ഈ നരച്ച മുടിയ്ക്കും വയറ്റിലെ പാടുകള്‍ക്കും വിലയില്ലേ? ശ്രദ്ധേയമായി കനിഹയുടെ ഹ്രസ്വചിത്രം

ചിത്രത്തില്‍ കനിഹയും വേഷമിട്ടിട്ടുണ്ട്. മാതൃദിനത്തില്‍ എല്ലാ അമ്മമാര്‍ക്കുമായിട്ടാണ് കനിഹ ഈ വീഡിയോ സമര്‍പ്പിച്ചിരിക്കുന്നത്. കുട്ടികളെ വളര്‍ത്തുന്നതിനിടയില്‍ അമ്മമാര്‍ സ്വയം ശ്രദ്ധിക്കാന്‍ മറന്നുപോകുന്നു. നരച്ച മുടിയും ചുളിവും കണ്ണിന് ചുറ്റുമുളള കറുത്ത നിറവും ഗര്‍ഭകാലത്ത് വയറ്റിലുണ്ടാകുന്ന പാടുകളും അതിനൊന്നും വിലയില്ലേ?.

എന്നാല്‍ ജീവിക്കാനുളള നെട്ടോട്ടത്തിനിടെ അമ്മയ്ക്ക് വേണ്ടതെന്താണെന്ന് നമ്മള്‍ അറിയുന്നില്ല. വാര്‍ധക്യത്തില്‍ അമ്മമാര്‍ക്ക് വേണ്ടത് സ്‌നേഹവും പരിഗണനയും മാത്രം. കനിഹ പറയുന്നു. ഇമ്രാന്‍ അഹമ്മദാണ് കനിഹയുടെ ഹ്രസ്വ ചിത്രത്തിന് ഛായാഗ്രഹണം നിര്‍വ്വഹിച്ചിരിക്കുന്നത്. പ്രസന്ന ശിവരാമന്‍ സംഗീതവും ഗോകുല്‍ നാഥ് എഡിറ്റിങ്ങും ചെയ്തിരിക്കുന്നു.

നടിയുടെ ആദ്യ സംവിധാന സംരംഭത്തിന് മികച്ച പ്രതികരണമാണ് സമൂഹ മാധ്യമങ്ങളില്‍ ലഭിക്കുന്നത്. നന്നായിട്ടുണ്ടെന്ന് പറഞ്ഞ് നിരവധി പേര്‍ എത്തിയിരുന്നു. ലോക് ഡൗണ്‍ കാലത്ത് വീട്ടില്‍ നിന്നുളള വിശേഷങ്ങളും ചിത്രങ്ങളുമെല്ലാം തന്നെ നടി പങ്കുവെക്കാറുണ്ട്. മകനൊപ്പം ടിക്ക് ടോക്ക് ചെയ്തതിന്റെ ഒരു വീഡിയോയും കനിഹയുടെതായി നേരത്തെ തരംഗമായി മാറിയിരുന്നു.

നടിയായും സഹതാരമായുമൊക്കെയാണ് കനിഹ സിനിമകളില്‍ തിളങ്ങിയത്. മമ്മൂട്ടിയുടെ ബ്രഹ്മാണ്ഡ ചിത്രം മാമാങ്കത്തിലാണ് നടി എറ്റവുമൊടുവിലായി മലയാളത്തില്‍ അഭിനയിച്ചത്. സിനിമയില്‍ ഒരു പ്രാധാന്യമുളള റോളിലാണ് കനിഹ എത്തിയത്. അഭിനേത്രി എന്നതിലുപരി ഡബ്ബിംഗ് ആര്‍ട്ടിസ്റ്റ്, പിന്നണി ഗായിക, ടിവി അവതാരക എന്നീ മേഖലകളിലും കനിഹ തിളങ്ങിയിരുന്നു. തമിഴിനേക്കാള്‍ മലയാളത്തിലാണ് കനിഹയ്ക്ക് കൂടുതല്‍ സ്വീകാര്യത ലഭിച്ചിരുന്നത്.

മലയാളത്തില്‍ ഇതുവരെ ഇരുപതിലധികം സിനിമകളില്‍ നടി അഭിനയിച്ചിരുന്നു. മലയാളം, തമിഴ് തുടങ്ങിയ ഭാഷകള്‍ക്കൊപ്പം തെലുങ്കിലും കന്നഡയിലും നടി അഭിനയിച്ചിരുന്നു. മലയാളത്തില്‍ മമ്മൂട്ടി, മോഹന്‍ലാല്‍, സുരേഷ് ഗോപി, ജയറാം തുടങ്ങിയ സൂപ്പര്‍ താരങ്ങളുടെ നായികയായി കനിഹ അഭിനയിച്ചിരുന്നു. പഴശ്ശിരാജയിലെ കഥാപാത്രമാണ് നടിയുടെ കരിയറില്‍ വലിയ വഴിത്തിരിവുണ്ടാക്കിയത്. ഹരിഹരന്‍ സംവിധാനം ചെയ്ത ചിത്രത്തില്‍ മികച്ച പ്രകടനമാണ് നടി കാഴ്ചവെച്ചത്.