവർത്തനം നിലച്ചതാണ് മരണകാരണമെന്ന് ആശുപത്രി വൃത്തങ്ങൾ പറഞ്ഞു. ടെലിവിഷൻ താരം പ്രിയങ്കയാണ് ഭാര്യ. മകൾ ഇന്ദ്രജ സിനിമകളിലും ‌ടിവി പരിപാടികളിലും അഭിനയിച്ചിട്ടുണ്ട്.