വിഷ്ണു വിശാലും ജ്വാല ഗുട്ടയും വിവാഹിതരാവുന്നു? മനസുതുറന്ന് താരം

നടി രജനി നടരാജനായിരുന്നു വിഷ്ണു വിശാലിന്റെ ആദ്യ ഭാര്യ. ഒരു വര്‍ഷത്തോളം വേര്‍പിരിഞ്ഞു താമസിച്ചതിന് ശേഷമാണ് ഇരുവരും വിവാഹ മോചിതരായത്. തുടര്‍ന്നാണ് ജ്വാലയ്‌ക്കൊപ്പമുളള നടന്റെ ചിത്രങ്ങള്‍ സോഷ്യല്‍ മീഡിയയില്‍ വ്യാപകമായി പ്രചരിച്ചത്. പ്രണയം സ്ഥിരീകരിച്ചതോടെ ഇരുവരുടെയും വിവാഹം എന്നുണ്ടാവുമെന്ന് എല്ലാവരും ഉറ്റുനോക്കിയിരുന്നൊരു കാര്യമാണ്.

ഇപ്പോഴിതാ ആകാംക്ഷകള്‍ക്കൊടുവില്‍ ജ്വാല ഗുട്ട തന്നെ ഇതേക്കുറിച്ച് മനസുതുറന്നിരിക്കുകയാണ്. അടുത്തിടെ നടന്നൊരു അഭിമുഖത്തിലായിരുന്നു വിഷ്ണു വിശാലുമായുളള വിവാഹത്തെക്കുറിച്ച് താരം തുറന്നുപറഞ്ഞ്. വിഷ്ണുവുമായുളള വിവാഹം ഉടനുണ്ടാകുമെന്നാണ് ജ്വാല ഗുട്ട അറിയിച്ചിരിക്കുന്നത്. തിയ്യതി ഉറപ്പിച്ച ശേഷം വിവാഹത്തെ സംബന്ധിച്ചുളള ഔദ്യോഗിക അറിയിപ്പ് ഉണ്ടാകുമെന്നും ജ്വാല പറഞ്ഞു.

നേരത്തെ വിഷ്ണുവിനെ മിസ് ചെയ്യുന്നതായി ജ്വാല ഗുട്ട ഇന്‍സ്റ്റഗ്രാമിലൂടെ പറഞ്ഞിരുന്നു. കൊറോണ കാലത്ത് രണ്ടു പേരും രണ്ട് സ്ഥലങ്ങളിലാണുളളത്. കൊറോണയ്ക്ക് മുന്‍പ് എഫ് ഐആര്‍ എന്ന ചിത്രത്തിന്റെ തിരക്കുകളിലായിരുന്നു നടന്‍. ലോക്ക് ഡൗണ്‍ പ്രഖ്യാപിച്ചതോടെയാണ് സിനിമയുടെ ജോലികള്‍ നിര്‍ത്തിവെച്ചത്. പിന്നാലെയായിരുന്നു വിഷ്ണുവിനെ മിസ് ചെയ്യുന്നുവെന്ന് പറഞ്ഞ് ജ്വാല എത്തിയത്.

കാമുകിയ്ക്ക് നടന്‍ നല്‍കിയ മറുപടിയും ശ്രദ്ധേയമായി മാറിയിരുന്നു. സാരമില്ല. ഇപ്പോള്‍ സാമൂഹിക അകലമാണ് പ്രധാനം. എല്ലാവര്‍ക്കുമായി പ്രാര്‍ത്ഥിക്കൂ എന്നാണ് വിഷ്ണു വിശാല്‍ ട്വീറ്റ് ചെയ്തത്. ജ്വാല ഗുട്ടയുടെ ട്വീറ്റും അതിന് വിഷ്ണു വിശാല്‍ നല്‍കിയ മറുപടിയും സോഷ്യല്‍ മീഡിയയില്‍ ഒന്നടങ്കം വൈറലായി മാറിയിരുന്നു.

മുന്‍പ് ജ്വാലയെ വര്‍ഷങ്ങളായി അറിയാമെന്നും ഞങ്ങള്‍ക്ക് പൊതുവായി ഒരുപാട് സുഹൃത്തുക്കളുണ്ടെന്നും വിഷ്ണു വിശാല്‍ പറഞ്ഞിരുന്നു. ഒരുപാട് സമയം ഒന്നിച്ച് ചെലവഴിക്കാറുമുണ്ട്. ഞങ്ങള്‍ പരസ്പരം ഇഷ്ടപ്പെടുന്നു. പ്രണയത്തിലാണോ എന്ന് ചോദിച്ചാല്‍, ഈ അവസരത്തില്‍ എനിക്ക് അത് പറയാനാകില്ല. എന്നായിരുന്നു മുന്‍പ് വിഷ്ണു വിശാല്‍ പറഞ്ഞത്.