നിഖിലയെ പോലെ മമ്മൂക്കയെ നോക്കുന്ന നദിയ, വീണ്ടും വൈറലായി പഴയ ചിത്രം

ജോഫിന്‍ ടി ചാക്കോ സംവിധാനം ചെയ്ത ത്രില്ലര്‍ ചിത്രത്തില്‍ കരിയര്‍ ബെസ്റ്റ് റോള്‍ തന്നെയാണ് നിഖിലയ്ക്ക് ലഭിച്ചത്. മമ്മൂട്ടിയ്‌ക്കൊപ്പം ആദ്യാവസാനം നിഖില പ്രീസ്റ്റില്‍ നിറഞ്ഞുനില്‍ക്കുന്നുണ്ട്. മമ്മൂട്ടിക്കൊപ്പം ആദ്യമായി നടി അഭിനയിച്ച ചിത്രം കൂടിയായിരുന്നു ഇത്. ദി പ്രീസ്റ്റ് തിയ്യേറ്ററുകളില്‍ മികച്ച പ്രതികരണം നേടി ഇപ്പോഴും മുന്നേറുകയാണ്.

മികച്ച അഭിപ്രായങ്ങള്‍ക്കൊപ്പം ബോക്‌സോഫീസ് കളക്ഷന്റെ കാര്യത്തിലും സിനിമ നേട്ടമുണ്ടാക്കിയിരുന്നു. ബി ഉണ്ണികൃഷ്ണനും ആന്റോ ജോസഫും ചേര്‍ന്നാണ് ചിത്രം നിര്‍മ്മിച്ചത്. മമ്മൂട്ടി, മഞ്ജു വാര്യര്‍, നിഖില വിമല്‍ എന്നിവര്‍ക്കൊപ്പം ചിത്രത്തില്‍ അഭിനയിച്ച മറ്റു താരങ്ങളും ശ്രദ്ധേയ പ്രകടനമാണ് കാഴ്ചവെച്ചത്. അതേസമയം മമ്മൂട്ടിയും നിഖില വിമലും ഒരുമിച്ചുളള ചിത്രത്തിന് പിന്നാലെ മമ്മൂക്കയും നദിയാ മൊയ്തുവും ഒന്നിച്ചുളള ഒരു പഴയ ചിത്രവും സോഷ്യല്‍ മീഡിയയില്‍ വീണ്ടും വൈറലായിരുന്നു.

നിഖിലയെ പോലെ തന്നെ നദിയയും മമ്മൂട്ടിയെ തന്നെ നോക്കിനില്‍ക്കുവാണ്. അന്നായാലും ഇന്നായാലും ഇക്കയ്ക്ക് ഇത് പുതുമയല്ലെന്ന ക്യാപ്ഷനോടെയാണ് ഈ ചിത്രം സോഷ്യല്‍ മീഡിയയില്‍ വന്നിരിക്കുന്നത്. 1985ല്‍ പുറത്തിറങ്ങിയ ഒന്നിങ്ങു വന്നെങ്കില്‍ എന്ന സിനിമയുടെ സമയത്ത് എടുത്ത ചിത്രമാണിത്. സംവിധായകന്‍ ജോഷിയാണ് ഈ ചിത്രമൊരുക്കിയത്.

മമ്മൂട്ടിക്കൊപ്പമുളള പഴയ ഫോട്ടോ നദിയ മൊയ്തു തന്നെ മുന്‍പ് തന്‌റെ സോഷ്യല്‍ മീഡിയ പേജില്‍ പങ്കുവെച്ചിരുന്നു. ഈ ചിത്രത്തിന് പുറമെ കണ്ടു കണ്ടറിഞ്ഞു, പൂവിന് പുതിയ പൂന്തെന്നല്‍, ഡബിള്‍സ് തുടങ്ങിയ സിനിമകളിലും മമ്മൂട്ടിയും നദിയാ മൊയ്തുവും ഒന്നിച്ചഭിനയിച്ചിരുന്നു. മലയാളത്തിന് പുറമെ അന്യാഭാഷ സിനിമകളിലും തിളങ്ങിയ നായികയാണ് നദിയാ മൊയ്തു.

തമിഴ്, തെലുങ്ക് ഭാഷകളിലും നദിയാ മൊയ്തു സജീവമാണ്. അതേസമയം ഡബിള്‍സ് എന്ന ചിത്രത്തിലാണ് മമ്മൂക്കയ്‌ക്കൊപ്പം നടി ഒടുവില്‍ അഭിനയിച്ചത്. മാസങ്ങള്‍ക്ക് ശേഷമാണ് മമ്മൂട്ടിയുടെ ഒരു സിനിമ തിയ്യേറ്ററുകളില്‍ എത്തിയത്. ദ പ്രീസ്റ്റിന്‌റെ വിജയത്തിന് പിന്നാലെ മെഗാസ്റ്റാറിന് നന്ദി പറഞ്ഞ് തിയ്യേറ്റര്‍ ഉടമകളും സിനിമാ പ്രവര്‍ത്തകരുമെല്ലാം തന്നെ എത്തിയിരുന്നു.